| Library / Tipiṭaka / တိပိဋက • Tipiṭaka / သံယုတ္တနိကာယ (ဋီကာ) • Saṃyuttanikāya (ṭīkā) |
၇. ခေမကသုတ္တဝဏ္ဏနာ
7. Khemakasuttavaṇṇanā
၈၉. အတ္တနိယန္တိ ဒိဋ္ဌိဂတိကပရိကပ္ပိတသ္သ အတ္တနော သန္တကံ။ တေနာဟ ‘‘အတ္တနော ပရိက္ခာရဇာတ’’န္တိ။ တဏ္ဟာမာနော အဓိဂတော အရဟတ္တသ္သ အနဓိဂတတ္တာ, နော ဒိဋ္ဌိမာနော အဓိဂတော, တထာ ကာမရာဂဗ္ယာပာဒာပိ။ အနာဂာမီ ကိရ ခေမကတ္ထေရော, ‘‘သကဒာဂာမီ’’တိ ကေစိ ဝဒန္တိ။ သန္ဓာဝနိကာယာတိ သဉ္စရဏေန။ တေနာဟ ‘‘ပုနပ္ပုနံ ဂမနာဂမနေနာ’’တိ။ စတုက္ခတ္တုံ ဂမနာဂမနေနာတိ စတုက္ခတ္တုံ ဂမနေန စ အာဂမနေန စ။ တေနာဟ – ‘‘တံ ဒိဝသံ ဒ္ဝိယောဇနံ အဒ္ဓာနံ အာဟိဏ္ဍီ’’တိ။ ဉတ္ဝာတိ အဇ္ဈာသယံ ဉတ္ဝာ။ ထေရောတိ ခေမကတ္ထေရော။
89.Attaniyanti diṭṭhigatikaparikappitassa attano santakaṃ. Tenāha ‘‘attano parikkhārajāta’’nti. Taṇhāmāno adhigato arahattassa anadhigatattā, no diṭṭhimāno adhigato, tathā kāmarāgabyāpādāpi. Anāgāmī kira khemakatthero, ‘‘sakadāgāmī’’ti keci vadanti. Sandhāvanikāyāti sañcaraṇena. Tenāha ‘‘punappunaṃ gamanāgamanenā’’ti. Catukkhattuṃ gamanāgamanenāti catukkhattuṃ gamanena ca āgamanena ca. Tenāha – ‘‘taṃ divasaṃ dviyojanaṃ addhānaṃ āhiṇḍī’’ti. Ñatvāti ajjhāsayaṃ ñatvā. Theroti khemakatthero.
ရူပမေဝ အသ္မီတိ ဝဒတီတိ ရူပက္ခန္ဓမေဝ ‘‘အသ္မီ’’တိ ဂာဟသ္သ ဝတ္ထုံ ကတ္ဝာ ဝဒတိ။ အဓိဂတော တဏ္ဟာမာနော။
Rūpameva asmīti vadatīti rūpakkhandhameva ‘‘asmī’’ti gāhassa vatthuṃ katvā vadati. Adhigato taṇhāmāno.
အဏုသဟဂတောတိ အဏုဘာဝံ ဂတော။ တေနာဟ ‘‘သုခုမော’’တိ။ တယော ခာရာ ဝိယ တိသ္သော အနုပသ္သနာ စိတ္တသံကိလေသသ္သ ဝိသောဓနတော။ သီလဂန္ဓာဒီဟိ ဂုဏဂန္ဓေဟိ။
Aṇusahagatoti aṇubhāvaṃ gato. Tenāha ‘‘sukhumo’’ti. Tayo khārā viya tisso anupassanā cittasaṃkilesassa visodhanato. Sīlagandhādīhi guṇagandhehi.
ကထေတုန္တိ ဥဒ္ဒေသဝသေန ကထေတုံ။ ပကာသေတုန္တိ နိဒ္ဒေသဝသေန တမတ္ထံ ပကာသေတုံ။ ဇာနာပေတုန္တိ ကာရဏဝသေန ဇာနာပေတုံ။ ပတိဋ္ဌာပေတုန္တိ ကထာပေတုံ။ ဝိဝဋံ ကာတုန္တိ ဥဒာဟရဏံ ဝဏ္ဏေတ္ဝာ ပာကဋံ ကာတုံ ။ သုဝိဘတ္တံ ကာတုန္တိ အန္ဝယတော ဗ္ယတိရေကတော သုဋ္ဌု, ဝိဘတ္တံ ကာတုံ။ ဥတ္တာနကံ ကာတုန္တိ ဥပနယနိဂမေဟိ တမတ္ထံ ဝိဘူတံ ကာတုံ။ အညေန နီဟာရေနာတိ ဝိပသ္သနာဝိမုတ္တေန စိတ္တာဘိနီဟာရေန။
Kathetunti uddesavasena kathetuṃ. Pakāsetunti niddesavasena tamatthaṃ pakāsetuṃ. Jānāpetunti kāraṇavasena jānāpetuṃ. Patiṭṭhāpetunti kathāpetuṃ. Vivaṭaṃ kātunti udāharaṇaṃ vaṇṇetvā pākaṭaṃ kātuṃ . Suvibhattaṃ kātunti anvayato byatirekato suṭṭhu, vibhattaṃ kātuṃ. Uttānakaṃ kātunti upanayanigamehi tamatthaṃ vibhūtaṃ kātuṃ. Aññena nīhārenāti vipassanāvimuttena cittābhinīhārena.
ခေမကသုတ္တဝဏ္ဏနာ နိဋ္ဌိတာ။
Khemakasuttavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၇. ခေမကသုတ္တံ • 7. Khemakasuttaṃ
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၇. ခေမကသုတ္တဝဏ္ဏနာ • 7. Khemakasuttavaṇṇanā
