| Library / Tipiṭaka / တိပိဋက • Tipiṭaka / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) |
၆. ကဋုဝိယသုတ္တဝဏ္ဏနာ
6. Kaṭuviyasuttavaṇṇanā
၁၂၉. ဆဋ္ဌေ ဂောယောဂပိလက္ခသ္မိန္တိ ဂာဝီနံ ဝိက္ကယဋ္ဌာနေ ဥဋ္ဌိတပိလက္ခသ္သ သန္တိကေ။ ရိတ္တသ္သာဒန္တိ ဈာနသုခာဘာဝေန ရိတ္တသ္သာဒံ။ ဗာဟိရသ္သာဒန္တိ ကာမဂုဏသုခဝသေန ဗာဟိရသ္သာဒံ။ ကဋုဝိယန္တိ ဥစ္ဆိဋ္ဌံ။ အာမဂန္ဓေနာတိ ကောဓသင္ခာတေန ဝိသ္သဂန္ဓေန။ အဝသ္သုတန္တိ တိန္တံ။ မက္ခိကာတိ ကိလေသမက္ခိကာ။ နာနုပတိသ္သန္တီတိ ဥဋ္ဌာယ န အနုဗန္ဓိသ္သန္တိ။ နာန္ဝာသ္သဝိသ္သန္တီတိ အနုဗန္ဓိတ္ဝာ န ခာဒိသ္သန္တိ။ သံဝေဂမာပာဒီတိ သောတာပန္နော ဇာတော။
129. Chaṭṭhe goyogapilakkhasminti gāvīnaṃ vikkayaṭṭhāne uṭṭhitapilakkhassa santike. Rittassādanti jhānasukhābhāvena rittassādaṃ. Bāhirassādanti kāmaguṇasukhavasena bāhirassādaṃ. Kaṭuviyanti ucchiṭṭhaṃ. Āmagandhenāti kodhasaṅkhātena vissagandhena. Avassutanti tintaṃ. Makkhikāti kilesamakkhikā. Nānupatissantīti uṭṭhāya na anubandhissanti. Nānvāssavissantīti anubandhitvā na khādissanti. Saṃvegamāpādīti sotāpanno jāto.
ကဋုဝိယကတောတိ ဥစ္ဆိဋ္ဌကတော။ အာရကာ ဟောတီတိ ဒူရေ ဟောတိ။ ဝိဃာတသ္သေဝ ဘာဂဝာတိ ဒုက္ခသ္သေဝ ဘာဂီ။ စရေတီတိ စရတိ ဂစ္ဆတိ။ ဒုမ္မေဓောတိ ဒုပ္ပညော။ ဣမသ္မိံ သုတ္တေ ဝဋ္ဋမေဝ ကထိတံ, ဂာထာသု ဝဋ္ဋဝိဝဋ္ဋံ ကထိတန္တိ။ သတ္တမေ ဝဋ္ဋမေဝ ဘာသိတံ။
Kaṭuviyakatoti ucchiṭṭhakato. Ārakā hotīti dūre hoti. Vighātasseva bhāgavāti dukkhasseva bhāgī. Caretīti carati gacchati. Dummedhoti duppañño. Imasmiṃ sutte vaṭṭameva kathitaṃ, gāthāsu vaṭṭavivaṭṭaṃ kathitanti. Sattame vaṭṭameva bhāsitaṃ.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / အင္ဂုတ္တရနိကာယ • Aṅguttaranikāya / ၆. ကဋုဝိယသုတ္တံ • 6. Kaṭuviyasuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / အင္ဂုတ္တရနိကာယ (ဋီကာ) • Aṅguttaranikāya (ṭīkā) / ၆. ကဋုဝိယသုတ္တဝဏ္ဏနာ • 6. Kaṭuviyasuttavaṇṇanā
