| Library / Tipiṭaka / តិបិដក • Tipiṭaka / កថាវត្ថុបាឡិ • Kathāvatthupāḷi |
១៩. ឯកូនវីសតិមវគ្គោ
19. Ekūnavīsatimavaggo
(១៨៦) ១. កិលេសជហនកថា
(186) 1. Kilesajahanakathā
៨២៨. អតីតេ កិលេសេ ជហតីតិ? អាមន្តា។ និរុទ្ធំ និរោធេតិ, វិគតំ វិគមេតិ, ខីណំ ខេបេតិ, អត្ថង្គតំ អត្ថង្គមេតិ, អព្ភត្ថង្គតំ អព្ភត្ថង្គមេតីតិ? ន ហេវំ វត្តព្ពេ…បេ.… អតីតេ កិលេសេ ជហតីតិ? អាមន្តា។ ននុ អតីតំ និរុទ្ធន្តិ? អាមន្តា។ ហញ្ចិ អតីតំ និរុទ្ធំ , នោ ច វត រេ វត្តព្ពេ – ‘‘អតីតេ កិលេសេ ជហតី’’តិ។ អតីតេ កិលេសេ ជហតីតិ? អាមន្តា។ ននុ អតីតំ នត្ថីតិ? អាមន្តា។ ហញ្ចិ អតីតំ នត្ថិ, នោ ច វត រេ វត្តព្ពេ – ‘‘អតីតេ កិលេសេ ជហតី’’តិ។
828. Atīte kilese jahatīti? Āmantā. Niruddhaṃ nirodheti, vigataṃ vigameti, khīṇaṃ khepeti, atthaṅgataṃ atthaṅgameti, abbhatthaṅgataṃ abbhatthaṅgametīti? Na hevaṃ vattabbe…pe… atīte kilese jahatīti? Āmantā. Nanu atītaṃ niruddhanti? Āmantā. Hañci atītaṃ niruddhaṃ , no ca vata re vattabbe – ‘‘atīte kilese jahatī’’ti. Atīte kilese jahatīti? Āmantā. Nanu atītaṃ natthīti? Āmantā. Hañci atītaṃ natthi, no ca vata re vattabbe – ‘‘atīte kilese jahatī’’ti.
៨២៩. អនាគតេ កិលេសេ ជហតីតិ? អាមន្តា។ អជាតំ អជនេតិ, អសញ្ជាតំ អសញ្ជនេតិ, អនិព្ពត្តំ អនិព្ពត្តេតិ, អបាតុភូតំ អបាតុភាវេតីតិ? ន ហេវំ វត្តព្ពេ…បេ.… អនាគតេ កិលេសេ ជហតីតិ? អាមន្តា។ ននុ អនាគតំ អជាតន្តិ? អាមន្តា។ ហញ្ចិ អនាគតំ អជាតំ, នោ ច វត រេ វត្តព្ពេ – ‘‘អនាគតេ កិលេសេ ជហតី’’តិ ។ អនាគតេ កិលេសេ ជហតីតិ? អាមន្តា។ ននុ អនាគតំ នត្ថីតិ? អាមន្តា។ ហញ្ចិ អនាគតំ នត្ថិ, នោ ច វត រេ វត្តព្ពេ – ‘‘អនាគតេ កិលេសេ ជហតី’’តិ។
829. Anāgate kilese jahatīti? Āmantā. Ajātaṃ ajaneti, asañjātaṃ asañjaneti, anibbattaṃ anibbatteti, apātubhūtaṃ apātubhāvetīti? Na hevaṃ vattabbe…pe… anāgate kilese jahatīti? Āmantā. Nanu anāgataṃ ajātanti? Āmantā. Hañci anāgataṃ ajātaṃ, no ca vata re vattabbe – ‘‘anāgate kilese jahatī’’ti . Anāgate kilese jahatīti? Āmantā. Nanu anāgataṃ natthīti? Āmantā. Hañci anāgataṃ natthi, no ca vata re vattabbe – ‘‘anāgate kilese jahatī’’ti.
៨៣០. បច្ចុប្បន្នេ កិលេសេ ជហតីតិ? អាមន្តា។ រត្តោ រាគំ ជហតិ, ទុដ្ឋោ ទោសំ ជហតិ, មូឡ្ហោ មោហំ ជហតិ, កិលិដ្ឋោ កិលេសេ ជហតីតិ? ន ហេវំ វត្តព្ពេ…បេ.… រាគេន រាគំ ជហតិ, ទោសេន ទោសំ ជហតិ, មោហេន មោហំ ជហតិ, កិលេសេហិ កិលេសេ ជហតីតិ? ន ហេវំ វត្តព្ពេ…បេ.…។
830. Paccuppanne kilese jahatīti? Āmantā. Ratto rāgaṃ jahati, duṭṭho dosaṃ jahati, mūḷho mohaṃ jahati, kiliṭṭho kilese jahatīti? Na hevaṃ vattabbe…pe… rāgena rāgaṃ jahati, dosena dosaṃ jahati, mohena mohaṃ jahati, kilesehi kilese jahatīti? Na hevaṃ vattabbe…pe….
