| Library / Tipiṭaka / তিপিটক • Tipiṭaka / সংযুত্তনিকায (টীকা) • Saṃyuttanikāya (ṭīkā) |
৩. কিসাগোতমীসুত্তৰণ্ণনা
3. Kisāgotamīsuttavaṇṇanā
১৬৪. ‘‘কিসাগোতমী’’তি এত্থ কা পনাযং কিসাগোতমী, কিস্স অযং ভিক্খুনী হুত্ৰা সমণধম্মং মত্থকং পাপেসীতি তমত্থং ৰিভাৰেতুং ‘‘পুব্বে কিরা’’তিআদিমারদ্ধং। অঙ্গারাৰাতি অদ্দারিট্ঠকৰণ্ণঅঙ্গারা এৰ জাতা। দারুসাকন্তি অদ্ধমাসকেন দারুং সাকঞ্চ আহরিস্সামীতি অন্তরাপণে অন্তরৰীথিং গতা।
164. ‘‘Kisāgotamī’’ti ettha kā panāyaṃ kisāgotamī, kissa ayaṃ bhikkhunī hutvā samaṇadhammaṃ matthakaṃ pāpesīti tamatthaṃ vibhāvetuṃ ‘‘pubbe kirā’’tiādimāraddhaṃ. Aṅgārāvāti addāriṭṭhakavaṇṇaaṅgārā eva jātā. Dārusākanti addhamāsakena dāruṃ sākañca āharissāmīti antarāpaṇe antaravīthiṃ gatā.
সিদ্ধত্থকন্তি সাসপং। সালাযন্তি অনাথসালাযং। খুরগ্গেযেৰাতি খুরসিখে এৰ, কেসোরোহনক্খণে এৰাতি অত্থো।
Siddhatthakanti sāsapaṃ. Sālāyanti anāthasālāyaṃ. Khuraggeyevāti khurasikhe eva, kesorohanakkhaṇe evāti attho.
একমাসীতি এত্থ ম-কারো পদসন্ধিকরো। সংহিতাৰসেন চ পুরিমপদে ৰা রস্সত্তং। পরপদে ৰা দীঘত্তন্তি আহ ‘‘একা আসী’’তি। ভাৰনপুংসকমেতং ‘‘একমন্তং নিসীদী’’তিআদীসু ৰিয। পুত্তমরণং অন্তং অতীতং ইদানি পুত্তমরণস্স অভাৰতো। তেনেৰাহ ‘‘পুত্তমরণং নাম নত্থী’’তি। পুরিসং গৰেসিতুন্তি যথা ময্হং পুরিসগৰেসনা নাম সব্বসো নত্থি, তথা এৰ পুত্তগৰেসনাপি নত্থি, তস্মা মে পুত্তমরণং এতদন্তং, সব্বেসু খন্ধাদীসু ভৰাদীসু চ তণ্হানন্দিযা অভাৰকথনেন সব্বসত্তেসু তণ্হা সব্বসো ৰিসোসিতা, তস্সাযেৰ কারকঅৰিজ্জাক্খন্ধো পদালিতোতি অত্তনো নিক্কিলেসতং পৰেদেন্তী থেরী সীহনাদং নদীতি।
Ekamāsīti ettha ma-kāro padasandhikaro. Saṃhitāvasena ca purimapade vā rassattaṃ. Parapade vā dīghattanti āha ‘‘ekā āsī’’ti. Bhāvanapuṃsakametaṃ ‘‘ekamantaṃ nisīdī’’tiādīsu viya. Puttamaraṇaṃ antaṃ atītaṃ idāni puttamaraṇassa abhāvato. Tenevāha ‘‘puttamaraṇaṃ nāma natthī’’ti. Purisaṃ gavesitunti yathā mayhaṃ purisagavesanā nāma sabbaso natthi, tathā eva puttagavesanāpi natthi, tasmā me puttamaraṇaṃ etadantaṃ, sabbesu khandhādīsu bhavādīsu ca taṇhānandiyā abhāvakathanena sabbasattesu taṇhā sabbaso visositā, tassāyeva kārakaavijjākkhandho padālitoti attano nikkilesataṃ pavedentī therī sīhanādaṃ nadīti.
কিসাগোতমীসুত্তৰণ্ণনা নিট্ঠিতা।
Kisāgotamīsuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ৩. কিসাগোতমীসুত্তং • 3. Kisāgotamīsuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৩. কিসাগোতমীসুত্তৰণ্ণনা • 3. Kisāgotamīsuttavaṇṇanā
