| Library / Tipiṭaka / တိပိဋက • Tipiṭaka / အင္ဂုတ္တရနိကာယ • Aṅguttaranikāya |
၁၂. သာမညဝဂ္ဂော
12. Sāmaññavaggo
၁. ကာယာနုပသ္သီသုတ္တံ
1. Kāyānupassīsuttaṃ
၁၁၇. ‘‘ဆ , ဘိက္ခဝေ, ဓမ္မေ အပ္ပဟာယ အဘဗ္ဗော ကာယေ ကာယာနုပသ္သီ ဝိဟရိတုံ။ ကတမေ ဆ? ကမ္မာရာမတံ, ဘသ္သာရာမတံ, နိဒ္ဒာရာမတံ, သင္ဂဏိကာရာမတံ, ဣန္ဒ္ရိယေသု အဂုတ္တဒ္ဝာရတံ, ဘောဇနေ အမတ္တညုတံ။ ဣမေ ခော, ဘိက္ခဝေ, ဆ ဓမ္မေ အပ္ပဟာယ အဘဗ္ဗော ကာယေ ကာယာနုပသ္သီ ဝိဟရိတုံ။
117. ‘‘Cha , bhikkhave, dhamme appahāya abhabbo kāye kāyānupassī viharituṃ. Katame cha? Kammārāmataṃ, bhassārāmataṃ, niddārāmataṃ, saṅgaṇikārāmataṃ, indriyesu aguttadvārataṃ, bhojane amattaññutaṃ. Ime kho, bhikkhave, cha dhamme appahāya abhabbo kāye kāyānupassī viharituṃ.
‘‘ဆ , ဘိက္ခဝေ, ဓမ္မေ ပဟာယ ဘဗ္ဗော ကာယေ ကာယာနုပသ္သီ ဝိဟရိတုံ။ ကတမေ ဆ? ကမ္မာရာမတံ, ဘသ္သာရာမတံ, နိဒ္ဒာရာမတံ, သင္ဂဏိကာရာမတံ, ဣန္ဒ္ရိယေသု အဂုတ္တဒ္ဝာရတံ, ဘောဇနေ အမတ္တညုတံ – ဣမေ ခော, ဘိက္ခဝေ, ဆ ဓမ္မေ ပဟာယ ဘဗ္ဗော ကာယေ ကာယာနုပသ္သီ ဝိဟရိတု’’န္တိ။ ပဌမံ။
‘‘Cha , bhikkhave, dhamme pahāya bhabbo kāye kāyānupassī viharituṃ. Katame cha? Kammārāmataṃ, bhassārāmataṃ, niddārāmataṃ, saṅgaṇikārāmataṃ, indriyesu aguttadvārataṃ, bhojane amattaññutaṃ – ime kho, bhikkhave, cha dhamme pahāya bhabbo kāye kāyānupassī viharitu’’nti. Paṭhamaṃ.
