| Library / Tipiṭaka / ཏིཔིཊཀ • Tipiṭaka / སཾཡུཏྟནིཀཱཡ (ཊཱིཀཱ) • Saṃyuttanikāya (ṭīkā) |
༣. ཀིསཱགོཏམཱིསུཏྟཝཎྞནཱ
3. Kisāgotamīsuttavaṇṇanā
༡༦༤. ‘‘ཀིསཱགོཏམཱི’’ཏི ཨེཏྠ ཀཱ པནཱཡཾ ཀིསཱགོཏམཱི, ཀིསྶ ཨཡཾ བྷིཀྑུནཱི ཧུཏྭཱ སམཎདྷམྨཾ མཏྠཀཾ པཱཔེསཱིཏི ཏམཏྠཾ ཝིབྷཱཝེཏུཾ ‘‘པུབྦེ ཀིརཱ’’ཏིཨཱདིམཱརདྡྷཾ། ཨངྒཱརཱཝཱཏི ཨདྡཱརིཊྛཀཝཎྞཨངྒཱརཱ ཨེཝ ཛཱཏཱ། དཱརུསཱཀནྟི ཨདྡྷམཱསཀེན དཱརུཾ སཱཀཉྩ ཨཱཧརིསྶཱམཱིཏི ཨནྟརཱཔཎེ ཨནྟརཝཱིཐིཾ གཏཱ།
164. ‘‘Kisāgotamī’’ti ettha kā panāyaṃ kisāgotamī, kissa ayaṃ bhikkhunī hutvā samaṇadhammaṃ matthakaṃ pāpesīti tamatthaṃ vibhāvetuṃ ‘‘pubbe kirā’’tiādimāraddhaṃ. Aṅgārāvāti addāriṭṭhakavaṇṇaaṅgārā eva jātā. Dārusākanti addhamāsakena dāruṃ sākañca āharissāmīti antarāpaṇe antaravīthiṃ gatā.
སིདྡྷཏྠཀནྟི སཱསཔཾ། སཱལཱཡནྟི ཨནཱཐསཱལཱཡཾ། ཁུརགྒེཡེཝཱཏི ཁུརསིཁེ ཨེཝ, ཀེསོརོཧནཀྑཎེ ཨེཝཱཏི ཨཏྠོ།
Siddhatthakanti sāsapaṃ. Sālāyanti anāthasālāyaṃ. Khuraggeyevāti khurasikhe eva, kesorohanakkhaṇe evāti attho.
ཨེཀམཱསཱིཏི ཨེཏྠ མ-ཀཱརོ པདསནྡྷིཀརོ། སཾཧིཏཱཝསེན ཙ པུརིམཔདེ ཝཱ རསྶཏྟཾ། པརཔདེ ཝཱ དཱིགྷཏྟནྟི ཨཱཧ ‘‘ཨེཀཱ ཨཱསཱི’’ཏི། བྷཱཝནཔུཾསཀམེཏཾ ‘‘ཨེཀམནྟཾ ནིསཱིདཱི’’ཏིཨཱདཱིསུ ཝིཡ། པུཏྟམརཎཾ ཨནྟཾ ཨཏཱིཏཾ ཨིདཱནི པུཏྟམརཎསྶ ཨབྷཱཝཏོ། ཏེནེཝཱཧ ‘‘པུཏྟམརཎཾ ནཱམ ནཏྠཱི’’ཏི། པུརིསཾ གཝེསིཏུནྟི ཡཐཱ མཡ྄ཧཾ པུརིསགཝེསནཱ ནཱམ སབྦསོ ནཏྠི, ཏཐཱ ཨེཝ པུཏྟགཝེསནཱཔི ནཏྠི, ཏསྨཱ མེ པུཏྟམརཎཾ ཨེཏདནྟཾ, སབྦེསུ ཁནྡྷཱདཱིསུ བྷཝཱདཱིསུ ཙ ཏཎྷཱནནྡིཡཱ ཨབྷཱཝཀཐནེན སབྦསཏྟེསུ ཏཎྷཱ སབྦསོ ཝིསོསིཏཱ, ཏསྶཱཡེཝ ཀཱརཀཨཝིཛྫཱཀྑནྡྷོ པདཱལིཏོཏི ཨཏྟནོ ནིཀྐིལེསཏཾ པཝེདེནྟཱི ཐེརཱི སཱིཧནཱདཾ ནདཱིཏི།
Ekamāsīti ettha ma-kāro padasandhikaro. Saṃhitāvasena ca purimapade vā rassattaṃ. Parapade vā dīghattanti āha ‘‘ekā āsī’’ti. Bhāvanapuṃsakametaṃ ‘‘ekamantaṃ nisīdī’’tiādīsu viya. Puttamaraṇaṃ antaṃ atītaṃ idāni puttamaraṇassa abhāvato. Tenevāha ‘‘puttamaraṇaṃ nāma natthī’’ti. Purisaṃ gavesitunti yathā mayhaṃ purisagavesanā nāma sabbaso natthi, tathā eva puttagavesanāpi natthi, tasmā me puttamaraṇaṃ etadantaṃ, sabbesu khandhādīsu bhavādīsu ca taṇhānandiyā abhāvakathanena sabbasattesu taṇhā sabbaso visositā, tassāyeva kārakaavijjākkhandho padālitoti attano nikkilesataṃ pavedentī therī sīhanādaṃ nadīti.
ཀིསཱགོཏམཱིསུཏྟཝཎྞནཱ ནིཊྛིཏཱ།
Kisāgotamīsuttavaṇṇanā niṭṭhitā.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / སཾཡུཏྟནིཀཱཡ • Saṃyuttanikāya / ༣. ཀིསཱགོཏམཱིསུཏྟཾ • 3. Kisāgotamīsuttaṃ
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / སཾཡུཏྟནིཀཱཡ (ཨཊྛཀཐཱ) • Saṃyuttanikāya (aṭṭhakathā) / ༣. ཀིསཱགོཏམཱིསུཏྟཝཎྞནཱ • 3. Kisāgotamīsuttavaṇṇanā
