| Library / Tipiṭaka / តិបិដក • Tipiṭaka / មហាវគ្គបាឡិ • Mahāvaggapāḷi |
១៣១. កុក្កុច្ចបកតបន្នរសកំ
131. Kukkuccapakatapannarasakaṃ
២២៥. ឥធ បន, ភិក្ខវេ, អញ្ញតរស្មិំ អាវាសេ តទហុ បវារណាយ សម្ពហុលា អាវាសិកា ភិក្ខូ សន្និបតន្តិ, បញ្ច វា អតិរេកា វា។ តេ ជានន្តិ ‘‘អត្ថញ្ញេ អាវាសិកា ភិក្ខូ អនាគតា’’តិ។ តេ ‘‘កប្បតេវ អម្ហាកំ បវារេតុំ, នាម្ហាកំ ន កប្បតី’’តិ កុក្កុច្ចបកតា បវារេន្តិ។ តេហិ បវារិយមានេ អថញ្ញេ អាវាសិកា ភិក្ខូ អាគច្ឆន្តិ ពហុតរា។ តេហិ, ភិក្ខវេ, ភិក្ខូហិ បុន បវារេតព្ពំ។ បវារិតានំ អាបត្តិ ទុក្កដស្ស។
225. Idha pana, bhikkhave, aññatarasmiṃ āvāse tadahu pavāraṇāya sambahulā āvāsikā bhikkhū sannipatanti, pañca vā atirekā vā. Te jānanti ‘‘atthaññe āvāsikā bhikkhū anāgatā’’ti. Te ‘‘kappateva amhākaṃ pavāretuṃ, nāmhākaṃ na kappatī’’ti kukkuccapakatā pavārenti. Tehi pavāriyamāne athaññe āvāsikā bhikkhū āgacchanti bahutarā. Tehi, bhikkhave, bhikkhūhi puna pavāretabbaṃ. Pavāritānaṃ āpatti dukkaṭassa.
ឥធ បន, ភិក្ខវេ, អញ្ញតរស្មិំ អាវាសេ តទហុ បវារណាយ សម្ពហុលា អាវាសិកា ភិក្ខូ សន្និបតន្តិ, បញ្ច វា អតិរេកា វា។ តេ ជានន្តិ ‘‘អត្ថញ្ញេ អាវាសិកា ភិក្ខូ អនាគតា’’តិ។ តេ ‘‘កប្បតេវ អម្ហាកំ បវារេតុំ, នាម្ហាកំ ន កប្បតី’’តិ កុក្កុច្ចបកតា បវារេន្តិ។ តេហិ បវារិយមានេ អថញ្ញេ អាវាសិកា ភិក្ខូ អាគច្ឆន្តិ សមសមា។ បវារិតា សុប្បវារិតា, អវសេសេហិ បវារេតព្ពំ។ បវារិតានំ អាបត្តិ ទុក្កដស្ស។
Idha pana, bhikkhave, aññatarasmiṃ āvāse tadahu pavāraṇāya sambahulā āvāsikā bhikkhū sannipatanti, pañca vā atirekā vā. Te jānanti ‘‘atthaññe āvāsikā bhikkhū anāgatā’’ti. Te ‘‘kappateva amhākaṃ pavāretuṃ, nāmhākaṃ na kappatī’’ti kukkuccapakatā pavārenti. Tehi pavāriyamāne athaññe āvāsikā bhikkhū āgacchanti samasamā. Pavāritā suppavāritā, avasesehi pavāretabbaṃ. Pavāritānaṃ āpatti dukkaṭassa.
ឥធ បន, ភិក្ខវេ, អញ្ញរស្មិំ អាវាសេ តទហុ បវារណាយ សម្ពហុលា អាវាសិកា ភិក្ខូ សន្និបតន្តិ, បញ្ច វា អតិរេកា វា។ តេ ជានន្តិ ‘‘អត្ថញ្ញេ អាវាសិកា ភិក្ខូ អនាគតា’’តិ។ តេ ‘‘កប្បតេវ អម្ហាកំ បវារេតុំ, នាម្ហាកំ ន កប្បតី’’តិ កុក្កុច្ចបកតា បវារេន្តិ។ តេហិ បវារិយមានេ អថញ្ញេ អាវាសិកា ភិក្ខូ អាគច្ឆន្តិ ថោកតរា។ បវារិតា សុប្បវារិតា, អវសេសេហិ 1 បវារេតព្ពំ។ បវារិតានំ អាបត្តិ ទុក្កដស្ស។
Idha pana, bhikkhave, aññarasmiṃ āvāse tadahu pavāraṇāya sambahulā āvāsikā bhikkhū sannipatanti, pañca vā atirekā vā. Te jānanti ‘‘atthaññe āvāsikā bhikkhū anāgatā’’ti. Te ‘‘kappateva amhākaṃ pavāretuṃ, nāmhākaṃ na kappatī’’ti kukkuccapakatā pavārenti. Tehi pavāriyamāne athaññe āvāsikā bhikkhū āgacchanti thokatarā. Pavāritā suppavāritā, avasesehi 2 pavāretabbaṃ. Pavāritānaṃ āpatti dukkaṭassa.
ឥធ បន, ភិក្ខវេ, អញ្ញតរស្មិំ អាវាសេ តទហុ បវារណាយ សម្ពហុលា អាវាសិកា ភិក្ខូ សន្និបតន្តិ, បញ្ច វា អតិរេកា វា។ តេ ជានន្តិ ‘‘អត្ថញ្ញេ អាវាសិកា ភិក្ខូ អនាគតា’’តិ។ តេ ‘‘កប្បតេវ អម្ហាកំ បវារេតុំ, នាម្ហាកំ ន កប្បតី’’តិ កុក្កុច្ចបកតា បវារេន្តិ។ តេហិ បវារិតមត្តេ,…បេ.… អវុដ្ឋិតាយ បរិសាយ…បេ.… ឯកច្ចាយ វុដ្ឋិតាយ បរិសាយ…បេ.… សព្ពាយ វុដ្ឋិតាយ បរិសាយ, អថញ្ញេ អាវាសិកា ភិក្ខូ អាគច្ឆន្តិ ពហុតរា…បេ.… សមសមា…បេ.… ថោកតរា។ បវារិតា សុប្បវារិតា, តេសំ សន្តិកេ បវារេតព្ពំ។ បវារិតានំ អាបត្តិ ទុក្កដស្ស។
Idha pana, bhikkhave, aññatarasmiṃ āvāse tadahu pavāraṇāya sambahulā āvāsikā bhikkhū sannipatanti, pañca vā atirekā vā. Te jānanti ‘‘atthaññe āvāsikā bhikkhū anāgatā’’ti. Te ‘‘kappateva amhākaṃ pavāretuṃ, nāmhākaṃ na kappatī’’ti kukkuccapakatā pavārenti. Tehi pavāritamatte,…pe… avuṭṭhitāya parisāya…pe… ekaccāya vuṭṭhitāya parisāya…pe… sabbāya vuṭṭhitāya parisāya, athaññe āvāsikā bhikkhū āgacchanti bahutarā…pe… samasamā…pe… thokatarā. Pavāritā suppavāritā, tesaṃ santike pavāretabbaṃ. Pavāritānaṃ āpatti dukkaṭassa.
កុក្កុច្ចបកតបន្នរសកំ និដ្ឋិតំ។
Kukkuccapakatapannarasakaṃ niṭṭhitaṃ.
Footnotes:
