| Library / Tipiṭaka / తిపిటక • Tipiṭaka / సంయుత్తనికాయ • Saṃyuttanikāya |
౨. ఖదిరపత్తసుత్తం
2. Khadirapattasuttaṃ
౧౧౦౨. ‘‘యో, భిక్ఖవే, ఏవం వదేయ్య – ‘అహం దుక్ఖం అరియసచ్చం యథాభూతం అనభిసమేచ్చ, దుక్ఖసముదయం అరియసచ్చం యథాభూతం అనభిసమేచ్చ, దుక్ఖనిరోధం అరియసచ్చం యథాభూతం అనభిసమేచ్చ, దుక్ఖనిరోధగామినిం పటిపదం అరియసచ్చం యథాభూతం అనభిసమేచ్చ సమ్మా దుక్ఖస్సన్తం కరిస్సామీ’తి – నేతం ఠానం విజ్జతి.
1102. ‘‘Yo, bhikkhave, evaṃ vadeyya – ‘ahaṃ dukkhaṃ ariyasaccaṃ yathābhūtaṃ anabhisamecca, dukkhasamudayaṃ ariyasaccaṃ yathābhūtaṃ anabhisamecca, dukkhanirodhaṃ ariyasaccaṃ yathābhūtaṃ anabhisamecca, dukkhanirodhagāminiṃ paṭipadaṃ ariyasaccaṃ yathābhūtaṃ anabhisamecca sammā dukkhassantaṃ karissāmī’ti – netaṃ ṭhānaṃ vijjati.
‘‘సేయ్యథాపి , భిక్ఖవే, యో ఏవం వదేయ్య – ‘అహం ఖదిరపత్తానం వా సరలపత్తానం 1 వా ఆమలకపత్తానం వా పుటం కరిత్వా ఉదకం వా తాలపత్తం వా ఆహరిస్సామీ’తి – నేతం ఠానం విజ్జతి; ఏవమేవ ఖో, భిక్ఖవే, యో ఏవం వదేయ్య – ‘అహం దుక్ఖం అరియసచ్చం యథాభూతం అనభిసమేచ్చ…పే॰… దుక్ఖనిరోధగామినిం పటిపదం అరియసచ్చం యథాభూతం అనభిసమేచ్చ సమ్మా దుక్ఖస్సన్తం కరిస్సామీ’తి – నేతం ఠానం విజ్జతి.
‘‘Seyyathāpi , bhikkhave, yo evaṃ vadeyya – ‘ahaṃ khadirapattānaṃ vā saralapattānaṃ 2 vā āmalakapattānaṃ vā puṭaṃ karitvā udakaṃ vā tālapattaṃ vā āharissāmī’ti – netaṃ ṭhānaṃ vijjati; evameva kho, bhikkhave, yo evaṃ vadeyya – ‘ahaṃ dukkhaṃ ariyasaccaṃ yathābhūtaṃ anabhisamecca…pe… dukkhanirodhagāminiṃ paṭipadaṃ ariyasaccaṃ yathābhūtaṃ anabhisamecca sammā dukkhassantaṃ karissāmī’ti – netaṃ ṭhānaṃ vijjati.
‘‘యో చ ఖో, భిక్ఖవే, ఏవం వదేయ్య – ‘అహం దుక్ఖం అరియసచ్చం యథాభూతం అభిసమేచ్చ, దుక్ఖసముదయం అరియసచ్చం యథాభూతం అభిసమేచ్చ, దుక్ఖనిరోధం అరియసచ్చం యథాభూతం అభిసమేచ్చ, దుక్ఖనిరోధగామినిం పటిపదం అరియసచ్చం యథాభూతం అభిసమేచ్చ సమ్మా దుక్ఖస్సన్తం కరిస్సామీ’తి – ఠానమేతం విజ్జతి.
‘‘Yo ca kho, bhikkhave, evaṃ vadeyya – ‘ahaṃ dukkhaṃ ariyasaccaṃ yathābhūtaṃ abhisamecca, dukkhasamudayaṃ ariyasaccaṃ yathābhūtaṃ abhisamecca, dukkhanirodhaṃ ariyasaccaṃ yathābhūtaṃ abhisamecca, dukkhanirodhagāminiṃ paṭipadaṃ ariyasaccaṃ yathābhūtaṃ abhisamecca sammā dukkhassantaṃ karissāmī’ti – ṭhānametaṃ vijjati.
‘‘సేయ్యథాపి, భిక్ఖవే, యో ఏవం వదేయ్య – ‘అహం పదుమపత్తానం వా పలాసపత్తానం వా మాలువపత్తానం వా పుటం కరిత్వా ఉదకం వా తాలపత్తం వా ఆహరిస్సామీ’తి – ఠానమేతం విజ్జతి; ఏవమేవ ఖో, భిక్ఖవే, యో ఏవం వదేయ్య – ‘అహం దుక్ఖం అరియసచ్చం యథాభూతం అభిసమేచ్చ …పే॰… దుక్ఖనిరోధగామినిం పటిపదం అరియసచ్చం యథాభూతం అభిసమేచ్చ సమ్మా దుక్ఖస్సన్తం కరిస్సామీ’తి – ఠానమేతం విజ్జతి.
‘‘Seyyathāpi, bhikkhave, yo evaṃ vadeyya – ‘ahaṃ padumapattānaṃ vā palāsapattānaṃ vā māluvapattānaṃ vā puṭaṃ karitvā udakaṃ vā tālapattaṃ vā āharissāmī’ti – ṭhānametaṃ vijjati; evameva kho, bhikkhave, yo evaṃ vadeyya – ‘ahaṃ dukkhaṃ ariyasaccaṃ yathābhūtaṃ abhisamecca …pe… dukkhanirodhagāminiṃ paṭipadaṃ ariyasaccaṃ yathābhūtaṃ abhisamecca sammā dukkhassantaṃ karissāmī’ti – ṭhānametaṃ vijjati.
‘‘తస్మాతిహ, భిక్ఖవే, ‘ఇదం దుక్ఖ’న్తి యోగో కరణీయో…పే॰… ‘అయం దుక్ఖనిరోధగామినీ పటిపదా’తి యోగో కరణీయో’’తి. దుతియం.
‘‘Tasmātiha, bhikkhave, ‘idaṃ dukkha’nti yogo karaṇīyo…pe… ‘ayaṃ dukkhanirodhagāminī paṭipadā’ti yogo karaṇīyo’’ti. Dutiyaṃ.
Footnotes:
Related texts:
అట్ఠకథా • Aṭṭhakathā / సుత్తపిటక (అట్ఠకథా) • Suttapiṭaka (aṭṭhakathā) / సంయుత్తనికాయ (అట్ఠకథా) • Saṃyuttanikāya (aṭṭhakathā) / ౨. ఖదిరపత్తసుత్తవణ్ణనా • 2. Khadirapattasuttavaṇṇanā
