| Library / Tipiṭaka / ติปิฎก • Tipiṭaka / ชาตกปาฬิ • Jātakapāḷi |
๔๐๘. กุมฺภการชาตกํ (๗-๒-๓)
408. Kumbhakārajātakaṃ (7-2-3)
๙๐.
90.
อมฺพาหมทฺทํ วนมนฺตรสฺมิํ, นีโลภาสํ ผลิตํ 1 สํวิรูฬฺหํ;
Ambāhamaddaṃ vanamantarasmiṃ, nīlobhāsaṃ phalitaṃ 2 saṃvirūḷhaṃ;
ตมทฺทสํ ผลเหตุ วิภคฺคํ, ตํ ทิสฺวา ภิกฺขาจริยํ จรามิฯ
Tamaddasaṃ phalahetu vibhaggaṃ, taṃ disvā bhikkhācariyaṃ carāmi.
๙๑.
91.
เสลํ สุมฎฺฐํ นรวีรนิฎฺฐิตํ 3, นารี ยุคํ ธารยิ อปฺปสทฺทํ;
Selaṃ sumaṭṭhaṃ naravīraniṭṭhitaṃ 4, nārī yugaṃ dhārayi appasaddaṃ;
ทุติยญฺจ อาคมฺม อโหสิ สโทฺท, ตํ ทิสฺวา ภิกฺขาจริยํ จรามิฯ
Dutiyañca āgamma ahosi saddo, taṃ disvā bhikkhācariyaṃ carāmi.
๙๒.
92.
ทิชา ทิชํ กุณปมาหรนฺตํ, เอกํ สมานํ พหุกา สเมจฺจ;
Dijā dijaṃ kuṇapamāharantaṃ, ekaṃ samānaṃ bahukā samecca;
อาหารเหตู ปริปาตยิํสุ, ตํ ทิสฺวา ภิกฺขาจริยํ จรามิฯ
Āhārahetū paripātayiṃsu, taṃ disvā bhikkhācariyaṃ carāmi.
๙๓.
93.
อุสภาหมทฺทํ ยูถสฺส มเชฺฌ, จลกฺกกุํ วณฺณพลูปปนฺนํ;
Usabhāhamaddaṃ yūthassa majjhe, calakkakuṃ vaṇṇabalūpapannaṃ;
ตมทฺทสํ กามเหตุ วิตุนฺนํ, ตํ ทิสฺวา ภิกฺขาจริยํ จรามิฯ
Tamaddasaṃ kāmahetu vitunnaṃ, taṃ disvā bhikkhācariyaṃ carāmi.
๙๔.
94.
นิมิราชา วิเทหานํ, ปญฺจาลานญฺจ ทุมฺมุโข;
Nimirājā videhānaṃ, pañcālānañca dummukho;
เอเต รฎฺฐานิ หิตฺวาน, ปพฺพชิํสุ อกิญฺจนาฯ
Ete raṭṭhāni hitvāna, pabbajiṃsu akiñcanā.
๙๕.
95.
สเพฺพปิเม เทวสมา สมาคตา, อคฺคี ยถา ปชฺชลิโต ตเถวิเม;
Sabbepime devasamā samāgatā, aggī yathā pajjalito tathevime;
อหมฺปิ เอโก จริสฺสามิ ภคฺควิ, หิตฺวาน กามานิ ยโถธิกานิฯ
Ahampi eko carissāmi bhaggavi, hitvāna kāmāni yathodhikāni.
๙๖.
96.
อยเมว กาโล น หิ อโญฺญ อตฺถิ, อนุสาสิตา เม น ภเวยฺย ปจฺฉา;
Ayameva kālo na hi añño atthi, anusāsitā me na bhaveyya pacchā;
อหมฺปิ เอกา จริสฺสามิ ภคฺคว, สกุณีว มุตฺตา ปุริสสฺส หตฺถาฯ
Ahampi ekā carissāmi bhaggava, sakuṇīva muttā purisassa hatthā.
๙๗.
97.
อามํ ปกฺกญฺจ ชานนฺติ, อโถ โลณํ อโลณกํ;
Āmaṃ pakkañca jānanti, atho loṇaṃ aloṇakaṃ;
ตมหํ ทิสฺวาน ปพฺพชิํ, จเรว ตฺวํ จรามหนฺติฯ
Tamahaṃ disvāna pabbajiṃ, careva tvaṃ carāmahanti.
กุมฺภการชาตกํ ตติยํฯ
Kumbhakārajātakaṃ tatiyaṃ.
Footnotes:
Related texts:
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / ขุทฺทกนิกาย (อฎฺฐกถา) • Khuddakanikāya (aṭṭhakathā) / ชาตก-อฎฺฐกถา • Jātaka-aṭṭhakathā / [๔๐๘] ๓. กุมฺภการชาตกวณฺณนา • [408] 3. Kumbhakārajātakavaṇṇanā
