| Library / Tipiṭaka / તિપિટક • Tipiṭaka / મિલિન્દપઞ્હપાળિ • Milindapañhapāḷi |
૧૦. કઠિનતપનપઞ્હો
10. Kaṭhinatapanapañho
૧૦. ‘‘ભન્તે નાગસેન, કિસ્સ હેમન્તે સૂરિયો કઠિનં તપતિ, નો તથા ગિમ્હે’’તિ? ‘‘ગિમ્હે, મહારાજ, અનુપહતં હોતિ રજોજલ્લં, વાતક્ખુભિતા રેણૂ ગગનાનુગતા હોન્તિ, આકાસેપિ અબ્ભા સુબહલા હોન્તિ, મહાવાતો ચ અધિમત્તં વાયતિ, તે સબ્બે નાનાકુલા સમાયુતા સૂરિયરંસિયો પિદહન્તિ, તેન ગિમ્હે સૂરિયો મન્દં તપતિ.
10. ‘‘Bhante nāgasena, kissa hemante sūriyo kaṭhinaṃ tapati, no tathā gimhe’’ti? ‘‘Gimhe, mahārāja, anupahataṃ hoti rajojallaṃ, vātakkhubhitā reṇū gaganānugatā honti, ākāsepi abbhā subahalā honti, mahāvāto ca adhimattaṃ vāyati, te sabbe nānākulā samāyutā sūriyaraṃsiyo pidahanti, tena gimhe sūriyo mandaṃ tapati.
‘‘હેમન્તે પન, મહારાજ, હેટ્ઠા પથવી નિબ્બુતા હોતિ, ઉપરિ મહામેઘો ઉપટ્ઠિતો હોતિ, ઉપસન્તં હોતિ રજોજલ્લં, રેણુ ચ સન્તસન્તં ગગને ચરતિ, વિગતવલાહકો ચ હોતિ આકાસો, વાતો ચ મન્દમન્દં વાયતિ, એતેસં ઉપરતિયા વિસુદ્ધા 1 હોન્તિ સૂરિયરંસિયો, ઉપઘાતવિમુત્તસ્સ સૂરિયસ્સ તાપો અતિ વિય તપતિ. ઇદમેત્થ, મહારાજ, કારણં, યેન કારણેન સૂરિયો હેમન્તે કઠિનં તપતિ, નો તથા ગિમ્હે’’તિ. ‘‘સબ્બીતિમુત્તો, ભન્તે, સૂરિયો કઠિનં તપતિ, મેઘાદિસહગતો કઠિનં ન તપતી’’તિ.
‘‘Hemante pana, mahārāja, heṭṭhā pathavī nibbutā hoti, upari mahāmegho upaṭṭhito hoti, upasantaṃ hoti rajojallaṃ, reṇu ca santasantaṃ gagane carati, vigatavalāhako ca hoti ākāso, vāto ca mandamandaṃ vāyati, etesaṃ uparatiyā visuddhā 2 honti sūriyaraṃsiyo, upaghātavimuttassa sūriyassa tāpo ati viya tapati. Idamettha, mahārāja, kāraṇaṃ, yena kāraṇena sūriyo hemante kaṭhinaṃ tapati, no tathā gimhe’’ti. ‘‘Sabbītimutto, bhante, sūriyo kaṭhinaṃ tapati, meghādisahagato kaṭhinaṃ na tapatī’’ti.
કઠિનતપનપઞ્હો દસમો.
Kaṭhinatapanapañho dasamo.
નિપ્પપઞ્ચવગ્ગો દુતિયો.
Nippapañcavaggo dutiyo.
ઇમસ્મિં વગ્ગે દસ પઞ્હા.
Imasmiṃ vagge dasa pañhā.
Footnotes:
