| Library / Tipiṭaka / ติปิฎก • Tipiṭaka / เถรคาถาปาฬิ • Theragāthāpāḷi |
๗.กาติยานเตฺถรคาถา
7.Kātiyānattheragāthā
๔๑๑.
411.
‘‘อุเฎฺฐหิ นิสีท กาติยาน, มา นิทฺทาพหุโล อหุ ชาครสฺสุ;
‘‘Uṭṭhehi nisīda kātiyāna, mā niddābahulo ahu jāgarassu;
มา ตํ อลสํ ปมตฺตพนฺธุ, กูเฎเนว ชินาตุ มจฺจุราชาฯ
Mā taṃ alasaṃ pamattabandhu, kūṭeneva jinātu maccurājā.
๔๑๒.
412.
‘‘เสยฺยถาปิ 1 มหาสมุทฺทเวโค, เอวํ ชาติชราติวตฺตเต ตํ;
‘‘Seyyathāpi 2 mahāsamuddavego, evaṃ jātijarātivattate taṃ;
โส กโรหิ สุทีปมตฺตโน ตฺวํ, น หิ ตาณํ ตว วิชฺชเตว อญฺญํฯ
So karohi sudīpamattano tvaṃ, na hi tāṇaṃ tava vijjateva aññaṃ.
๔๑๓.
413.
‘‘สตฺถา หิ วิเชสิ มคฺคเมตํ, สงฺคา ชาติชราภยา อตีตํ;
‘‘Satthā hi vijesi maggametaṃ, saṅgā jātijarābhayā atītaṃ;
ปุพฺพาปรรตฺตมปฺปมโตฺต, อนุยุญฺชสฺสุ ทฬฺหํ กโรหิ โยคํฯ
Pubbāpararattamappamatto, anuyuñjassu daḷhaṃ karohi yogaṃ.
๔๑๔.
414.
‘‘ปุริมานิ ปมุญฺจ พนฺธนานิ, สงฺฆาฎิขุรมุณฺฑภิกฺขโภชี;
‘‘Purimāni pamuñca bandhanāni, saṅghāṭikhuramuṇḍabhikkhabhojī;
มา ขิฑฺฑารติญฺจ มา นิทฺทํ, อนุยุญฺชิตฺถ ฌาย กาติยานฯ
Mā khiḍḍāratiñca mā niddaṃ, anuyuñjittha jhāya kātiyāna.
๔๑๕.
415.
‘‘ฌายาหิ ชินาหิ กาติยาน, โยคเกฺขมปเถสุ โกวิโทสิ;
‘‘Jhāyāhi jināhi kātiyāna, yogakkhemapathesu kovidosi;
ปปฺปุยฺย อนุตฺตรํ วิสุทฺธิํ, ปรินิพฺพาหิสิ วารินาว โชติฯ
Pappuyya anuttaraṃ visuddhiṃ, parinibbāhisi vārināva joti.
๔๑๖.
416.
‘‘ปโชฺชตกโร ปริตฺตรํโส, วาเตน วินมฺยเต ลตาว;
‘‘Pajjotakaro parittaraṃso, vātena vinamyate latāva;
เอวมฺปิ ตุวํ อนาทิยาโน, มารํ อินฺทสโคตฺต นิทฺธุนาหิ;
Evampi tuvaṃ anādiyāno, māraṃ indasagotta niddhunāhi;
โส เวทยิตาสุ วีตราโค, กาลํ กงฺข อิเธว สีติภูโต’’ติฯ
So vedayitāsu vītarāgo, kālaṃ kaṅkha idheva sītibhūto’’ti.
… กาติยาโน เถโร…ฯ
… Kātiyāno thero….
Footnotes:
Related texts:
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / ขุทฺทกนิกาย (อฎฺฐกถา) • Khuddakanikāya (aṭṭhakathā) / เถรคาถา-อฎฺฐกถา • Theragāthā-aṭṭhakathā / ๗. กาติยานเตฺถรคาถาวณฺณนา • 7. Kātiyānattheragāthāvaṇṇanā
