| Library / Tipiṭaka / តិបិដក • Tipiṭaka / បដិសម្ភិទាមគ្គបាឡិ • Paṭisambhidāmaggapāḷi |
៦. ខន្ធាទិវារោ
6. Khandhādivāro
៣៥. ‘‘‘យាវតា ខន្ធានំ ខន្ធដ្ឋោ, ញាតោ ទិដ្ឋោ វិទិតោ សច្ឆិកតោ ផស្សិតោ បញ្ញាយ។ អផស្សិតោ បញ្ញាយ ខន្ធដ្ឋោ នត្ថី’តិ – ចក្ខុំ ឧទបាទិ, ញាណំ ឧទបាទិ, បញ្ញា ឧទបាទិ, វិជ្ជា ឧទបាទិ, អាលោកោ ឧទបាទិ’’។ ខន្ធានំ ខន្ធដ្ឋេ បញ្ចវីសតិ ធម្មា, បញ្ចវីសតិ អត្ថា, បញ្ញាស និរុត្តិយោ, សតំ ញាណានិ។
35. ‘‘‘Yāvatā khandhānaṃ khandhaṭṭho, ñāto diṭṭho vidito sacchikato phassito paññāya. Aphassito paññāya khandhaṭṭho natthī’ti – cakkhuṃ udapādi, ñāṇaṃ udapādi, paññā udapādi, vijjā udapādi, āloko udapādi’’. Khandhānaṃ khandhaṭṭhe pañcavīsati dhammā, pañcavīsati atthā, paññāsa niruttiyo, sataṃ ñāṇāni.
‘‘‘យាវតា ធាតូនំ ធាតុដ្ឋោ…បេ.… យាវតា អាយតនានំ អាយតនដ្ឋោ…បេ.… យាវតា សង្ខតានំ សង្ខតដ្ឋោ…បេ.… យាវតា អសង្ខតស្ស អសង្ខតដ្ឋោ ញាតោ ទិដ្ឋោ វិទិតោ សច្ឆិកតោ ផស្សិតោ បញ្ញាយ។ អផស្សិតោ បញ្ញាយ អសង្ខតដ្ឋោ នត្ថី’តិ – ចក្ខុំ ឧទបាទិ…បេ.… អាលោកោ ឧទបាទិ’’។ អសង្ខតស្ស អសង្ខតដ្ឋេ បញ្ចវីសតិ ធម្មា, បញ្ចវីសតិ អត្ថា, បញ្ញាស និរុត្តិយោ, សតំ ញាណានិ។
‘‘‘Yāvatā dhātūnaṃ dhātuṭṭho…pe… yāvatā āyatanānaṃ āyatanaṭṭho…pe… yāvatā saṅkhatānaṃ saṅkhataṭṭho…pe… yāvatā asaṅkhatassa asaṅkhataṭṭho ñāto diṭṭho vidito sacchikato phassito paññāya. Aphassito paññāya asaṅkhataṭṭho natthī’ti – cakkhuṃ udapādi…pe… āloko udapādi’’. Asaṅkhatassa asaṅkhataṭṭhe pañcavīsati dhammā, pañcavīsati atthā, paññāsa niruttiyo, sataṃ ñāṇāni.
ខន្ធានំ ខន្ធដ្ឋេ, ធាតូនំ ធាតុដ្ឋេ, អាយតនានំ អាយតនដ្ឋេ សង្ខតានំ សង្ខតដ្ឋេ, អសង្ខតស្ស អសង្ខតដ្ឋេ បញ្ចវីសតិសតំ ធម្មា, បញ្ចវីសតិសតំ អត្ថា, អឌ្ឍតេយ្យានិ និរុត្តិសតានិ, បញ្ច ញាណសតានិ។
Khandhānaṃ khandhaṭṭhe, dhātūnaṃ dhātuṭṭhe, āyatanānaṃ āyatanaṭṭhe saṅkhatānaṃ saṅkhataṭṭhe, asaṅkhatassa asaṅkhataṭṭhe pañcavīsatisataṃ dhammā, pañcavīsatisataṃ atthā, aḍḍhateyyāni niruttisatāni, pañca ñāṇasatāni.
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / ខុទ្ទកនិកាយ (អដ្ឋកថា) • Khuddakanikāya (aṭṭhakathā) / បដិសម្ភិទាមគ្គ-អដ្ឋកថា • Paṭisambhidāmagga-aṭṭhakathā / ៤-៨. សត្តពោធិសត្តវារាទិវណ្ណនា • 4-8. Sattabodhisattavārādivaṇṇanā
