| Library / Tipiṭaka / ತಿಪಿಟಕ • Tipiṭaka / ಥೇರಗಾಥಾಪಾಳಿ • Theragāthāpāḷi |
೪. ಕುಲ್ಲತ್ಥೇರಗಾಥಾ
4. Kullattheragāthā
೩೯೩.
393.
‘‘ಕುಲ್ಲೋ ಸಿವಥಿಕಂ ಗನ್ತ್ವಾ, ಅದ್ದಸ ಇತ್ಥಿಮುಜ್ಝಿತಂ।
‘‘Kullo sivathikaṃ gantvā, addasa itthimujjhitaṃ;
ಅಪವಿದ್ಧಂ ಸುಸಾನಸ್ಮಿಂ, ಖಜ್ಜನ್ತಿಂ ಕಿಮಿಹೀ ಫುಟಂ॥
Apaviddhaṃ susānasmiṃ, khajjantiṃ kimihī phuṭaṃ.
೩೯೪.
394.
‘‘ಆತುರಂ ಅಸುಚಿಂ ಪೂತಿಂ, ಪಸ್ಸ ಕುಲ್ಲ ಸಮುಸ್ಸಯಂ।
‘‘Āturaṃ asuciṃ pūtiṃ, passa kulla samussayaṃ;
ಉಗ್ಘರನ್ತಂ ಪಗ್ಘರನ್ತಂ, ಬಾಲಾನಂ ಅಭಿನನ್ದಿತಂ॥
Uggharantaṃ paggharantaṃ, bālānaṃ abhinanditaṃ.
೩೯೫.
395.
‘‘ಧಮ್ಮಾದಾಸಂ ಗಹೇತ್ವಾನ, ಞಾಣದಸ್ಸನಪತ್ತಿಯಾ।
‘‘Dhammādāsaṃ gahetvāna, ñāṇadassanapattiyā;
ಪಚ್ಚವೇಕ್ಖಿಂ ಇಮಂ ಕಾಯಂ, ತುಚ್ಛಂ ಸನ್ತರಬಾಹಿರಂ॥
Paccavekkhiṃ imaṃ kāyaṃ, tucchaṃ santarabāhiraṃ.
೩೯೬.
396.
‘‘ಯಥಾ ಇದಂ ತಥಾ ಏತಂ, ಯಥಾ ಏತಂ ತಥಾ ಇದಂ।
‘‘Yathā idaṃ tathā etaṃ, yathā etaṃ tathā idaṃ;
ಯಥಾ ಅಧೋ ತಥಾ ಉದ್ಧಂ, ಯಥಾ ಉದ್ಧಂ ತಥಾ ಅಧೋ॥
Yathā adho tathā uddhaṃ, yathā uddhaṃ tathā adho.
೩೯೭.
397.
‘‘ಯಥಾ ದಿವಾ ತಥಾ ರತ್ತಿಂ, ಯಥಾ ರತ್ತಿಂ ತಥಾ ದಿವಾ।
‘‘Yathā divā tathā rattiṃ, yathā rattiṃ tathā divā;
ಯಥಾ ಪುರೇ ತಥಾ ಪಚ್ಛಾ, ಯಥಾ ಪಚ್ಛಾ ತಥಾ ಪುರೇ॥
Yathā pure tathā pacchā, yathā pacchā tathā pure.
೩೯೮.
398.
‘‘ಪಞ್ಚಙ್ಗಿಕೇನ ತುರಿಯೇನ, ನ ರತೀ ಹೋತಿ ತಾದಿಸೀ।
‘‘Pañcaṅgikena turiyena, na ratī hoti tādisī;
ಯಥಾ ಏಕಗ್ಗಚಿತ್ತಸ್ಸ, ಸಮ್ಮಾ ಧಮ್ಮಂ ವಿಪಸ್ಸತೋ’’ತಿ॥
Yathā ekaggacittassa, sammā dhammaṃ vipassato’’ti.
… ಕುಲ್ಲೋ ಥೇರೋ…।
… Kullo thero….
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಖುದ್ದಕನಿಕಾಯ (ಅಟ್ಠಕಥಾ) • Khuddakanikāya (aṭṭhakathā) / ಥೇರಗಾಥಾ-ಅಟ್ಠಕಥಾ • Theragāthā-aṭṭhakathā / ೪. ಕುಲ್ಲತ್ಥೇರಗಾಥಾವಣ್ಣನಾ • 4. Kullattheragāthāvaṇṇanā
