2. Kharaputtavaggo

386. Kharaputtajātakaṃ (6-2-1)

76.

Saccaṃ kirevamāhaṃsu, vastaṃ ² bāloti paṇḍitā;

Passa bālo rahokammaṃ, āvikubbaṃ na bujjhati.

77.

Tvaṃ khopi ⁴ samma bālosi, kharaputta vijānahi;

Rajjuyā hi ⁶ parikkhitto, vaṅkoṭṭho ohitomukho.

78.

Aparampi samma te bālyaṃ ⁸, yo mutto na palāyasi;

So ca bālataro samma, yaṃ tvaṃ vahasi senakaṃ.

79.

Yaṃ nu samma ahaṃ bālo, ajarāja vijānahi;

Atha kena senako bālo, taṃ me akkhāhi pucchito.

80.

Uttamatthaṃ labhitvāna, bhariyāya yo padassati ¹⁰;

Tena jahissatattānaṃ, sā cevassa na hessati.

81.

Na ve piyammeti ¹³ janinda tādiso, attaṃ niraṃkatvā piyāni sevati ¹⁴;

Attāva seyyo paramā ca seyyo, labbhā piyā ocitatthena pacchāti.

Kharaputtajātakaṃ paṭhamaṃ.