| Library / Tipiṭaka / တိပိဋက • Tipiṭaka / သံယုတ္တနိကာယ (ဋီကာ) • Saṃyuttanikāya (ṭīkā) |
၁၀. အဗ္ယာကတသံယုတ္တံ
10. Abyākatasaṃyuttaṃ
၁. ခေမာသုတ္တဝဏ္ဏနာ
1. Khemāsuttavaṇṇanā
၄၁၀. ဗိမ္ဗိသာရသ္သ ဥပာသိကာတိ ဗိမ္ဗိသာရသ္သ ဩရောဓဘူတာ ဥပာသိကာ။ ပဏ္ဍိစ္စံ သိက္ခိတဘာဝေန။ ဝေယ္ယတ္တိယံ ဝိသာရဒဘာဝေန။ ဝိသာရဒာ နာမ တိဟေတုကပဋိသန္ဓိသိဒ္ဓသာဘာဝိကပညာ, တာယ သမန္နာဂတာ။
410.Bimbisārassaupāsikāti bimbisārassa orodhabhūtā upāsikā. Paṇḍiccaṃ sikkhitabhāvena. Veyyattiyaṃ visāradabhāvena. Visāradā nāma tihetukapaṭisandhisiddhasābhāvikapaññā, tāya samannāgatā.
အစ္ဆိဒ္ဒကဂဏနာယ ကုသလောတိ နဝန္တဂဏနာယ ကုသလော။ အင္ဂုလိမုဒ္ဒာယ ဂဏနာယ ကုသလောတိ အင္ဂုလိကာယ ဧဝ ဂဏနာယ ကုသလော သေယ္ယထာပိ ပာဒသိကာ။ ပိဏ္ဍဂဏနာယာတိ သင္ကလနပဋုပ္ပန္နကာရိနော ပိဏ္ဍဝသေန ဂဏနာ။ တထာဂတောတိ ခီဏာသဝော, တထာဂတံ သန္ဓာယ ပုစ္ဆတီတိ ခီဏာသဝောတိ စသ္သ အရဟတ္တဖလဝသိဘာဝိတခန္ဓေ ဥပာဒာယ အယံ ပညတ္တိ ဟောတိ။ တေသု ခန္ဓေသု သတိ ခီဏာသဝာ သတ္တသင္ခာတာ ဟောန္တီတိ ဝောဟာရေန ပညပေတုံ သက္ကာ ဘဝေယ္ယ, အသန္တေသု န သက္ကာ, တသ္မာ ပရံ မရဏာတိ ဝုတ္တတ္တာ တေသံ အဘာဝာ ‘‘အဗ္ယာကတမေတ’’န္တိ ဝုတ္တံ။ ယဒိ ဧဝံ တေသံ အဘာဝတော ‘‘န ဟောတိ တထာဂတော ပရံ မရဏာ’’တိ ပုဋ္ဌာယ ‘‘အာမာ’’တိ ပဋိဇာနိတဗ္ဗာ သိယာ, တံ ပန သတ္တသင္ခာတသ္သ ပုစ္ဆိတတ္တာ န ပဋိညာတန္တိ ဒဋ္ဌဗ္ဗံ။ ယေန ရူပေနာတိ သတ္တတထာဂတေ ဝုတ္တရူပံ သဗ္ဗညုတထာဂတေ ပဋိက္ခိပိတုံ ‘‘တံ ရူပ’’န္တိအာဒိ ဝုတ္တံ။ ယံ ဥပာဒာယာတိ ယံ ခန္ဓပဉ္စကံ ဥပာဒာယ။ တဒဘာဝေနာတိ တသ္သ ခန္ဓပဉ္စကသ္သ အဘာဝေန။ တသ္သာ ပညတ္တိယာတိ သတ္တပညတ္တိယာ အဘာဝံ။ နိရုဒ္ဓံ န နိဒသ္သေတိ။
Acchiddakagaṇanāya kusaloti navantagaṇanāya kusalo. Aṅgulimuddāya gaṇanāya kusaloti aṅgulikāya eva gaṇanāya kusalo seyyathāpi pādasikā. Piṇḍagaṇanāyāti saṅkalanapaṭuppannakārino piṇḍavasena gaṇanā. Tathāgatoti khīṇāsavo, tathāgataṃ sandhāya pucchatīti khīṇāsavoti cassa arahattaphalavasibhāvitakhandhe upādāya ayaṃ paññatti hoti. Tesu khandhesu sati khīṇāsavā sattasaṅkhātā hontīti vohārena paññapetuṃ sakkā bhaveyya, asantesu na sakkā, tasmā paraṃ maraṇāti vuttattā tesaṃ abhāvā ‘‘abyākatameta’’nti vuttaṃ. Yadi evaṃ tesaṃ abhāvato ‘‘na hoti tathāgato paraṃ maraṇā’’ti puṭṭhāya ‘‘āmā’’ti paṭijānitabbā siyā, taṃ pana sattasaṅkhātassa pucchitattā na paṭiññātanti daṭṭhabbaṃ. Yena rūpenāti sattatathāgate vuttarūpaṃ sabbaññutathāgate paṭikkhipituṃ ‘‘taṃ rūpa’’ntiādi vuttaṃ. Yaṃ upādāyāti yaṃ khandhapañcakaṃ upādāya. Tadabhāvenāti tassa khandhapañcakassa abhāvena. Tassā paññattiyāti sattapaññattiyā abhāvaṃ. Niruddhaṃ na nidasseti.
ခေမာယ ထေရိယာ ဝုတ္တံ ပဌမံ သုတ္တံ ဘဂဝတော သေဋ္ဌတ္ထဒီပနတော အဂ္ဂပဒာဝစရံဝ ဟောတီတိ ဝုတ္တံ ‘‘အဂ္ဂပဒသ္မိ’’န္တိ။
Khemāya theriyā vuttaṃ paṭhamaṃ suttaṃ bhagavato seṭṭhatthadīpanato aggapadāvacaraṃva hotīti vuttaṃ ‘‘aggapadasmi’’nti.
ခေမာသုတ္တဝဏ္ဏနာ နိဋ္ဌိတာ။
Khemāsuttavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၁. ခေမာသုတ္တံ • 1. Khemāsuttaṃ
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၁. ခေမာသုတ္တဝဏ္ဏနာ • 1. Khemāsuttavaṇṇanā
