| Library / Tipiṭaka / д̇ибидага • Tipiṭaka / ган̇каавид̇аран̣ий-абхинава-дийгаа • Kaṅkhāvitaraṇī-abhinava-ṭīkā |
2. гааяасам̣саг̇г̇асигкаабад̣̇аван̣н̣анаа
2. Kāyasaṃsaggasikkhāpadavaṇṇanā
‘‘од̇ин̣н̣о’’д̇и (саарад̇т̇а. дий. 2.270) ид̣̇ам̣ гаммасаад̇ханам̣, гад̇д̇усаад̇ханам̣ ваа ход̇ийд̇и д̇ад̣̇убхаяавасзна ад̇т̇ам̣ д̣̇ассзнд̇о ‘‘яагкаад̣̇ийхи вияа сад̇д̇аа’’д̇иаад̣̇имааха. асамабзгкид̇ваад̇и яат̇аасабхаавам̣ анубабаригкид̇ваа, яат̇аа д̇з рад̇иж̇анагаа руубаад̣̇аяо висаяаа анижжад̣̇угкаасубхаанад̇д̇аагаарзна авадтид̇аа, д̇ат̇аа абассид̇ваад̇и вуд̇д̇ам̣ ход̇и. барин̣ад̇знаад̇и баривад̇д̇зна. д̇знааха ‘‘яат̇аа баривад̇д̇амаана’’нд̇иаад̣̇и. вуд̇д̇арааг̇авасзнаад̇и гааяасам̣саг̇г̇арааг̇авасзна. д̇ад̣̇ахуж̇аад̇ааяабийд̇и д̇асмим̣ ахани ж̇аад̇ам̣ ж̇ананам̣ зд̇иссаад̇и д̇ад̣̇ахуж̇аад̇аа, д̇асмим̣ ахани ж̇аад̇аад̇и ваа д̇ад̣̇ахуж̇аад̇аа, д̇ааяа, д̇ам̣ д̣̇ивасам̣ ж̇аад̇ааяабийд̇и ад̇т̇о, ж̇аад̇амад̇д̇ааяа алламам̣сабзсиван̣н̣ааяабийд̇и вуд̇д̇ам̣ ход̇и.
‘‘Otiṇṇo’’ti (sārattha. ṭī. 2.270) idaṃ kammasādhanaṃ, kattusādhanaṃ vā hotīti tadubhayavasena atthaṃ dassento ‘‘yakkhādīhi viya sattā’’tiādimāha. Asamapekkhitvāti yathāsabhāvaṃ anupaparikkhitvā, yathā te ratijanakā rūpādayo visayā aniccadukkhāsubhānattākārena avaṭṭhitā, tathā apassitvāti vuttaṃ hoti. Pariṇatenāti parivattena. Tenāha ‘‘yathā parivattamāna’’ntiādi. Vuttarāgavasenāti kāyasaṃsaggarāgavasena. Tadahujātāyapīti tasmiṃ ahani jātaṃ jananaṃ etissāti tadahujātā, tasmiṃ ahani jātāti vā tadahujātā, tāya, taṃ divasaṃ jātāyapīti attho, jātamattāya allamaṃsapesivaṇṇāyapīti vuttaṃ hoti.
ассаад̇и ‘‘гааяасам̣саг̇г̇ам̣ самаабаж̇ж̇зяяаа’’д̇и бад̣̇асса. ид̣̇аани хад̇т̇аад̣̇ийнам̣ вибхааг̇ад̣̇ассанад̇т̇ам̣ ‘‘д̇ад̇т̇а хад̇т̇о наама габбарад̇о бадтааяаа’’д̇иаад̣̇имааха. габбарад̇о бадтааяаад̇и д̣̇уд̇ияамахаасанд̇хим̣ убаад̣̇ааяа. ан̃н̃ад̇т̇а бана ман̣иб̣анд̇хад̇о бадтааяа яаава аг̇г̇анакаа хад̇т̇о. винанд̇хид̇ваа ваа авинанд̇хид̇ваа ваа гад̇агзсагалаабассзд̇ам̣ ад̇хиважананд̇и самб̣анд̇хо. д̇ад̇т̇а винанд̇хид̇ваад̇и д̇ийхи гзсаваддийхи г̇ант̇ид̇ваа. суван̣н̣ажийраганд̇и суван̣н̣абаал̣им̣. хад̇т̇ан̃жа взн̣ин̃жа табзд̇ваа авасзсасарийрам̣ ан̇г̇анд̇и ааха ‘‘авасзсасса сарийрассаа’’д̇иаад̣̇и.
