| Library / Tipiṭaka / तिपिटक • Tipiṭaka / विमतिविनोदनी-टीका • Vimativinodanī-ṭīkā |
केणियजटिलवत्थुकथावण्णना
Keṇiyajaṭilavatthukathāvaṇṇanā
३००. जटिलोति आहरिमजटाधरो तापसवेसधारको यञ्ञयुत्तो लोकपूजितो ब्राह्मणो। पवत्तारो पावचनवसेन वत्तारो। येसं सन्तकमिदं, येहि वा इदं गीतन्ति अत्थो। गीतं पवुत्तं समिहितन्ति अञ्ञमञ्ञस्स परियायवचनं वुत्तन्ति अत्थो। तदनुगायन्तीति तं तेहि पुब्बे गीतं अनुगायन्ति। एवं सेसेसु च।
300.Jaṭiloti āharimajaṭādharo tāpasavesadhārako yaññayutto lokapūjito brāhmaṇo. Pavattāro pāvacanavasena vattāro. Yesaṃ santakamidaṃ, yehi vā idaṃ gītanti attho. Gītaṃ pavuttaṃ samihitanti aññamaññassa pariyāyavacanaṃ vuttanti attho. Tadanugāyantīti taṃ tehi pubbe gītaṃ anugāyanti. Evaṃ sesesu ca.
यावकालिकपक्कानन्ति पक्के सन्धाय वुत्तं, आमानि पन अनुपसम्पन्नेहि सीतुदके मद्दित्वा परिस्सावेत्वा दिन्नपानं पच्छाभत्तम्पि कप्पति एव। अयञ्च अत्थो महाअट्ठकथायं सरूपतो अवुत्तोति आह ‘‘कुरुन्दियं पना’’तिआदि। ‘‘उच्छुरसो निकसटो’’ति इदं पातब्बसामञ्ञेन यामकालिककथायं वुत्तं, तं पन सत्ताहकालिकमेवाति गहेतब्बं। इमे चत्तारो रसाति फलपत्तपुप्फउच्छुरसा चत्तारो।
Yāvakālikapakkānanti pakke sandhāya vuttaṃ, āmāni pana anupasampannehi sītudake madditvā parissāvetvā dinnapānaṃ pacchābhattampi kappati eva. Ayañca attho mahāaṭṭhakathāyaṃ sarūpato avuttoti āha ‘‘kurundiyaṃ panā’’tiādi. ‘‘Ucchuraso nikasaṭo’’ti idaṃ pātabbasāmaññena yāmakālikakathāyaṃ vuttaṃ, taṃ pana sattāhakālikamevāti gahetabbaṃ. Ime cattāro rasāti phalapattapupphaucchurasā cattāro.
पाळियं अग्गिहुत्तमुखाति अग्गिजुहनपुब्बका। छन्दसोति वेदस्स। सावित्ती मुखं पठमं सज्झायितब्बाति अत्थो। तपतन्ति विजोतन्तानं।
Pāḷiyaṃ aggihuttamukhāti aggijuhanapubbakā. Chandasoti vedassa. Sāvittī mukhaṃ paṭhamaṃ sajjhāyitabbāti attho. Tapatanti vijotantānaṃ.
केणियजटिलवत्थुकथावण्णना निट्ठिता।
Keṇiyajaṭilavatthukathāvaṇṇanā niṭṭhitā.
Related texts:
तिपिटक (मूल) • Tipiṭaka (Mūla) / विनयपिटक • Vinayapiṭaka / महावग्गपाळि • Mahāvaggapāḷi / १८२. केणियजटिलवत्थु • 182. Keṇiyajaṭilavatthu
अट्ठकथा • Aṭṭhakathā / विनयपिटक (अट्ठकथा) • Vinayapiṭaka (aṭṭhakathā) / महावग्ग-अट्ठकथा • Mahāvagga-aṭṭhakathā / केणियजटिलवत्थुकथा • Keṇiyajaṭilavatthukathā
टीका • Tīkā / विनयपिटक (टीका) • Vinayapiṭaka (ṭīkā) / सारत्थदीपनी-टीका • Sāratthadīpanī-ṭīkā / केणियजटिलवत्थुकथावण्णना • Keṇiyajaṭilavatthukathāvaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / वजिरबुद्धि-टीका • Vajirabuddhi-ṭīkā / केणियजटिलवत्थुकथावण्णना • Keṇiyajaṭilavatthukathāvaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / पाचित्यादियोजनापाळि • Pācityādiyojanāpāḷi / १८२. केणियजटिलवत्थुकथा • 182. Keṇiyajaṭilavatthukathā
