| Library / Tipiṭaka / ཏིཔིཊཀ • Tipiṭaka / སཾཡུཏྟནིཀཱཡ • Saṃyuttanikāya |
༢. ཁདིརཔཏྟསུཏྟཾ
2. Khadirapattasuttaṃ
༡༡༠༢. ‘‘ཡོ, བྷིཀྑཝེ, ཨེཝཾ ཝདེཡྻ – ‘ཨཧཾ དུཀྑཾ ཨརིཡསཙྩཾ ཡཐཱབྷཱུཏཾ ཨནབྷིསམེཙྩ, དུཀྑསམུདཡཾ ཨརིཡསཙྩཾ ཡཐཱབྷཱུཏཾ ཨནབྷིསམེཙྩ, དུཀྑནིརོདྷཾ ཨརིཡསཙྩཾ ཡཐཱབྷཱུཏཾ ཨནབྷིསམེཙྩ, དུཀྑནིརོདྷགཱམིནིཾ པཊིཔདཾ ཨརིཡསཙྩཾ ཡཐཱབྷཱུཏཾ ཨནབྷིསམེཙྩ སམྨཱ དུཀྑསྶནྟཾ ཀརིསྶཱམཱི’ཏི – ནེཏཾ ཋཱནཾ ཝིཛྫཏི།
1102. ‘‘Yo, bhikkhave, evaṃ vadeyya – ‘ahaṃ dukkhaṃ ariyasaccaṃ yathābhūtaṃ anabhisamecca, dukkhasamudayaṃ ariyasaccaṃ yathābhūtaṃ anabhisamecca, dukkhanirodhaṃ ariyasaccaṃ yathābhūtaṃ anabhisamecca, dukkhanirodhagāminiṃ paṭipadaṃ ariyasaccaṃ yathābhūtaṃ anabhisamecca sammā dukkhassantaṃ karissāmī’ti – netaṃ ṭhānaṃ vijjati.
‘‘སེཡྻཐཱཔི , བྷིཀྑཝེ, ཡོ ཨེཝཾ ཝདེཡྻ – ‘ཨཧཾ ཁདིརཔཏྟཱནཾ ཝཱ སརལཔཏྟཱནཾ 1 ཝཱ ཨཱམལཀཔཏྟཱནཾ ཝཱ པུཊཾ ཀརིཏྭཱ ཨུདཀཾ ཝཱ ཏཱལཔཏྟཾ ཝཱ ཨཱཧརིསྶཱམཱི’ཏི – ནེཏཾ ཋཱནཾ ཝིཛྫཏི; ཨེཝམེཝ ཁོ, བྷིཀྑཝེ, ཡོ ཨེཝཾ ཝདེཡྻ – ‘ཨཧཾ དུཀྑཾ ཨརིཡསཙྩཾ ཡཐཱབྷཱུཏཾ ཨནབྷིསམེཙྩ…པེ॰… དུཀྑནིརོདྷགཱམིནིཾ པཊིཔདཾ ཨརིཡསཙྩཾ ཡཐཱབྷཱུཏཾ ཨནབྷིསམེཙྩ སམྨཱ དུཀྑསྶནྟཾ ཀརིསྶཱམཱི’ཏི – ནེཏཾ ཋཱནཾ ཝིཛྫཏི།
‘‘Seyyathāpi , bhikkhave, yo evaṃ vadeyya – ‘ahaṃ khadirapattānaṃ vā saralapattānaṃ 2 vā āmalakapattānaṃ vā puṭaṃ karitvā udakaṃ vā tālapattaṃ vā āharissāmī’ti – netaṃ ṭhānaṃ vijjati; evameva kho, bhikkhave, yo evaṃ vadeyya – ‘ahaṃ dukkhaṃ ariyasaccaṃ yathābhūtaṃ anabhisamecca…pe… dukkhanirodhagāminiṃ paṭipadaṃ ariyasaccaṃ yathābhūtaṃ anabhisamecca sammā dukkhassantaṃ karissāmī’ti – netaṃ ṭhānaṃ vijjati.
