| Library / Tipiṭaka / తిపిటక • Tipiṭaka / మిలిన్దపఞ్హపాళి • Milindapañhapāḷi |
౧౦. కఠినతపనపఞ్హో
10. Kaṭhinatapanapañho
౧౦. ‘‘భన్తే నాగసేన, కిస్స హేమన్తే సూరియో కఠినం తపతి, నో తథా గిమ్హే’’తి? ‘‘గిమ్హే, మహారాజ, అనుపహతం హోతి రజోజల్లం, వాతక్ఖుభితా రేణూ గగనానుగతా హోన్తి, ఆకాసేపి అబ్భా సుబహలా హోన్తి, మహావాతో చ అధిమత్తం వాయతి, తే సబ్బే నానాకులా సమాయుతా సూరియరంసియో పిదహన్తి, తేన గిమ్హే సూరియో మన్దం తపతి.
10. ‘‘Bhante nāgasena, kissa hemante sūriyo kaṭhinaṃ tapati, no tathā gimhe’’ti? ‘‘Gimhe, mahārāja, anupahataṃ hoti rajojallaṃ, vātakkhubhitā reṇū gaganānugatā honti, ākāsepi abbhā subahalā honti, mahāvāto ca adhimattaṃ vāyati, te sabbe nānākulā samāyutā sūriyaraṃsiyo pidahanti, tena gimhe sūriyo mandaṃ tapati.
‘‘హేమన్తే పన, మహారాజ, హేట్ఠా పథవీ నిబ్బుతా హోతి, ఉపరి మహామేఘో ఉపట్ఠితో హోతి, ఉపసన్తం హోతి రజోజల్లం, రేణు చ సన్తసన్తం గగనే చరతి, విగతవలాహకో చ హోతి ఆకాసో, వాతో చ మన్దమన్దం వాయతి, ఏతేసం ఉపరతియా విసుద్ధా 1 హోన్తి సూరియరంసియో, ఉపఘాతవిముత్తస్స సూరియస్స తాపో అతి వియ తపతి. ఇదమేత్థ, మహారాజ, కారణం, యేన కారణేన సూరియో హేమన్తే కఠినం తపతి, నో తథా గిమ్హే’’తి. ‘‘సబ్బీతిముత్తో, భన్తే, సూరియో కఠినం తపతి, మేఘాదిసహగతో కఠినం న తపతీ’’తి.
‘‘Hemante pana, mahārāja, heṭṭhā pathavī nibbutā hoti, upari mahāmegho upaṭṭhito hoti, upasantaṃ hoti rajojallaṃ, reṇu ca santasantaṃ gagane carati, vigatavalāhako ca hoti ākāso, vāto ca mandamandaṃ vāyati, etesaṃ uparatiyā visuddhā 2 honti sūriyaraṃsiyo, upaghātavimuttassa sūriyassa tāpo ati viya tapati. Idamettha, mahārāja, kāraṇaṃ, yena kāraṇena sūriyo hemante kaṭhinaṃ tapati, no tathā gimhe’’ti. ‘‘Sabbītimutto, bhante, sūriyo kaṭhinaṃ tapati, meghādisahagato kaṭhinaṃ na tapatī’’ti.
కఠినతపనపఞ్హో దసమో.
Kaṭhinatapanapañho dasamo.
నిప్పపఞ్చవగ్గో దుతియో.
Nippapañcavaggo dutiyo.
ఇమస్మిం వగ్గే దస పఞ్హా.
Imasmiṃ vagge dasa pañhā.
Footnotes:
