| Library / Tipiṭaka / तिपिटक • Tipiṭaka / पञ्चपकरण-अट्ठकथा • Pañcapakaraṇa-aṭṭhakathā |
८. कुक्कुळकथावण्णना
8. Kukkuḷakathāvaṇṇanā
३३८. इदानि कुक्कुळकथा नाम होति। तत्थ येसं ‘‘सब्बं, भिक्खवे, आदित्तं (सं॰ नि॰ ४.२८; महाव॰ ५४) सब्बे सङ्खारा दुक्खा’’तिआदीनि (ध॰ प॰ २७८) सुत्तानि अयोनिसो गहेत्वा ‘‘निप्परियायेनेव सब्बे सङ्खारा कुक्कुळा वीतच्चितङ्गारसम्मिस्सा छारिकनिरयसदिसा’’ति लद्धि, सेय्यथापि एतरहि गोकुलिकानं; तेसं नानप्पकारसुखसन्दस्सनेन तं लद्धिं विवेचेतुं पुच्छा सकवादिस्स, पटिञ्ञा परवादिस्स। तत्थ अनोधिं कत्वाति ओधिं मरियादं कोट्ठासं अकरित्वा, अविसेसेन सब्बेयेवाति अत्थो। सेसं सब्बं पाळिनयेनेव वेदितब्बं सद्धिं सुत्तसाधनायाति।
338. Idāni kukkuḷakathā nāma hoti. Tattha yesaṃ ‘‘sabbaṃ, bhikkhave, ādittaṃ (saṃ. ni. 4.28; mahāva. 54) sabbe saṅkhārā dukkhā’’tiādīni (dha. pa. 278) suttāni ayoniso gahetvā ‘‘nippariyāyeneva sabbe saṅkhārā kukkuḷā vītaccitaṅgārasammissā chārikanirayasadisā’’ti laddhi, seyyathāpi etarahi gokulikānaṃ; tesaṃ nānappakārasukhasandassanena taṃ laddhiṃ vivecetuṃ pucchā sakavādissa, paṭiññā paravādissa. Tattha anodhiṃ katvāti odhiṃ mariyādaṃ koṭṭhāsaṃ akaritvā, avisesena sabbeyevāti attho. Sesaṃ sabbaṃ pāḷinayeneva veditabbaṃ saddhiṃ suttasādhanāyāti.
कुक्कुळकथावण्णना।
Kukkuḷakathāvaṇṇanā.
Related texts:
तिपिटक (मूल) • Tipiṭaka (Mūla) / अभिधम्मपिटक • Abhidhammapiṭaka / कथावत्थुपाळि • Kathāvatthupāḷi / (१७) ८. कुक्कुळकथा • (17) 8. Kukkuḷakathā