‘‘ཡོ ཙ ཁོ, བྷིཀྑཝེ, ཨེཝཾ ཝདེཡྻ – ‘ཨཧཾ དུཀྑཾ ཨརིཡསཙྩཾ ཡཐཱབྷཱུཏཾ ཨབྷིསམེཙྩ, དུཀྑསམུདཡཾ ཨརིཡསཙྩཾ ཡཐཱབྷཱུཏཾ ཨབྷིསམེཙྩ, དུཀྑནིརོདྷཾ ཨརིཡསཙྩཾ ཡཐཱབྷཱུཏཾ ཨབྷིསམེཙྩ, དུཀྑནིརོདྷགཱམིནིཾ པཊིཔདཾ ཨརིཡསཙྩཾ ཡཐཱབྷཱུཏཾ ཨབྷིསམེཙྩ སམྨཱ དུཀྑསྶནྟཾ ཀརིསྶཱམཱི’ཏི – ཋཱནམེཏཾ ཝིཛྫཏི།
‘‘Yo ca kho, bhikkhave, evaṃ vadeyya – ‘ahaṃ dukkhaṃ ariyasaccaṃ yathābhūtaṃ abhisamecca, dukkhasamudayaṃ ariyasaccaṃ yathābhūtaṃ abhisamecca, dukkhanirodhaṃ ariyasaccaṃ yathābhūtaṃ abhisamecca, dukkhanirodhagāminiṃ paṭipadaṃ ariyasaccaṃ yathābhūtaṃ abhisamecca sammā dukkhassantaṃ karissāmī’ti – ṭhānametaṃ vijjati.
‘‘སེཡྻཐཱཔི, བྷིཀྑཝེ, ཡོ ཨེཝཾ ཝདེཡྻ – ‘ཨཧཾ པདུམཔཏྟཱནཾ ཝཱ པལཱསཔཏྟཱནཾ ཝཱ མཱལུཝཔཏྟཱནཾ ཝཱ པུཊཾ ཀརིཏྭཱ ཨུདཀཾ ཝཱ ཏཱལཔཏྟཾ ཝཱ ཨཱཧརིསྶཱམཱི’ཏི – ཋཱནམེཏཾ ཝིཛྫཏི; ཨེཝམེཝ ཁོ, བྷིཀྑཝེ, ཡོ ཨེཝཾ ཝདེཡྻ – ‘ཨཧཾ དུཀྑཾ ཨརིཡསཙྩཾ ཡཐཱབྷཱུཏཾ ཨབྷིསམེཙྩ …པེ॰… དུཀྑནིརོདྷགཱམིནིཾ པཊིཔདཾ ཨརིཡསཙྩཾ ཡཐཱབྷཱུཏཾ ཨབྷིསམེཙྩ སམྨཱ དུཀྑསྶནྟཾ ཀརིསྶཱམཱི’ཏི – ཋཱནམེཏཾ ཝིཛྫཏི།
‘‘Seyyathāpi, bhikkhave, yo evaṃ vadeyya – ‘ahaṃ padumapattānaṃ vā palāsapattānaṃ vā māluvapattānaṃ vā puṭaṃ karitvā udakaṃ vā tālapattaṃ vā āharissāmī’ti – ṭhānametaṃ vijjati; evameva kho, bhikkhave, yo evaṃ vadeyya – ‘ahaṃ dukkhaṃ ariyasaccaṃ yathābhūtaṃ abhisamecca …pe… dukkhanirodhagāminiṃ paṭipadaṃ ariyasaccaṃ yathābhūtaṃ abhisamecca sammā dukkhassantaṃ karissāmī’ti – ṭhānametaṃ vijjati.
‘‘ཏསྨཱཏིཧ, བྷིཀྑཝེ, ‘ཨིདཾ དུཀྑ’ནྟི ཡོགོ ཀརཎཱིཡོ…པེ॰… ‘ཨཡཾ དུཀྑནིརོདྷགཱམིནཱི པཊིཔདཱ’ཏི ཡོགོ ཀརཎཱིཡོ’’ཏི། དུཏིཡཾ།
‘‘Tasmātiha, bhikkhave, ‘idaṃ dukkha’nti yogo karaṇīyo…pe… ‘ayaṃ dukkhanirodhagāminī paṭipadā’ti yogo karaṇīyo’’ti. Dutiyaṃ.
Footnotes:
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / སཾཡུཏྟནིཀཱཡ (ཨཊྛཀཐཱ) • Saṃyuttanikāya (aṭṭhakathā) / ༢. ཁདིརཔཏྟསུཏྟཝཎྞནཱ • 2. Khadirapattasuttavaṇṇanā
