| Library / Tipiṭaka / តិបិដក • Tipiṭaka / អបទានបាឡិ • Apadānapāḷi |
៥២. ផលទាយកវគ្គោ
52. Phaladāyakavaggo
១. កុរញ្ចិយផលទាយកត្ថេរអបទានំ
1. Kurañciyaphaladāyakattheraapadānaṃ
១.
1.
‘‘មិគលុទ្ទោ បុរេ អាសិំ, វិបិនេ វិចរំ អហំ;
‘‘Migaluddo pure āsiṃ, vipine vicaraṃ ahaṃ;
អទ្ទសំ វិរជំ ពុទ្ធំ, សព្ពធម្មាន បារគុំ។
Addasaṃ virajaṃ buddhaṃ, sabbadhammāna pāraguṃ.
២.
2.
‘‘កុរញ្ចិយផលំ គយ្ហ, ពុទ្ធសេដ្ឋស្សទាសហំ;
‘‘Kurañciyaphalaṃ gayha, buddhaseṭṭhassadāsahaṃ;
បុញ្ញក្ខេត្តស្ស តាទិនោ, បសន្នោ សេហិ បាណិភិ។
Puññakkhettassa tādino, pasanno sehi pāṇibhi.
៣.
3.
‘‘ឯកតិំសេ ឥតោ កប្បេ, យំ ផលំ អទទិំ តទា;
‘‘Ekatiṃse ito kappe, yaṃ phalaṃ adadiṃ tadā;
ទុគ្គតិំ នាភិជានាមិ, ផលទានស្សិទំ ផលំ។
Duggatiṃ nābhijānāmi, phaladānassidaṃ phalaṃ.
៤.
4.
‘‘កិលេសា ឈាបិតា មយ្ហំ, ភវា សព្ពេ សមូហតា;
‘‘Kilesā jhāpitā mayhaṃ, bhavā sabbe samūhatā;
នាគោវ ពន្ធនំ ឆេត្វា, វិហរាមិ អនាសវោ។
Nāgova bandhanaṃ chetvā, viharāmi anāsavo.
៥.
5.
‘‘ស្វាគតំ វត មេ អាសិ, ពុទ្ធសេដ្ឋស្ស សន្តិកេ;
‘‘Svāgataṃ vata me āsi, buddhaseṭṭhassa santike;
តិស្សោ វិជ្ជា អនុប្បត្តា, កតំ ពុទ្ធស្ស សាសនំ។
Tisso vijjā anuppattā, kataṃ buddhassa sāsanaṃ.
៦.
6.
‘‘បដិសម្ភិទា ចតស្សោ, វិមោក្ខាបិ ច អដ្ឋិមេ;
‘‘Paṭisambhidā catasso, vimokkhāpi ca aṭṭhime;
ឆឡភិញ្ញា សច្ឆិកតា, កតំ ពុទ្ធស្ស សាសនំ’’។
Chaḷabhiññā sacchikatā, kataṃ buddhassa sāsanaṃ’’.
ឥត្ថំ សុទំ អាយស្មា កុរញ្ចិយផលទាយកោ ថេរោ ឥមា
Itthaṃ sudaṃ āyasmā kurañciyaphaladāyako thero imā
គាថាយោ អភាសិត្ថាតិ។
Gāthāyo abhāsitthāti.
កុរញ្ចិយផលទាយកត្ថេរស្សាបទានំ បឋមំ។
Kurañciyaphaladāyakattherassāpadānaṃ paṭhamaṃ.