Assāti ‘‘kāyasaṃsaggaṃ samāpajjeyyā’’ti padassa. Idāni hatthādīnaṃ vibhāgadassanatthaṃ ‘‘tattha hattho nāma kapparato paṭṭhāyā’’tiādimāha. Kapparato paṭṭhāyāti dutiyamahāsandhiṃ upādāya. Aññattha pana maṇibandhato paṭṭhāya yāva agganakhā hattho. Vinandhitvā vā avinandhitvā vā katakesakalāpassetaṃ adhivacananti sambandho. Tattha vinandhitvāti tīhi kesavaṭṭīhi ganthitvā. Suvaṇṇacīrakanti suvaṇṇapāḷiṃ. Hatthañca veṇiñca ṭhapetvā avasesasarīraṃ aṅganti āha ‘‘avasesassa sarīrassā’’tiādi.
яо хи сзванаад̇хиббааяоби нижжалзна гааязна гзвалам̣ пассам̣ бадивиж̇аанаад̇и саад̣̇ияад̇и анубход̇и, д̇асса жид̇д̇уббаад̣̇амад̇д̇з аабад̇д̇ияаа абхаавад̇о анаабад̇д̇ийд̇и ааха ‘‘гааязна авааяамид̇ваа’’д̇иаад̣̇и. могкаад̇хиббааязнаад̇и ид̇т̇ид̇о мужжид̇угаамад̇аад̇хиббааязна. асан̃жижжаад̇и ‘‘иминаа убааязна имам̣ пусиссаамий’’д̇и ажзд̇зд̇ваа. зван̃хи ажзд̇зд̇ваа бад̇д̇аббадиг̇г̇ахан̣аад̣̇ийсу маад̇уг̇аамасса ан̇г̇з пудтзби анаабад̇д̇и. асад̇ияаад̇и ан̃н̃авихид̇о ход̇и, ‘‘маад̇уг̇аамам̣ пусиссаамий’’д̇и сад̇и над̇т̇и, звам̣ асад̇ияаа хад̇т̇абаад̣̇абасааран̣аад̣̇игаалз пусанд̇асса анаабад̇д̇и. аж̇аананд̇ассаад̇и д̣̇аарагавзсзна тид̇ам̣ д̣̇ааригам̣ ‘‘ид̇т̇ий’’д̇и аж̇аананд̇о гзнажид̣̇зва гаран̣ийязна пусад̇и, звам̣ ‘‘ид̇т̇ий’’д̇и аж̇аананд̇асса пусад̇о анаабад̇д̇и. асаад̣̇ияанд̇ассаад̇и гааяасам̣саг̇г̇ам̣ асаад̣̇ияанд̇асса б̣аахаабарамбарааяа нийд̇абхигкусса вияа анаабад̇д̇и. ид̇ха бана уд̣̇ааяид̇т̇зро аад̣̇игаммиго. д̇асса анаабад̇д̇и аад̣̇игаммигассаад̇и.
Yo hi sevanādhippāyopi niccalena kāyena kevalaṃ phassaṃ paṭivijānāti sādiyati anubhoti, tassa cittuppādamatte āpattiyā abhāvato anāpattīti āha ‘‘kāyena avāyamitvā’’tiādi. Mokkhādhippāyenāti itthito muccitukāmatādhippāyena. Asañciccāti ‘‘iminā upāyena imaṃ phusissāmī’’ti acetetvā. Evañhi acetetvā pattappaṭiggahaṇādīsu mātugāmassa aṅge phuṭṭhepi anāpatti. Asatiyāti aññavihito hoti, ‘‘mātugāmaṃ phusissāmī’’ti sati natthi, evaṃ asatiyā hatthapādapasāraṇādikāle phusantassa anāpatti. Ajānantassāti dārakavesena ṭhitaṃ dārikaṃ ‘‘itthī’’ti ajānanto kenacideva karaṇīyena phusati, evaṃ ‘‘itthī’’ti ajānantassa phusato anāpatti. Asādiyantassāti kāyasaṃsaggaṃ asādiyantassa bāhāparamparāya nītabhikkhussa viya anāpatti. Idha pana udāyitthero ādikammiko. Tassa anāpatti ādikammikassāti.
гааяасам̣саг̇г̇асигкаабад̣̇аван̣н̣анаа нидтид̇аа.
Kāyasaṃsaggasikkhāpadavaṇṇanā niṭṭhitā.
