| Library / Tipiṭaka / តិបិដក • Tipiṭaka / មិលិន្ទបញ្ហបាឡិ • Milindapañhapāḷi |
១០. កឋិនតបនបញ្ហោ
10. Kaṭhinatapanapañho
១០. ‘‘ភន្តេ នាគសេន, កិស្ស ហេមន្តេ សូរិយោ កឋិនំ តបតិ, នោ តថា គិម្ហេ’’តិ? ‘‘គិម្ហេ, មហារាជ, អនុបហតំ ហោតិ រជោជល្លំ, វាតក្ខុភិតា រេណូ គគនានុគតា ហោន្តិ, អាកាសេបិ អព្ភា សុពហលា ហោន្តិ, មហាវាតោ ច អធិមត្តំ វាយតិ, តេ សព្ពេ នានាកុលា សមាយុតា សូរិយរំសិយោ បិទហន្តិ, តេន គិម្ហេ សូរិយោ មន្ទំ តបតិ។
10. ‘‘Bhante nāgasena, kissa hemante sūriyo kaṭhinaṃ tapati, no tathā gimhe’’ti? ‘‘Gimhe, mahārāja, anupahataṃ hoti rajojallaṃ, vātakkhubhitā reṇū gaganānugatā honti, ākāsepi abbhā subahalā honti, mahāvāto ca adhimattaṃ vāyati, te sabbe nānākulā samāyutā sūriyaraṃsiyo pidahanti, tena gimhe sūriyo mandaṃ tapati.
‘‘ហេមន្តេ បន, មហារាជ, ហេដ្ឋា បថវី និព្ពុតា ហោតិ, ឧបរិ មហាមេឃោ ឧបដ្ឋិតោ ហោតិ, ឧបសន្តំ ហោតិ រជោជល្លំ, រេណុ ច សន្តសន្តំ គគនេ ចរតិ, វិគតវលាហកោ ច ហោតិ អាកាសោ, វាតោ ច មន្ទមន្ទំ វាយតិ, ឯតេសំ ឧបរតិយា វិសុទ្ធា 1 ហោន្តិ សូរិយរំសិយោ, ឧបឃាតវិមុត្តស្ស សូរិយស្ស តាបោ អតិ វិយ តបតិ។ ឥទមេត្ថ, មហារាជ, ការណំ, យេន ការណេន សូរិយោ ហេមន្តេ កឋិនំ តបតិ, នោ តថា គិម្ហេ’’តិ។ ‘‘សព្ពីតិមុត្តោ, ភន្តេ, សូរិយោ កឋិនំ តបតិ, មេឃាទិសហគតោ កឋិនំ ន តបតី’’តិ។
‘‘Hemante pana, mahārāja, heṭṭhā pathavī nibbutā hoti, upari mahāmegho upaṭṭhito hoti, upasantaṃ hoti rajojallaṃ, reṇu ca santasantaṃ gagane carati, vigatavalāhako ca hoti ākāso, vāto ca mandamandaṃ vāyati, etesaṃ uparatiyā visuddhā 2 honti sūriyaraṃsiyo, upaghātavimuttassa sūriyassa tāpo ati viya tapati. Idamettha, mahārāja, kāraṇaṃ, yena kāraṇena sūriyo hemante kaṭhinaṃ tapati, no tathā gimhe’’ti. ‘‘Sabbītimutto, bhante, sūriyo kaṭhinaṃ tapati, meghādisahagato kaṭhinaṃ na tapatī’’ti.
កឋិនតបនបញ្ហោ ទសមោ។
Kaṭhinatapanapañho dasamo.
និប្បបញ្ចវគ្គោ ទុតិយោ។
Nippapañcavaggo dutiyo.
ឥមស្មិំ វគ្គេ ទស បញ្ហា។
Imasmiṃ vagge dasa pañhā.
Footnotes:
