| Library / Tipiṭaka / ತಿಪಿಟಕ • Tipiṭaka / ಅಙ್ಗುತ್ತರನಿಕಾಯ • Aṅguttaranikāya |
೧೨. ಸಾಮಞ್ಞವಗ್ಗೋ
12. Sāmaññavaggo
೧. ಕಾಯಾನುಪಸ್ಸೀಸುತ್ತಂ
1. Kāyānupassīsuttaṃ
೧೧೭. ‘‘ಛ , ಭಿಕ್ಖವೇ, ಧಮ್ಮೇ ಅಪ್ಪಹಾಯ ಅಭಬ್ಬೋ ಕಾಯೇ ಕಾಯಾನುಪಸ್ಸೀ ವಿಹರಿತುಂ। ಕತಮೇ ಛ? ಕಮ್ಮಾರಾಮತಂ, ಭಸ್ಸಾರಾಮತಂ, ನಿದ್ದಾರಾಮತಂ, ಸಙ್ಗಣಿಕಾರಾಮತಂ, ಇನ್ದ್ರಿಯೇಸು ಅಗುತ್ತದ್ವಾರತಂ, ಭೋಜನೇ ಅಮತ್ತಞ್ಞುತಂ। ಇಮೇ ಖೋ, ಭಿಕ್ಖವೇ, ಛ ಧಮ್ಮೇ ಅಪ್ಪಹಾಯ ಅಭಬ್ಬೋ ಕಾಯೇ ಕಾಯಾನುಪಸ್ಸೀ ವಿಹರಿತುಂ।
117. ‘‘Cha , bhikkhave, dhamme appahāya abhabbo kāye kāyānupassī viharituṃ. Katame cha? Kammārāmataṃ, bhassārāmataṃ, niddārāmataṃ, saṅgaṇikārāmataṃ, indriyesu aguttadvārataṃ, bhojane amattaññutaṃ. Ime kho, bhikkhave, cha dhamme appahāya abhabbo kāye kāyānupassī viharituṃ.
‘‘ಛ , ಭಿಕ್ಖವೇ, ಧಮ್ಮೇ ಪಹಾಯ ಭಬ್ಬೋ ಕಾಯೇ ಕಾಯಾನುಪಸ್ಸೀ ವಿಹರಿತುಂ। ಕತಮೇ ಛ? ಕಮ್ಮಾರಾಮತಂ, ಭಸ್ಸಾರಾಮತಂ, ನಿದ್ದಾರಾಮತಂ, ಸಙ್ಗಣಿಕಾರಾಮತಂ, ಇನ್ದ್ರಿಯೇಸು ಅಗುತ್ತದ್ವಾರತಂ, ಭೋಜನೇ ಅಮತ್ತಞ್ಞುತಂ – ಇಮೇ ಖೋ, ಭಿಕ್ಖವೇ, ಛ ಧಮ್ಮೇ ಪಹಾಯ ಭಬ್ಬೋ ಕಾಯೇ ಕಾಯಾನುಪಸ್ಸೀ ವಿಹರಿತು’’ನ್ತಿ। ಪಠಮಂ।
‘‘Cha , bhikkhave, dhamme pahāya bhabbo kāye kāyānupassī viharituṃ. Katame cha? Kammārāmataṃ, bhassārāmataṃ, niddārāmataṃ, saṅgaṇikārāmataṃ, indriyesu aguttadvārataṃ, bhojane amattaññutaṃ – ime kho, bhikkhave, cha dhamme pahāya bhabbo kāye kāyānupassī viharitu’’nti. Paṭhamaṃ.
