| Library / Tipiṭaka / តិបិដក • Tipiṭaka / អង្គុត្តរនិកាយ • Aṅguttaranikāya |
១២. សាមញ្ញវគ្គោ
12. Sāmaññavaggo
១. កាយានុបស្សីសុត្តំ
1. Kāyānupassīsuttaṃ
១១៧. ‘‘ឆ , ភិក្ខវេ, ធម្មេ អប្បហាយ អភព្ពោ កាយេ កាយានុបស្សី វិហរិតុំ។ កតមេ ឆ? កម្មារាមតំ, ភស្សារាមតំ, និទ្ទារាមតំ, សង្គណិការាមតំ, ឥន្ទ្រិយេសុ អគុត្តទ្វារតំ, ភោជនេ អមត្តញ្ញុតំ។ ឥមេ ខោ, ភិក្ខវេ, ឆ ធម្មេ អប្បហាយ អភព្ពោ កាយេ កាយានុបស្សី វិហរិតុំ។
117. ‘‘Cha , bhikkhave, dhamme appahāya abhabbo kāye kāyānupassī viharituṃ. Katame cha? Kammārāmataṃ, bhassārāmataṃ, niddārāmataṃ, saṅgaṇikārāmataṃ, indriyesu aguttadvārataṃ, bhojane amattaññutaṃ. Ime kho, bhikkhave, cha dhamme appahāya abhabbo kāye kāyānupassī viharituṃ.
‘‘ឆ , ភិក្ខវេ, ធម្មេ បហាយ ភព្ពោ កាយេ កាយានុបស្សី វិហរិតុំ។ កតមេ ឆ? កម្មារាមតំ, ភស្សារាមតំ, និទ្ទារាមតំ, សង្គណិការាមតំ, ឥន្ទ្រិយេសុ អគុត្តទ្វារតំ, ភោជនេ អមត្តញ្ញុតំ – ឥមេ ខោ, ភិក្ខវេ, ឆ ធម្មេ បហាយ ភព្ពោ កាយេ កាយានុបស្សី វិហរិតុ’’ន្តិ។ បឋមំ។
‘‘Cha , bhikkhave, dhamme pahāya bhabbo kāye kāyānupassī viharituṃ. Katame cha? Kammārāmataṃ, bhassārāmataṃ, niddārāmataṃ, saṅgaṇikārāmataṃ, indriyesu aguttadvārataṃ, bhojane amattaññutaṃ – ime kho, bhikkhave, cha dhamme pahāya bhabbo kāye kāyānupassī viharitu’’nti. Paṭhamaṃ.
