| Library / Tipiṭaka / ਤਿਪਿਟਕ • Tipiṭaka / ਅਪਦਾਨ-ਅਟ੍ਠਕਥਾ • Apadāna-aṭṭhakathā |
੩. ਖਜ੍ਜਕਦਾਯਕਤ੍ਥੇਰਅਪਦਾਨવਣ੍ਣਨਾ
3. Khajjakadāyakattheraapadānavaṇṇanā
ਤਿਸ੍ਸਸ੍ਸ ਖੋ ਭਗવਤੋਤਿਆਦਿਕਂ ਆਯਸ੍ਮਤੋ ਖਜ੍ਜਕਦਾਯਕਤ੍ਥੇਰਸ੍ਸ ਅਪਦਾਨਂ। ਅਯਮ੍ਪਿ ਪੁਰਿਮਜਿਨવਰੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭવੇ વਿવਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਤਿਸ੍ਸਸ੍ਸ ਭਗવਤੋ ਕਾਲੇ ਸੁਦ੍ਦਕੁਲੇ ਨਿਬ੍ਬਤ੍ਤੋ ਭਗવਨ੍ਤਂ ਦਿਸ੍વਾ ਪਸਨ੍ਨਮਾਨਸੋ ਅਮ੍ਬਜਮ੍ਬੁਆਦਿਮਨੇਕਂ ਮਧੁਰਫਲਾਫਲਂ ਨਾਲ਼ਿਕੇਰਂ ਪੂવਖਜ੍ਜਕਞ੍ਚ ਅਦਾਸਿ। ਭਗવਾ ਤਸ੍ਸ ਪਸਾਦવਡ੍ਢਨਤ੍ਥਾਯ ਪਸ੍ਸਨ੍ਤਸ੍ਸੇવ ਪਰਿਭੁਞ੍ਜਿ। ਸੋ ਤੇਨ ਪੁਞ੍ਞੇਨ ਸੁਗਤਿਸਮ੍ਪਤ੍ਤਿਯੋਯੇવ ਅਨੁਭવਿਤ੍વਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਸਾવਤ੍ਥਿਯਂ ਕੁਲਗੇਹੇ ਨਿਬ੍ਬਤ੍ਤੋ વਿਞ੍ਞੁਤਂ ਪਤ੍વਾ ਸਤ੍ਥੁ ਧਮ੍ਮਦੇਸਨਂ ਸੁਤ੍વਾ ਸਞ੍ਜਾਤਸਦ੍ਧੋ ਪਸਾਦਬਹੁਮਾਨੋ ਪਬ੍ਬਜਿਤ੍વਾ વਤ੍ਤਪਟਿਪਤ੍ਤਿਯਾ ਸਾਸਨਂ ਸੋਭੇਨ੍ਤੋ ਸੀਲਾਲਙ੍ਕਾਰਪਟਿਮਣ੍ਡਿਤੋ ਨਚਿਰਸ੍ਸੇવ ਅਰਹਤ੍ਤਂ ਪਾਪੁਣਿ।
Tissassa kho bhagavatotiādikaṃ āyasmato khajjakadāyakattherassa apadānaṃ. Ayampi purimajinavaresu katādhikāro tattha tattha bhave vivaṭṭūpanissayāni puññāni upacinanto tissassa bhagavato kāle suddakule nibbatto bhagavantaṃ disvā pasannamānaso ambajambuādimanekaṃ madhuraphalāphalaṃ nāḷikeraṃ pūvakhajjakañca adāsi. Bhagavā tassa pasādavaḍḍhanatthāya passantasseva paribhuñji. So tena puññena sugatisampattiyoyeva anubhavitvā imasmiṃ buddhuppāde sāvatthiyaṃ kulagehe nibbatto viññutaṃ patvā satthu dhammadesanaṃ sutvā sañjātasaddho pasādabahumāno pabbajitvā vattapaṭipattiyā sāsanaṃ sobhento sīlālaṅkārapaṭimaṇḍito nacirasseva arahattaṃ pāpuṇi.
