| Library / Tipiṭaka / តិបិដក • Tipiṭaka / ជាតកបាឡិ • Jātakapāḷi |
៤១៥. កុម្មាសបិណ្ឌិជាតកំ (៧-២-១០)
415. Kummāsapiṇḍijātakaṃ (7-2-10)
១៤២.
142.
ន កិរត្ថិ អនោមទស្សិសុ, បារិចរិយា ពុទ្ធេសុ អប្បិកា 1;
Na kiratthi anomadassisu, pāricariyā buddhesu appikā 2;
សុក្ខាយ អលោណិកាយ ច, បស្សផលំ កុម្មាសបិណ្ឌិយា។
Sukkhāya aloṇikāya ca, passaphalaṃ kummāsapiṇḍiyā.
១៤៣.
143.
ហត្ថិគវស្សា ចិមេ ពហូ 3, ធនធញ្ញំ បថវី ច កេវលា;
Hatthigavassā cime bahū 4, dhanadhaññaṃ pathavī ca kevalā;
នារិយោ ចិមា អច្ឆរូបមា, បស្សផលំ កុម្មាសបិណ្ឌិយា។
Nāriyo cimā accharūpamā, passaphalaṃ kummāsapiṇḍiyā.
១៤៤.
144.
អភិក្ខណំ រាជកុញ្ជរ, គាថា ភាសសិ កោសលាធិប;
Abhikkhaṇaṃ rājakuñjara, gāthā bhāsasi kosalādhipa;
បុច្ឆាមិ តំ រដ្ឋវឌ្ឍន, ពាឡ្ហំ បីតិមនោ បភាសសិ។
Pucchāmi taṃ raṭṭhavaḍḍhana, bāḷhaṃ pītimano pabhāsasi.
១៤៥.
145.
ឥមស្មិញ្ញេវ នគរេ, កុលេ អញ្ញតរេ អហុំ;
Imasmiññeva nagare, kule aññatare ahuṃ;
បរកម្មករោ អាសិំ, ភតកោ សីលសំវុតោ។
Parakammakaro āsiṃ, bhatako sīlasaṃvuto.
១៤៦.
146.
កម្មាយ និក្ខមន្តោហំ, ចតុរោ សមណេទ្ទសំ;
Kammāya nikkhamantohaṃ, caturo samaṇeddasaṃ;
អាចារសីលសម្បន្នេ, សីតិភូតេ អនាសវេ។
Ācārasīlasampanne, sītibhūte anāsave.
១៤៧.
147.
អទំ ពុទ្ធាន កុម្មាសំ, បសន្នោ សេហិ បាណិភិ។
Adaṃ buddhāna kummāsaṃ, pasanno sehi pāṇibhi.
១៤៨.
148.
តស្ស កម្មស្ស កុសលស្ស, ឥទំ មេ ឯទិសំ ផលំ;
Tassa kammassa kusalassa, idaṃ me edisaṃ phalaṃ;
អនុភោមិ ឥទំ រជ្ជំ, ផីតំ ធរណិមុត្តមំ។
Anubhomi idaṃ rajjaṃ, phītaṃ dharaṇimuttamaṃ.
១៤៩.
149.
ទទំ ភុញ្ជ មា ច បមាទោ 7, ចក្កំ វត្តយ កោសលាធិប;
Dadaṃ bhuñja mā ca pamādo 8, cakkaṃ vattaya kosalādhipa;
មា រាជ អធម្មិកោ អហុ, ធម្មំ បាលយ កោសលាធិប។
Mā rāja adhammiko ahu, dhammaṃ pālaya kosalādhipa.
១៥០.
150.
សោហំ តទេវ បុនប្បុនំ, វដុមំ អាចរិស្សាមិ សោភនេ;
Sohaṃ tadeva punappunaṃ, vaṭumaṃ ācarissāmi sobhane;
អរិយាចរិតំ សុកោសលេ, អរហន្តោ មេ មនាបាវ បស្សិតុំ។
Ariyācaritaṃ sukosale, arahanto me manāpāva passituṃ.
១៥១.
151.
ទេវី វិយ អច្ឆរូបមា, មជ្ឈេ នារិគណស្ស សោភសិ;
Devī viya accharūpamā, majjhe nārigaṇassa sobhasi;
កិំ កម្មមកាសិ ភទ្ទកំ, កេនាសិ វណ្ណវតី សុកោសលេ។
Kiṃ kammamakāsi bhaddakaṃ, kenāsi vaṇṇavatī sukosale.
១៥២.
152.
អម្ពដ្ឋកុលស្ស ខត្តិយ, ទាស្យាហំ បរបេសិយា អហុំ;
Ambaṭṭhakulassa khattiya, dāsyāhaṃ parapesiyā ahuṃ;
១៥៣.
153.
ឧទ្ធដភត្តំ អហំ តទា, ចរមានស្ស អទាសិ ភិក្ខុនោ;
Uddhaṭabhattaṃ ahaṃ tadā, caramānassa adāsi bhikkhuno;
វិត្តា សុមនា សយំ អហំ, តស្ស កម្មស្ស ផលំ មមេទិសន្តិ។
Vittā sumanā sayaṃ ahaṃ, tassa kammassa phalaṃ mamedisanti.
កុម្មាសបិណ្ឌិជាតកំ ទសមំ។
Kummāsapiṇḍijātakaṃ dasamaṃ.
Footnotes:
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / ខុទ្ទកនិកាយ (អដ្ឋកថា) • Khuddakanikāya (aṭṭhakathā) / ជាតក-អដ្ឋកថា • Jātaka-aṭṭhakathā / [៤១៥] ១០. កុម្មាសបិណ្ឌិជាតកវណ្ណនា • [415] 10. Kummāsapiṇḍijātakavaṇṇanā
