| Library / Tipiṭaka / တိပိဋက • Tipiṭaka / မဟာဝဂ္ဂပာဠိ • Mahāvaggapāḷi |
၉၈. ကုက္ကုစ္စပကတပန္နရသကံ
98. Kukkuccapakatapannarasakaṃ
၁၇၅. ဣဓ ပန, ဘိက္ခဝေ, အညတရသ္မိံ အာဝာသေ တဒဟုပောသထေ သမ္ဗဟုလာ အာဝာသိကာ ဘိက္ခူ သန္နိပတန္တိ စတ္တာရော ဝာ အတိရေကာ ဝာ။ တေ ဇာနန္တိ ‘‘အတ္ထညေ အာဝာသိကာ ဘိက္ခူ အနာဂတာ’’တိ။ တေ ‘‘ကပ္ပတေဝ အမ္ဟာကံ ဥပောသထော ကာတုံ နာမ္ဟာကံ န ကပ္ပတီ’’တိ, ကုက္ကုစ္စပကတာ ဥပောသထံ ကရောန္တိ, ပာတိမောက္ခံ ဥဒ္ဒိသန္တိ။ တေဟိ ဥဒ္ဒိသ္သမာနေ ပာတိမောက္ခေ, အထညေ အာဝာသိကာ ဘိက္ခူ အာဂစ္ဆန္တိ ဗဟုတရာ။ တေဟိ, ဘိက္ခဝေ, ဘိက္ခူဟိ ပုန ပာတိမောက္ခံ ဥဒ္ဒိသိတဗ္ဗံ။ ဥဒ္ဒေသကာနံ အာပတ္တိ ဒုက္ကဋသ္သ။
175. Idha pana, bhikkhave, aññatarasmiṃ āvāse tadahuposathe sambahulā āvāsikā bhikkhū sannipatanti cattāro vā atirekā vā. Te jānanti ‘‘atthaññe āvāsikā bhikkhū anāgatā’’ti. Te ‘‘kappateva amhākaṃ uposatho kātuṃ nāmhākaṃ na kappatī’’ti, kukkuccapakatā uposathaṃ karonti, pātimokkhaṃ uddisanti. Tehi uddissamāne pātimokkhe, athaññe āvāsikā bhikkhū āgacchanti bahutarā. Tehi, bhikkhave, bhikkhūhi puna pātimokkhaṃ uddisitabbaṃ. Uddesakānaṃ āpatti dukkaṭassa.
ဣဓ ပန, ဘိက္ခဝေ, အညတရသ္မိံ အာဝာသေ တဒဟုပောသထေ သမ္ဗဟုလာ အာဝာသိကာ ဘိက္ခူ သန္နိပတန္တိ စတ္တာရော ဝာ အတိရေကာ ဝာ။ တေ ဇာနန္တိ ‘‘အတ္ထညေ အာဝာသိကာ ဘိက္ခူ အနာဂတာ’’တိ။ တေ ‘‘ကပ္ပတေဝ အမ္ဟာကံ ဥပောသထော ကာတုံ နာမ္ဟာကံ န ကပ္ပတီ’’တိ, ကုက္ကုစ္စပကတာ ဥပောသထံ ကရောန္တိ, ပာတိမောက္ခံ ဥဒ္ဒိသန္တိ။ တေဟိ ဥဒ္ဒိသ္သမာနေ ပာတိမောက္ခေ, အထညေ အာဝာသိကာ ဘိက္ခူ အာဂစ္ဆန္တိ သမသမာ။ ဥဒ္ဒိဋ္ဌံ သုဥဒ္ဒိဋ္ဌံ, အဝသေသံ သောတဗ္ဗံ။ ဥဒ္ဒေသကာနံ အာပတ္တိ ဒုက္ကဋသ္သ။
Idha pana, bhikkhave, aññatarasmiṃ āvāse tadahuposathe sambahulā āvāsikā bhikkhū sannipatanti cattāro vā atirekā vā. Te jānanti ‘‘atthaññe āvāsikā bhikkhū anāgatā’’ti. Te ‘‘kappateva amhākaṃ uposatho kātuṃ nāmhākaṃ na kappatī’’ti, kukkuccapakatā uposathaṃ karonti, pātimokkhaṃ uddisanti. Tehi uddissamāne pātimokkhe, athaññe āvāsikā bhikkhū āgacchanti samasamā. Uddiṭṭhaṃ suuddiṭṭhaṃ, avasesaṃ sotabbaṃ. Uddesakānaṃ āpatti dukkaṭassa.
