| Library / Tipiṭaka / तिपिटक • Tipiṭaka / अपदानपाळि • Apadānapāḷi |
५२. फलदायकवग्गो
52. Phaladāyakavaggo
१. कुरञ्चियफलदायकत्थेरअपदानं
1. Kurañciyaphaladāyakattheraapadānaṃ
१.
1.
‘‘मिगलुद्दो पुरे आसिं, विपिने विचरं अहं।
‘‘Migaluddo pure āsiṃ, vipine vicaraṃ ahaṃ;
अद्दसं विरजं बुद्धं, सब्बधम्मान पारगुं॥
Addasaṃ virajaṃ buddhaṃ, sabbadhammāna pāraguṃ.
२.
2.
‘‘कुरञ्चियफलं गय्ह, बुद्धसेट्ठस्सदासहं।
‘‘Kurañciyaphalaṃ gayha, buddhaseṭṭhassadāsahaṃ;
पुञ्ञक्खेत्तस्स तादिनो, पसन्नो सेहि पाणिभि॥
Puññakkhettassa tādino, pasanno sehi pāṇibhi.
३.
3.
‘‘एकतिंसे इतो कप्पे, यं फलं अददिं तदा।
‘‘Ekatiṃse ito kappe, yaṃ phalaṃ adadiṃ tadā;
दुग्गतिं नाभिजानामि, फलदानस्सिदं फलं॥
Duggatiṃ nābhijānāmi, phaladānassidaṃ phalaṃ.
४.
4.
‘‘किलेसा झापिता मय्हं, भवा सब्बे समूहता।
‘‘Kilesā jhāpitā mayhaṃ, bhavā sabbe samūhatā;
नागोव बन्धनं छेत्वा, विहरामि अनासवो॥
Nāgova bandhanaṃ chetvā, viharāmi anāsavo.
५.
5.
‘‘स्वागतं वत मे आसि, बुद्धसेट्ठस्स सन्तिके।
‘‘Svāgataṃ vata me āsi, buddhaseṭṭhassa santike;
तिस्सो विज्जा अनुप्पत्ता, कतं बुद्धस्स सासनं॥
Tisso vijjā anuppattā, kataṃ buddhassa sāsanaṃ.
६.
6.
‘‘पटिसम्भिदा चतस्सो, विमोक्खापि च अट्ठिमे।
‘‘Paṭisambhidā catasso, vimokkhāpi ca aṭṭhime;
छळभिञ्ञा सच्छिकता, कतं बुद्धस्स सासनं’’॥
Chaḷabhiññā sacchikatā, kataṃ buddhassa sāsanaṃ’’.
इत्थं सुदं आयस्मा कुरञ्चियफलदायको थेरो इमा
Itthaṃ sudaṃ āyasmā kurañciyaphaladāyako thero imā
गाथायो अभासित्थाति।
Gāthāyo abhāsitthāti.
कुरञ्चियफलदायकत्थेरस्सापदानं पठमं।
Kurañciyaphaladāyakattherassāpadānaṃ paṭhamaṃ.
