| Library / Tipiṭaka / တိပိဋက • Tipiṭaka / သံယုတ္တနိကာယ (ဋီကာ) • Saṃyuttanikāya (ṭīkā) |
၉. ကုလသုတ္တဝဏ္ဏနာ
9. Kulasuttavaṇṇanā
၃၆၁. ဧဝံ ပဝတ္တဤဟိတိကာတိ ဧဝံ ဒ္ဝိဓာ ပဝတ္တဤဟိတိကာ။ ဒ္ဝီဟိတိကာ ဒုက္ကရဇီဝိကပယောဂာ။ သလာကမတ္တံ ဝုတ္တံ ဧတ္ထာတိ သလာကာ ဝုတ္တာ, ပုရိမပဒေ ဥတ္တရပဒလောပော။ ဥဘတောကောဋိကန္တိ ယဒိ ‘‘ကုလာနုဒယံ န ဝဏ္ဏေမီ’’တိ ဝဒတိ, ‘‘ဘူတာ နိက္ကရုဏာ သမဏ တုမ္ဟေ’’တိ ဝာဒံ အာရောပေဟိ။ အထ သဗ္ဗဒာပိ ‘‘ကုလာနုဒယံ ဝဏ္ဏေမီ’’တိ ဝဒတိ။ ဧဝံ သန္တေ ‘‘ကသ္မာ ဧဝံ ဒုဗ္ဘိက္ခေ ကာလေ မဟတိယာ ပရိသာယ ပရိဝုတော ဇနပဒစာရိကံ စရန္တာ ကုလူပစ္ဆေဒာယ ပဋိပဇ္ဇထာ’’တိ ဧဝံ ဥဘတောကောဋိကံ ဝာဒံ အာရောပေဟီတိ ဂာမဏိံ ဥယ္ယောဇေသိ။
361.Evaṃ pavattaīhitikāti evaṃ dvidhā pavattaīhitikā. Dvīhitikā dukkarajīvikapayogā. Salākamattaṃ vuttaṃ etthāti salākā vuttā, purimapade uttarapadalopo. Ubhatokoṭikanti yadi ‘‘kulānudayaṃ na vaṇṇemī’’ti vadati, ‘‘bhūtā nikkaruṇā samaṇa tumhe’’ti vādaṃ āropehi. Atha sabbadāpi ‘‘kulānudayaṃ vaṇṇemī’’ti vadati. Evaṃ sante ‘‘kasmā evaṃ dubbhikkhe kāle mahatiyā parisāya parivuto janapadacārikaṃ carantā kulūpacchedāya paṭipajjathā’’ti evaṃ ubhatokoṭikaṃ vādaṃ āropehīti gāmaṇiṃ uyyojesi.
ဒ္ဝေ အန္တေတိ ဥဘော ကောဋိယော။ ဗဟိ နီဟရိတုန္တိ န ဝဏ္ဏေမိ ဝဏ္ဏေမီတိ ဒ္ဝေ အန္တေ မောစေန္တော တံ ပုစ္ဆိတမတ္ထံ ဗဟိ နီဟရတိ နာမ။ တတ္ထ ဒောသံ ဒတ္ဝာ စောဒေန္တော တံ အပုစ္ဆံ ကရောန္တော ဂိလိတ္ဝာ ဝိယ အန္တော ပဝေသေတိ နာမ။
Dve anteti ubho koṭiyo. Bahi nīharitunti na vaṇṇemi vaṇṇemīti dve ante mocento taṃ pucchitamatthaṃ bahi nīharati nāma. Tattha dosaṃ datvā codento taṃ apucchaṃ karonto gilitvā viya anto paveseti nāma.
ဣတော သော ဂာမဏီတိအာဒိ အတ္တနော ဘိက္ခူနံ အညေသဉ္စ အတ္ထကာမာနံ ဘိက္ခပ္ပဒာနေန အနိဋ္ဌပ္ပတ္တိအဘာဝဒသ္သနတ္ထံ အာရဒ္ဓံ။ ဒာနေန သမ္ဘူတာနီတိ ဒာနမယေန ပုညကိရိယဝတ္ထုနာ သမ္မဒေဝ ဘူတိံ ဝဍ္ဎိံ ပတ္တာနိ။ သစ္စေန အရိယဝောဟာရေန သမ္မဒေဝ ဘူတာနိ ဥပ္ပန္နာနိ သစ္စသမ္ဘူတာနီတိ အာဟ ‘‘သစ္စံ နာမ သစ္စဝာဒိတာ’’တိ။ သေသသီလန္တိ အဋ္ဌဝိဓအရိယဝောဟာရတော အညသီလံ။ နိဟိတန္တိ တသ္မိံ ကုလေ ပုဗ္ဗပုရိသေဟိ နိဓာနဘာဝေန နိဟိတံ။ ဒုပ္ပယုတ္တာတိ ကသိဝာဏိဇ္ဇာဒိဝသေန ဒုဋ္ဌု ပယုတ္တာ ကမ္မန္တာ။ ဝိပဇ္ဇန္တီတိ နသ္သန္တိ။ ကုလင္ဂာရောတိ ကုလသ္သ အင္ဂာရသဒိသော ဝိနာသကပုဂ္ဂလော။ အနိစ္စတာတိ မရဏံ။ တသ္မိံ ကုလေ ပဓာနပုရိသာနံ ဘောဂာနံ ဝာ သဗ္ဗသော ဝိနာသော။ တေနာဟ ‘‘ဟုတ္ဝာ အဘာဝော’’တိအာဒိ။
Ito so gāmaṇītiādi attano bhikkhūnaṃ aññesañca atthakāmānaṃ bhikkhappadānena aniṭṭhappattiabhāvadassanatthaṃ āraddhaṃ. Dānena sambhūtānīti dānamayena puññakiriyavatthunā sammadeva bhūtiṃ vaḍḍhiṃ pattāni. Saccena ariyavohārena sammadeva bhūtāni uppannāni saccasambhūtānīti āha ‘‘saccaṃ nāma saccavāditā’’ti. Sesasīlanti aṭṭhavidhaariyavohārato aññasīlaṃ. Nihitanti tasmiṃ kule pubbapurisehi nidhānabhāvena nihitaṃ. Duppayuttāti kasivāṇijjādivasena duṭṭhu payuttā kammantā. Vipajjantīti nassanti. Kulaṅgāroti kulassa aṅgārasadiso vināsakapuggalo. Aniccatāti maraṇaṃ. Tasmiṃ kule padhānapurisānaṃ bhogānaṃ vā sabbaso vināso. Tenāha ‘‘hutvā abhāvo’’tiādi.
ကုလသုတ္တဝဏ္ဏနာ နိဋ္ဌိတာ။
Kulasuttavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၉. ကုလသုတ္တံ • 9. Kulasuttaṃ
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၉. ကုလသုတ္တဝဏ္ဏနာ • 9. Kulasuttavaṇṇanā