੧੩. ਸੋ ਪੁਬ੍ਬਕਮ੍ਮਂ ਸਰਨ੍ਤੋ ‘‘ਪੁਬ੍ਬੇ ਮਯਾ ਸੁਖੇਤ੍ਤੇ ਕੁਸਲਂ ਕਤਂ ਸੁਨ੍ਦਰ’’ਨ੍ਤਿ ਸੋਮਨਸ੍ਸਜਾਤੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਤਿਸ੍ਸਸ੍ਸ ਖੋ ਭਗવਤੋਤਿਆਦਿਮਾਹ। ਤਤ੍ਥ ਤਿਸ੍ਸੋਪਿ ਭવਸਮ੍ਪਤ੍ਤਿਯੋ ਦਦਮਾਨੋ ਜਾਤੋਤਿ ਮਾਤਾਪਿਤੂਹਿ ਕਤਨਾਮવਸੇਨ ਤਿਸ੍ਸੋ। ਅਥ વਾ ਤੀਹਿ ਸਰਣਗਮਨੇਹਿ ਅਸ੍ਸਾਸੇਨ੍ਤੋ ਓવਦਨ੍ਤੋ ਹੇਤੁਸਮ੍ਪਨ੍ਨਪੁਗ੍ਗਲੇ ਸਗ੍ਗਮੋਕ੍ਖਦ੍વਯੇ ਪਤਿਟ੍ਠਾਪੇਨ੍ਤੋ ਬੁਦ੍ਧੋ ਜਾਤੋਤਿ ਤਿਸ੍ਸੋ। ਸਮਾਪਤ੍ਤਿਗੁਣਾਦੀਹਿ ਭਗੇਹਿ ਯੁਤ੍ਤੋਤਿ ਭਗવਾ, ਤਸ੍ਸ ਤਿਸ੍ਸਸ੍ਸ ਭਗવਤੋ ਪੁਬ੍ਬੇ ਅਹਂ ਫਲਂ ਅਦਾਸਿਨ੍ਤਿ ਸਮ੍ਬਨ੍ਧੋ। ਨਾਲ਼ਿਕੇਰਞ੍ਚ ਪਾਦਾਸਿਨ੍ਤਿ ਨਾਲ਼ਿਕਾਕਾਰੇਨ ਪવਤ੍ਤਂ ਫਲਂ ਨਾਲ਼ਿਕੇਰਂ, ਤਞ੍ਚ ਫਲਂ ਅਦਾਸਿਨ੍ਤਿ ਅਤ੍ਥੋ। ਖਜ੍ਜਕਂ ਅਭਿਸਮ੍ਮਤਨ੍ਤਿ ਖਾਦਿਤਬ੍ਬਂ ਖਜ੍ਜਕਂ ਅਭਿ વਿਸੇਸੇਨ ਮਧੁਸਕ੍ਕਰਾਦੀਹਿ ਸਮ੍ਮਿਸ੍ਸਂ ਕਤ੍વਾ ਨਿਪ੍ਫਾਦਿਤਂ ਸੁਨ੍ਦਰਂ ਮਧੁਰਨ੍ਤਿ ਸਮ੍ਮਤਂ ਞਾਤਂ ਅਭਿਸਮ੍ਮਤਂ ਖਜ੍ਜਕਞ੍ਚ ਅਦਾਸਿਨ੍ਤਿ ਅਤ੍ਥੋ। ਸੇਸਂ ਸੁવਿਞ੍ਞੇਯ੍ਯਮੇવਾਤਿ।
13. So pubbakammaṃ saranto ‘‘pubbe mayā sukhette kusalaṃ kataṃ sundara’’nti somanassajāto pubbacaritāpadānaṃ pakāsento tissassa kho bhagavatotiādimāha. Tattha tissopi bhavasampattiyo dadamāno jātoti mātāpitūhi katanāmavasena tisso. Atha vā tīhi saraṇagamanehi assāsento ovadanto hetusampannapuggale saggamokkhadvaye patiṭṭhāpento buddho jātoti tisso. Samāpattiguṇādīhi bhagehi yuttoti bhagavā, tassa tissassa bhagavato pubbe ahaṃ phalaṃ adāsinti sambandho. Nāḷikerañca pādāsinti nāḷikākārena pavattaṃ phalaṃ nāḷikeraṃ, tañca phalaṃ adāsinti attho. Khajjakaṃ abhisammatanti khāditabbaṃ khajjakaṃ abhi visesena madhusakkarādīhi sammissaṃ katvā nipphāditaṃ sundaraṃ madhuranti sammataṃ ñātaṃ abhisammataṃ khajjakañca adāsinti attho. Sesaṃ suviññeyyamevāti.
ਖਜ੍ਜਕਦਾਯਕਤ੍ਥੇਰਅਪਦਾਨવਣ੍ਣਨਾ ਸਮਤ੍ਤਾ।
Khajjakadāyakattheraapadānavaṇṇanā samattā.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਖੁਦ੍ਦਕਨਿਕਾਯ • Khuddakanikāya / ਅਪਦਾਨਪਾਲ਼ਿ • Apadānapāḷi / ੩. ਖਜ੍ਜਕਦਾਯਕਤ੍ਥੇਰਅਪਦਾਨਂ • 3. Khajjakadāyakattheraapadānaṃ