រាគោ ចិត្តសម្បយុត្តោ, មគ្គោ ចិត្តសម្បយុត្តោតិ? អាមន្តា។ ទ្វិន្នំ ចិត្តានំ សមោធានំ ហោតីតិ? ន ហេវំ វត្តព្ពេ…បេ.…។
Rāgo cittasampayutto, maggo cittasampayuttoti? Āmantā. Dvinnaṃ cittānaṃ samodhānaṃ hotīti? Na hevaṃ vattabbe…pe….
រាគោ អកុសលោ, មគ្គោ កុសលោតិ? អាមន្តា។ កុសលាកុសលា សាវជ្ជានវជ្ជា ហីនបណីតា កណ្ហសុក្កសប្បដិភាគា ធម្មា សម្មុខីភាវំ អាគច្ឆន្តីតិ? ន ហេវំ វត្តព្ពេ…បេ.…។
Rāgo akusalo, maggo kusaloti? Āmantā. Kusalākusalā sāvajjānavajjā hīnapaṇītā kaṇhasukkasappaṭibhāgā dhammā sammukhībhāvaṃ āgacchantīti? Na hevaṃ vattabbe…pe….
កុសលាកុសលា សាវជ្ជានវជ្ជា ហីនបណីតា កណ្ហសុក្កសប្បដិភាគា ធម្មា សម្មុខីភាវំ អាគច្ឆន្តីតិ? អាមន្តា។ ននុ វុត្តំ ភគវតា – ‘‘ចត្តារិមានិ, ភិក្ខវេ, សុវិទូរវិទូរានិ! កតមានិ ចត្តារិ? នភញ្ច, ភិក្ខវេ, បថវី ច – ឥទំ បឋមំ សុវិទូរវិទូរំ…បេ.… តស្មា សតំ ធម្មោ អសព្ភិ អារកា’’តិ។ អត្ថេវ សុត្តន្តោតិ? អាមន្តា។ តេន ហិ ន វត្តព្ពំ – ‘‘កុសលាកុសលា…បេ.… សម្មុខីភាវំ អាគច្ឆន្តី’’តិ។
Kusalākusalā sāvajjānavajjā hīnapaṇītā kaṇhasukkasappaṭibhāgā dhammā sammukhībhāvaṃ āgacchantīti? Āmantā. Nanu vuttaṃ bhagavatā – ‘‘cattārimāni, bhikkhave, suvidūravidūrāni! Katamāni cattāri? Nabhañca, bhikkhave, pathavī ca – idaṃ paṭhamaṃ suvidūravidūraṃ…pe… tasmā sataṃ dhammo asabbhi ārakā’’ti. Attheva suttantoti? Āmantā. Tena hi na vattabbaṃ – ‘‘kusalākusalā…pe… sammukhībhāvaṃ āgacchantī’’ti.
៨៣១. ន វត្តព្ពំ – ‘‘អតីតេ កិលេសេ ជហតិ, អនាគតេ កិលេសេ ជហតិ, បច្ចុប្បន្នេ កិលេសេ ជហតី’’តិ? អាមន្តា។ នត្ថិ កិលេសេ ជហតីតិ ? ន ហេវំ វត្តព្ពេ…បេ.… តេន ហិ អតីតេ កិលេសេ ជហតិ, អនាគតេ កិលេសេ ជហតិ, បច្ចុប្បន្នេ កិលេសេ ជហតីតិ។
831. Na vattabbaṃ – ‘‘atīte kilese jahati, anāgate kilese jahati, paccuppanne kilese jahatī’’ti? Āmantā. Natthi kilese jahatīti ? Na hevaṃ vattabbe…pe… tena hi atīte kilese jahati, anāgate kilese jahati, paccuppanne kilese jahatīti.
កិលេសជហនកថា និដ្ឋិតា។
Kilesajahanakathā niṭṭhitā.
Related texts:
អដ្ឋកថា • Aṭṭhakathā / អភិធម្មបិដក (អដ្ឋកថា) • Abhidhammapiṭaka (aṭṭhakathā) / បញ្ចបករណ-អដ្ឋកថា • Pañcapakaraṇa-aṭṭhakathā / ១. កិលេសបជហនកថាវណ្ណនា • 1. Kilesapajahanakathāvaṇṇanā
ដីកា • Tīkā / អភិធម្មបិដក (ដីកា) • Abhidhammapiṭaka (ṭīkā) / បញ្ចបករណ-មូលដីកា • Pañcapakaraṇa-mūlaṭīkā / ១. កិលេសបជហនកថាវណ្ណនា • 1. Kilesapajahanakathāvaṇṇanā
ដីកា • Tīkā / អភិធម្មបិដក (ដីកា) • Abhidhammapiṭaka (ṭīkā) / បញ្ចបករណ-អនុដីកា • Pañcapakaraṇa-anuṭīkā / ១. កិលេសបជហនកថាវណ្ណនា • 1. Kilesapajahanakathāvaṇṇanā
