Only Dharma. Since 1992
Library / Tipiṭaka / তিপিটক • Tipiṭaka / অঙ্গুত্তরনিকায • Aṅguttaranikāya

৩. খেত্তসুত্তং

3. Khettasuttaṃ

৮৪. ‘‘তীণিমানি, ভিক্খৰে, কস্সকস্স গহপতিস্স পুব্বে করণীযানি। কতমানি তীণি? ইধ, ভিক্খৰে, কস্সকো গহপতি পটিকচ্চেৰ 1 খেত্তং সুকট্ঠং করোতি সুমতিকতং 2। পটিকচ্চেৰ খেত্তং সুকট্ঠং করিত্ৰা সুমতিকতং কালেন বীজানি পতিট্ঠাপেতি। কালেন বীজানি পতিট্ঠাপেত্ৰা সমযেন উদকং অভিনেতিপি অপনেতিপি। ইমানি খো, ভিক্খৰে, তীণি কস্সকস্স গহপতিস্স পুব্বে করণীযানি।

84. ‘‘Tīṇimāni, bhikkhave, kassakassa gahapatissa pubbe karaṇīyāni. Katamāni tīṇi? Idha, bhikkhave, kassako gahapati paṭikacceva 3 khettaṃ sukaṭṭhaṃ karoti sumatikataṃ 4. Paṭikacceva khettaṃ sukaṭṭhaṃ karitvā sumatikataṃ kālena bījāni patiṭṭhāpeti. Kālena bījāni patiṭṭhāpetvā samayena udakaṃ abhinetipi apanetipi. Imāni kho, bhikkhave, tīṇi kassakassa gahapatissa pubbe karaṇīyāni.

‘‘এৰমেৰং খো, ভিক্খৰে, তীণিমানি ভিক্খুস্স পুব্বে করণীযানি। কতমানি তীণি? অধিসীলসিক্খাসমাদানং, অধিচিত্তসিক্খাসমাদানং, অধিপঞ্ঞাসিক্খাসমাদানং – ইমানি খো, ভিক্খৰে, তীণি ভিক্খুস্স পুব্বে করণীযানি।

‘‘Evamevaṃ kho, bhikkhave, tīṇimāni bhikkhussa pubbe karaṇīyāni. Katamāni tīṇi? Adhisīlasikkhāsamādānaṃ, adhicittasikkhāsamādānaṃ, adhipaññāsikkhāsamādānaṃ – imāni kho, bhikkhave, tīṇi bhikkhussa pubbe karaṇīyāni.

‘‘তস্মাতিহ, ভিক্খৰে, এৰং সিক্খিতব্বং – ‘তিব্বো নো ছন্দো ভৰিস্সতি অধিসীলসিক্খাসমাদানে, তিব্বো নো ছন্দো ভৰিস্সতি অধিচিত্তসিক্খাসমাদানে, তিব্বো নো ছন্দো ভৰিস্সতি অধিপঞ্ঞাসিক্খাসমাদানে’তি। এৰঞ্হি ৰো, ভিক্খৰে, সিক্খিতব্ব’’ন্তি। ততিযং।

‘‘Tasmātiha, bhikkhave, evaṃ sikkhitabbaṃ – ‘tibbo no chando bhavissati adhisīlasikkhāsamādāne, tibbo no chando bhavissati adhicittasikkhāsamādāne, tibbo no chando bhavissati adhipaññāsikkhāsamādāne’ti. Evañhi vo, bhikkhave, sikkhitabba’’nti. Tatiyaṃ.




Next: ৪. ৰজ্জিপুত্তসুত্তং • 4. Vajjiputtasuttaṃ




Footnotes:
1. পটিগচ্চেৰ (সী॰ পী॰)
2. সুমত্তিকতং (ক॰), এত্থ মতিসদ্দো কট্ঠখেত্তস্স সমীকরণসাধনে দারুভণ্ডে ৰত্ততীতি সক্কতঅভিধানেসু আগতং। তং ‘‘মতিযা সুট্ঠু সমীকত’’ন্তি অট্ঠকথায সমেতি
3. paṭigacceva (sī. pī.)
4. sumattikataṃ (ka.), ettha matisaddo kaṭṭhakhettassa samīkaraṇasādhane dārubhaṇḍe vattatīti sakkataabhidhānesu āgataṃ. taṃ ‘‘matiyā suṭṭhu samīkata’’nti aṭṭhakathāya sameti



Related texts:



অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) / ৩. খেত্তসুত্তৰণ্ণনা • 3. Khettasuttavaṇṇanā

টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā) / ১-৫. সমণসুত্তাদিৰণ্ণনা • 1-5. Samaṇasuttādivaṇṇanā


© 1991-2026 Titi Tudorancea Yoga Bulletin | Titi Tudorancea® is a Registered Trademark | Terms of use and privacy policy
Contact