| Library / Tipiṭaka / တိပိဋက • Tipiṭaka / ပဉ္စပကရဏ-အဋ္ဌကထာ • Pañcapakaraṇa-aṭṭhakathā |
၃. ကရုဏာကထာဝဏ္ဏနာ
3. Karuṇākathāvaṇṇanā
၈၀၇-၈၀၈. ဣဒာနိ ကရုဏာကထာ နာမ ဟောတိ။ တတ္ထ ပိယာယိတာနံ ဝတ္ထူနံ ဝိပတ္တိယာ သရာဂာနံ ရာဂဝသေန ကရုဏာပတိရူပိကံ ပဝတ္တိံ ဒိသ္ဝာ ‘‘ရာဂောဝ ကရုဏာ နာမ, သော စ ဘဂဝတော နတ္ထိ, တသ္မာ နတ္ထိ ဗုဒ္ဓသ္သ ဘဂဝတော ကရုဏာ’’တိ ယေသံ လဒ္ဓိ, သေယ္ယထာပိ ဥတ္တရာပထကာနံ; တေ သန္ဓာယ ပုစ္ဆာ သကဝာဒိသ္သ, ပဋိညာ ဣတရသ္သ။ အထ နံ ‘‘ကရုဏာ နာမေသာ နိက္ကိလေသတာယ စေဝ သတ္တာရမ္မဏတာယ စ စေတောဝိမုတ္တိတာယ စ ဧကာဒသာနိသံသတာယ စ မေတ္တာဒီဟိ သမာနဇာတိကာ, တသ္မာ ယဒိ ဘဂဝတော ကရုဏာ နတ္ထိ, မေတ္တာဒယောပိသ္သ န သိယု’’န္တိ စောဒနတ္ထံ နတ္ထိ ဗုဒ္ဓသ္သ ဘဂဝတော မေတ္တာတိအာဒိမာဟ။ အာကာရုဏိကောတိ ပဉ္ဟေ တထာရူပံ ဝောဟာရံ အပသ္သန္တော ပဋိက္ခိပတိ။ သေသမေတ္ထ ဥတ္တာနတ္ထမေဝာတိ။
807-808. Idāni karuṇākathā nāma hoti. Tattha piyāyitānaṃ vatthūnaṃ vipattiyā sarāgānaṃ rāgavasena karuṇāpatirūpikaṃ pavattiṃ disvā ‘‘rāgova karuṇā nāma, so ca bhagavato natthi, tasmā natthi buddhassa bhagavato karuṇā’’ti yesaṃ laddhi, seyyathāpi uttarāpathakānaṃ; te sandhāya pucchā sakavādissa, paṭiññā itarassa. Atha naṃ ‘‘karuṇā nāmesā nikkilesatāya ceva sattārammaṇatāya ca cetovimuttitāya ca ekādasānisaṃsatāya ca mettādīhi samānajātikā, tasmā yadi bhagavato karuṇā natthi, mettādayopissa na siyu’’nti codanatthaṃ natthi buddhassa bhagavato mettātiādimāha. Ākāruṇikoti pañhe tathārūpaṃ vohāraṃ apassanto paṭikkhipati. Sesamettha uttānatthamevāti.
ကရုဏာကထာဝဏ္ဏနာ။
Karuṇākathāvaṇṇanā.
Related texts:
တိပိဋက (မူလ) • Tipiṭaka (Mūla) / အဘိဓမ္မပိဋက • Abhidhammapiṭaka / ကထာဝတ္ထုပာဠိ • Kathāvatthupāḷi / (၁၇၉) ၃. ကရုဏာကထာ • (179) 3. Karuṇākathā
