| Library / Tipiṭaka / তিপিটক • Tipiṭaka / অঙ্গুত্তরনিকায • Aṅguttaranikāya |
১২. সামঞ্ঞৰগ্গো
12. Sāmaññavaggo
১. কাযানুপস্সীসুত্তং
1. Kāyānupassīsuttaṃ
১১৭. ‘‘ছ , ভিক্খৰে, ধম্মে অপ্পহায অভব্বো কাযে কাযানুপস্সী ৰিহরিতুং। কতমে ছ? কম্মারামতং, ভস্সারামতং, নিদ্দারামতং, সঙ্গণিকারামতং, ইন্দ্রিযেসু অগুত্তদ্ৰারতং, ভোজনে অমত্তঞ্ঞুতং। ইমে খো, ভিক্খৰে, ছ ধম্মে অপ্পহায অভব্বো কাযে কাযানুপস্সী ৰিহরিতুং।
117. ‘‘Cha , bhikkhave, dhamme appahāya abhabbo kāye kāyānupassī viharituṃ. Katame cha? Kammārāmataṃ, bhassārāmataṃ, niddārāmataṃ, saṅgaṇikārāmataṃ, indriyesu aguttadvārataṃ, bhojane amattaññutaṃ. Ime kho, bhikkhave, cha dhamme appahāya abhabbo kāye kāyānupassī viharituṃ.
‘‘ছ , ভিক্খৰে, ধম্মে পহায ভব্বো কাযে কাযানুপস্সী ৰিহরিতুং। কতমে ছ? কম্মারামতং, ভস্সারামতং, নিদ্দারামতং, সঙ্গণিকারামতং, ইন্দ্রিযেসু অগুত্তদ্ৰারতং, ভোজনে অমত্তঞ্ঞুতং – ইমে খো, ভিক্খৰে, ছ ধম্মে পহায ভব্বো কাযে কাযানুপস্সী ৰিহরিতু’’ন্তি। পঠমং।
‘‘Cha , bhikkhave, dhamme pahāya bhabbo kāye kāyānupassī viharituṃ. Katame cha? Kammārāmataṃ, bhassārāmataṃ, niddārāmataṃ, saṅgaṇikārāmataṃ, indriyesu aguttadvārataṃ, bhojane amattaññutaṃ – ime kho, bhikkhave, cha dhamme pahāya bhabbo kāye kāyānupassī viharitu’’nti. Paṭhamaṃ.