ဣဓ ပန, ဘိက္ခဝေ, အညတရသ္မိံ အာဝာသေ တဒဟုပောသထေ သမ္ဗဟုလာ အာဝာသိကာ ဘိက္ခူ သန္နိပတန္တိ စတ္တာရော ဝာ အတိရေကာ ဝာ။ တေ ဇာနန္တိ ‘‘အတ္ထညေ အာဝာသိကာ ဘိက္ခူ အနာဂတာ’’တိ။ တေ ‘‘ကပ္ပတေဝ အမ္ဟာကံ ဥပောသထော ကာတုံ, နာမ္ဟာကံ န ကပ္ပတီ’’တိ, ကုက္ကုစ္စပကတာ ဥပောသထံ ကရောန္တိ, ပာတိမောက္ခံ ဥဒ္ဒိသန္တိ။ တေဟိ ဥဒ္ဒိသ္သမာနေ ပာတိမောက္ခေ, အထညေ အာဝာသိကာ ဘိက္ခူ အာဂစ္ဆန္တိ ထောကတရာ။ ဥဒ္ဒိဋ္ဌံ သုဥဒ္ဒိဋ္ဌံ, အဝသေသံ သောတဗ္ဗံ။ ဥဒ္ဒေသကာနံ အာပတ္တိ ဒုက္ကဋသ္သ။
Idha pana, bhikkhave, aññatarasmiṃ āvāse tadahuposathe sambahulā āvāsikā bhikkhū sannipatanti cattāro vā atirekā vā. Te jānanti ‘‘atthaññe āvāsikā bhikkhū anāgatā’’ti. Te ‘‘kappateva amhākaṃ uposatho kātuṃ, nāmhākaṃ na kappatī’’ti, kukkuccapakatā uposathaṃ karonti, pātimokkhaṃ uddisanti. Tehi uddissamāne pātimokkhe, athaññe āvāsikā bhikkhū āgacchanti thokatarā. Uddiṭṭhaṃ suuddiṭṭhaṃ, avasesaṃ sotabbaṃ. Uddesakānaṃ āpatti dukkaṭassa.
ဣဓ ပန, ဘိက္ခဝေ , အညတရသ္မိံ အာဝာသေ တဒဟုပောသထေ သမ္ဗဟုလာ အာဝာသိကာ ဘိက္ခူ သန္နိပတန္တိ စတ္တာရော ဝာ အတိရေကာ ဝာ။ တေ ဇာနန္တိ ‘‘အတ္ထညေ အာဝာသိကာ ဘိက္ခူ အနာဂတာ’’တိ။ တေ ‘‘ကပ္ပတေဝ အမ္ဟာကံ ဥပောသထော ကာတုံ နာမ္ဟာကံ န ကပ္ပတီ’’တိ, ကုက္ကုစ္စပကတာ ဥပောသထံ ကရောန္တိ, ပာတိမောက္ခံ ဥဒ္ဒိသန္တိ။ တေဟိ ဥဒ္ဒိဋ္ဌမတ္တေ ပာတိမောက္ခေ,။ပေ.။ အဝုဋ္ဌိတာယ ပရိသာယ။ပေ.။ ဧကစ္စာယ ဝုဋ္ဌိတာယ ပရိသာယ။ပေ.။ သဗ္ဗာယ ဝုဋ္ဌိတာယ ပရိသာယ, အထညေ အာဝာသိကာ ဘိက္ခူ အာဂစ္ဆန္တိ ဗဟုတရာ။ပေ.။ သမသမာ ။ပေ.။ ထောကတရာ။ ဥဒ္ဒိဋ္ဌံ သုဥဒ္ဒိဋ္ဌံ, တေသံ သန္တိကေ ပာရိသုဒ္ဓိ အာရောစေတဗ္ဗာ။ ဥဒ္ဒေသကာနံ အာပတ္တိ ဒုက္ကဋသ္သ။
Idha pana, bhikkhave , aññatarasmiṃ āvāse tadahuposathe sambahulā āvāsikā bhikkhū sannipatanti cattāro vā atirekā vā. Te jānanti ‘‘atthaññe āvāsikā bhikkhū anāgatā’’ti. Te ‘‘kappateva amhākaṃ uposatho kātuṃ nāmhākaṃ na kappatī’’ti, kukkuccapakatā uposathaṃ karonti, pātimokkhaṃ uddisanti. Tehi uddiṭṭhamatte pātimokkhe,…pe… avuṭṭhitāya parisāya…pe… ekaccāya vuṭṭhitāya parisāya…pe… sabbāya vuṭṭhitāya parisāya, athaññe āvāsikā bhikkhū āgacchanti bahutarā…pe… samasamā …pe… thokatarā. Uddiṭṭhaṃ suuddiṭṭhaṃ, tesaṃ santike pārisuddhi ārocetabbā. Uddesakānaṃ āpatti dukkaṭassa.
ကုက္ကုစ္စပကတပန္နရသကံ နိဋ္ဌိတံ။
Kukkuccapakatapannarasakaṃ niṭṭhitaṃ.
Related texts:
အဋ္ဌကထာ • Aṭṭhakathā / ဝိနယပိဋက (အဋ္ဌကထာ) • Vinayapiṭaka (aṭṭhakathā) / မဟာဝဂ္ဂ-အဋ္ဌကထာ • Mahāvagga-aṭṭhakathā / အနာပတ္တိပန္နရသကာဒိကထာ • Anāpattipannarasakādikathā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ပာစိတ္ယာဒိယောဇနာပာဠိ • Pācityādiyojanāpāḷi / ၉၅. အနာပတ္တိပန္နရသကာဒိကထာ • 95. Anāpattipannarasakādikathā
