| Library / Tipiṭaka / തിപിടക • Tipiṭaka / അങ്ഗുത്തരനികായ (അട്ഠകഥാ) • Aṅguttaranikāya (aṭṭhakathā) |
൬. കടുവിയസുത്തവണ്ണനാ
6. Kaṭuviyasuttavaṇṇanā
൧൨൯. ഛട്ഠേ ഗോയോഗപിലക്ഖസ്മിന്തി ഗാവീനം വിക്കയട്ഠാനേ ഉട്ഠിതപിലക്ഖസ്സ സന്തികേ. രിത്തസ്സാദന്തി ഝാനസുഖാഭാവേന രിത്തസ്സാദം. ബാഹിരസ്സാദന്തി കാമഗുണസുഖവസേന ബാഹിരസ്സാദം. കടുവിയന്തി ഉച്ഛിട്ഠം. ആമഗന്ധേനാതി കോധസങ്ഖാതേന വിസ്സഗന്ധേന. അവസ്സുതന്തി തിന്തം. മക്ഖികാതി കിലേസമക്ഖികാ. നാനുപതിസ്സന്തീതി ഉട്ഠായ ന അനുബന്ധിസ്സന്തി. നാന്വാസ്സവിസ്സന്തീതി അനുബന്ധിത്വാ ന ഖാദിസ്സന്തി. സംവേഗമാപാദീതി സോതാപന്നോ ജാതോ.
129. Chaṭṭhe goyogapilakkhasminti gāvīnaṃ vikkayaṭṭhāne uṭṭhitapilakkhassa santike. Rittassādanti jhānasukhābhāvena rittassādaṃ. Bāhirassādanti kāmaguṇasukhavasena bāhirassādaṃ. Kaṭuviyanti ucchiṭṭhaṃ. Āmagandhenāti kodhasaṅkhātena vissagandhena. Avassutanti tintaṃ. Makkhikāti kilesamakkhikā. Nānupatissantīti uṭṭhāya na anubandhissanti. Nānvāssavissantīti anubandhitvā na khādissanti. Saṃvegamāpādīti sotāpanno jāto.
കടുവിയകതോതി ഉച്ഛിട്ഠകതോ. ആരകാ ഹോതീതി ദൂരേ ഹോതി. വിഘാതസ്സേവ ഭാഗവാതി ദുക്ഖസ്സേവ ഭാഗീ. ചരേതീതി ചരതി ഗച്ഛതി. ദുമ്മേധോതി ദുപ്പഞ്ഞോ. ഇമസ്മിം സുത്തേ വട്ടമേവ കഥിതം, ഗാഥാസു വട്ടവിവട്ടം കഥിതന്തി. സത്തമേ വട്ടമേവ ഭാസിതം.
Kaṭuviyakatoti ucchiṭṭhakato. Ārakā hotīti dūre hoti. Vighātasseva bhāgavāti dukkhasseva bhāgī. Caretīti carati gacchati. Dummedhoti duppañño. Imasmiṃ sutte vaṭṭameva kathitaṃ, gāthāsu vaṭṭavivaṭṭaṃ kathitanti. Sattame vaṭṭameva bhāsitaṃ.
Related texts:
തിപിടക (മൂല) • Tipiṭaka (Mūla) / സുത്തപിടക • Suttapiṭaka / അങ്ഗുത്തരനികായ • Aṅguttaranikāya / ൬. കടുവിയസുത്തം • 6. Kaṭuviyasuttaṃ
ടീകാ • Tīkā / സുത്തപിടക (ടീകാ) • Suttapiṭaka (ṭīkā) / അങ്ഗുത്തരനികായ (ടീകാ) • Aṅguttaranikāya (ṭīkā) / ൬. കടുവിയസുത്തവണ്ണനാ • 6. Kaṭuviyasuttavaṇṇanā
