| Library / Tipiṭaka / तिपिटक • Tipiṭaka / संयुत्तनिकाय • Saṃyuttanikāya |
८. कुलघरणीसुत्तं
8. Kulagharaṇīsuttaṃ
२२८. एकं समयं अञ्ञतरो भिक्खु कोसलेसु विहरति अञ्ञतरस्मिं वनसण्डे। तेन खो पन समयेन सो भिक्खु अञ्ञतरस्मिं कुले अतिवेलं अज्झोगाळ्हप्पत्तो विहरति। अथ खो या तस्मिं वनसण्डे अधिवत्था देवता तस्स भिक्खुनो अनुकम्पिका अत्थकामा तं भिक्खुं संवेजेतुकामा या तस्मिं कुले कुलघरणी, तस्सा वण्णं अभिनिम्मिनित्वा येन सो भिक्खु तेनुपसङ्कमि; उपसङ्कमित्वा तं भिक्खुं गाथाय अज्झभासि –
228. Ekaṃ samayaṃ aññataro bhikkhu kosalesu viharati aññatarasmiṃ vanasaṇḍe. Tena kho pana samayena so bhikkhu aññatarasmiṃ kule ativelaṃ ajjhogāḷhappatto viharati. Atha kho yā tasmiṃ vanasaṇḍe adhivatthā devatā tassa bhikkhuno anukampikā atthakāmā taṃ bhikkhuṃ saṃvejetukāmā yā tasmiṃ kule kulagharaṇī, tassā vaṇṇaṃ abhinimminitvā yena so bhikkhu tenupasaṅkami; upasaṅkamitvā taṃ bhikkhuṃ gāthāya ajjhabhāsi –
‘‘नदीतीरेसु सण्ठाने, सभासु रथियासु च।
‘‘Nadītīresu saṇṭhāne, sabhāsu rathiyāsu ca;
जना सङ्गम्म मन्तेन्ति, मञ्च तञ्च 1 किमन्तर’’न्ति॥
Janā saṅgamma mantenti, mañca tañca 2 kimantara’’nti.
‘‘बहूहि सद्दा पच्चूहा, खमितब्बा तपस्सिना।
‘‘Bahūhi saddā paccūhā, khamitabbā tapassinā;
न तेन मङ्कु होतब्बं, न हि तेन किलिस्सति॥
Na tena maṅku hotabbaṃ, na hi tena kilissati.
‘‘यो च सद्दपरित्तासी, वने वातमिगो यथा।
‘‘Yo ca saddaparittāsī, vane vātamigo yathā;
लहुचित्तोति तं आहु, नास्स सम्पज्जते वत’’न्ति॥
Lahucittoti taṃ āhu, nāssa sampajjate vata’’nti.
Footnotes:
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / संयुत्तनिकाय (अट्ठकथा) • Saṃyuttanikāya (aṭṭhakathā) / ८. कुलघरणीसुत्तवण्णना • 8. Kulagharaṇīsuttavaṇṇanā
टीका • Tīkā / सुत्तपिटक (टीका) • Suttapiṭaka (ṭīkā) / संयुत्तनिकाय (टीका) • Saṃyuttanikāya (ṭīkā) / ८. कुलघरणीसुत्तवण्णना • 8. Kulagharaṇīsuttavaṇṇanā
