| Library / Tipiṭaka / তিপিটক • Tipiṭaka / ৰিমতিৰিনোদনী-টীকা • Vimativinodanī-ṭīkā |
কেণিযজটিলৰত্থুকথাৰণ্ণনা
Keṇiyajaṭilavatthukathāvaṇṇanā
৩০০. জটিলোতি আহরিমজটাধরো তাপসৰেসধারকো যঞ্ঞযুত্তো লোকপূজিতো ব্রাহ্মণো। পৰত্তারো পাৰচনৰসেন ৰত্তারো। যেসং সন্তকমিদং, যেহি ৰা ইদং গীতন্তি অত্থো। গীতং পৰুত্তং সমিহিতন্তি অঞ্ঞমঞ্ঞস্স পরিযাযৰচনং ৰুত্তন্তি অত্থো। তদনুগাযন্তীতি তং তেহি পুব্বে গীতং অনুগাযন্তি। এৰং সেসেসু চ।
300.Jaṭiloti āharimajaṭādharo tāpasavesadhārako yaññayutto lokapūjito brāhmaṇo. Pavattāro pāvacanavasena vattāro. Yesaṃ santakamidaṃ, yehi vā idaṃ gītanti attho. Gītaṃ pavuttaṃ samihitanti aññamaññassa pariyāyavacanaṃ vuttanti attho. Tadanugāyantīti taṃ tehi pubbe gītaṃ anugāyanti. Evaṃ sesesu ca.
যাৰকালিকপক্কানন্তি পক্কে সন্ধায ৰুত্তং, আমানি পন অনুপসম্পন্নেহি সীতুদকে মদ্দিত্ৰা পরিস্সাৰেত্ৰা দিন্নপানং পচ্ছাভত্তম্পি কপ্পতি এৰ। অযঞ্চ অত্থো মহাঅট্ঠকথাযং সরূপতো অৰুত্তোতি আহ ‘‘কুরুন্দিযং পনা’’তিআদি। ‘‘উচ্ছুরসো নিকসটো’’তি ইদং পাতব্বসামঞ্ঞেন যামকালিককথাযং ৰুত্তং, তং পন সত্তাহকালিকমেৰাতি গহেতব্বং। ইমে চত্তারো রসাতি ফলপত্তপুপ্ফউচ্ছুরসা চত্তারো।
Yāvakālikapakkānanti pakke sandhāya vuttaṃ, āmāni pana anupasampannehi sītudake madditvā parissāvetvā dinnapānaṃ pacchābhattampi kappati eva. Ayañca attho mahāaṭṭhakathāyaṃ sarūpato avuttoti āha ‘‘kurundiyaṃ panā’’tiādi. ‘‘Ucchuraso nikasaṭo’’ti idaṃ pātabbasāmaññena yāmakālikakathāyaṃ vuttaṃ, taṃ pana sattāhakālikamevāti gahetabbaṃ. Ime cattāro rasāti phalapattapupphaucchurasā cattāro.
পাল়িযং অগ্গিহুত্তমুখাতি অগ্গিজুহনপুব্বকা। ছন্দসোতি ৰেদস্স। সাৰিত্তী মুখং পঠমং সজ্ঝাযিতব্বাতি অত্থো। তপতন্তি ৰিজোতন্তানং।
Pāḷiyaṃ aggihuttamukhāti aggijuhanapubbakā. Chandasoti vedassa. Sāvittī mukhaṃ paṭhamaṃ sajjhāyitabbāti attho. Tapatanti vijotantānaṃ.
কেণিযজটিলৰত্থুকথাৰণ্ণনা নিট্ঠিতা।
Keṇiyajaṭilavatthukathāvaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰগ্গপাল়ি • Mahāvaggapāḷi / ১৮২. কেণিযজটিলৰত্থু • 182. Keṇiyajaṭilavatthu
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰগ্গ-অট্ঠকথা • Mahāvagga-aṭṭhakathā / কেণিযজটিলৰত্থুকথা • Keṇiyajaṭilavatthukathā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / কেণিযজটিলৰত্থুকথাৰণ্ণনা • Keṇiyajaṭilavatthukathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / কেণিযজটিলৰত্থুকথাৰণ্ণনা • Keṇiyajaṭilavatthukathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / ১৮২. কেণিযজটিলৰত্থুকথা • 182. Keṇiyajaṭilavatthukathā
