| Library / Tipiṭaka / তিপিটক • Tipiṭaka / মিলিন্দপঞ্হপাল়ি • Milindapañhapāḷi |
১০. কঠিনতপনপঞ্হো
10. Kaṭhinatapanapañho
১০. ‘‘ভন্তে নাগসেন, কিস্স হেমন্তে সূরিযো কঠিনং তপতি, নো তথা গিম্হে’’তি? ‘‘গিম্হে, মহারাজ, অনুপহতং হোতি রজোজল্লং, ৰাতক্খুভিতা রেণূ গগনানুগতা হোন্তি, আকাসেপি অব্ভা সুবহলা হোন্তি, মহাৰাতো চ অধিমত্তং ৰাযতি, তে সব্বে নানাকুলা সমাযুতা সূরিযরংসিযো পিদহন্তি, তেন গিম্হে সূরিযো মন্দং তপতি।
10. ‘‘Bhante nāgasena, kissa hemante sūriyo kaṭhinaṃ tapati, no tathā gimhe’’ti? ‘‘Gimhe, mahārāja, anupahataṃ hoti rajojallaṃ, vātakkhubhitā reṇū gaganānugatā honti, ākāsepi abbhā subahalā honti, mahāvāto ca adhimattaṃ vāyati, te sabbe nānākulā samāyutā sūriyaraṃsiyo pidahanti, tena gimhe sūriyo mandaṃ tapati.
‘‘হেমন্তে পন, মহারাজ, হেট্ঠা পথৰী নিব্বুতা হোতি, উপরি মহামেঘো উপট্ঠিতো হোতি, উপসন্তং হোতি রজোজল্লং, রেণু চ সন্তসন্তং গগনে চরতি, ৰিগতৰলাহকো চ হোতি আকাসো, ৰাতো চ মন্দমন্দং ৰাযতি, এতেসং উপরতিযা ৰিসুদ্ধা 1 হোন্তি সূরিযরংসিযো, উপঘাতৰিমুত্তস্স সূরিযস্স তাপো অতি ৰিয তপতি। ইদমেত্থ, মহারাজ, কারণং, যেন কারণেন সূরিযো হেমন্তে কঠিনং তপতি, নো তথা গিম্হে’’তি। ‘‘সব্বীতিমুত্তো, ভন্তে, সূরিযো কঠিনং তপতি, মেঘাদিসহগতো কঠিনং ন তপতী’’তি।
‘‘Hemante pana, mahārāja, heṭṭhā pathavī nibbutā hoti, upari mahāmegho upaṭṭhito hoti, upasantaṃ hoti rajojallaṃ, reṇu ca santasantaṃ gagane carati, vigatavalāhako ca hoti ākāso, vāto ca mandamandaṃ vāyati, etesaṃ uparatiyā visuddhā 2 honti sūriyaraṃsiyo, upaghātavimuttassa sūriyassa tāpo ati viya tapati. Idamettha, mahārāja, kāraṇaṃ, yena kāraṇena sūriyo hemante kaṭhinaṃ tapati, no tathā gimhe’’ti. ‘‘Sabbītimutto, bhante, sūriyo kaṭhinaṃ tapati, meghādisahagato kaṭhinaṃ na tapatī’’ti.
কঠিনতপনপঞ্হো দসমো।
Kaṭhinatapanapañho dasamo.
নিপ্পপঞ্চৰগ্গো দুতিযো।
Nippapañcavaggo dutiyo.
ইমস্মিং ৰগ্গে দস পঞ্হা।
Imasmiṃ vagge dasa pañhā.
Footnotes:
