| Library / Tipiṭaka / তিপিটক • Tipiṭaka / সুত্তনিপাত-অট্ঠকথা • Suttanipāta-aṭṭhakathā |
১০. কপ্পসুত্তৰণ্ণনা
10. Kappasuttavaṇṇanā
১০৯৯. মজ্ঝে সরস্মিন্তি কপ্পসুত্তং। তত্থ মজ্ঝে সরস্মিন্তি পুরিমপচ্ছিমকোটিপঞ্ঞাণাভাৰতো মজ্ঝভূতে সংসারেতি ৰুত্তং হোতি। তিট্ঠতন্তি তিট্ঠমানানং। যথাযিদং নাপরং সিযাতি যথা ইদং দুক্খং পুন ন ভৰেয্য।
1099.Majjhesarasminti kappasuttaṃ. Tattha majjhe sarasminti purimapacchimakoṭipaññāṇābhāvato majjhabhūte saṃsāreti vuttaṃ hoti. Tiṭṭhatanti tiṭṭhamānānaṃ. Yathāyidaṃ nāparaṃ siyāti yathā idaṃ dukkhaṃ puna na bhaveyya.
১১০১-২. অথস্স ভগৰা তমত্থং ব্যাকরোন্তো তিস্সো গাথাযো অভাসি। তত্থ অকিঞ্চনন্তি কিঞ্চনপটিপক্খং। অনাদানন্তি আদানপটিপক্খং, কিঞ্চনাদানৰূপসমন্তি ৰুত্তং হোতি। অনাপরন্তি অপরপটিভাগদীপৰিরহিতং, সেট্ঠন্তি ৰুত্তং হোতি। ন তে মারস্স পদ্ধগূতি তে মারস্স পদ্ধচরা পরিচারকা সিস্সা ন হোন্তি। সেসং সব্বত্থ পাকটমেৰ।
1101-2. Athassa bhagavā tamatthaṃ byākaronto tisso gāthāyo abhāsi. Tattha akiñcananti kiñcanapaṭipakkhaṃ. Anādānanti ādānapaṭipakkhaṃ, kiñcanādānavūpasamanti vuttaṃ hoti. Anāparanti aparapaṭibhāgadīpavirahitaṃ, seṭṭhanti vuttaṃ hoti. Na te mārassa paddhagūti te mārassa paddhacarā paricārakā sissā na honti. Sesaṃ sabbattha pākaṭameva.
এৰং ভগৰা ইমম্পি সুত্তং অরহত্তনিকূটেনেৰ দেসেসি দেসনাপরিযোসানে চ পুব্বসদিসো এৰ ধম্মাভিসমযো অহোসীতি।
Evaṃ bhagavā imampi suttaṃ arahattanikūṭeneva desesi desanāpariyosāne ca pubbasadiso eva dhammābhisamayo ahosīti.
পরমত্থজোতিকায খুদ্দক-অট্ঠকথায
Paramatthajotikāya khuddaka-aṭṭhakathāya
সুত্তনিপাত-অট্ঠকথায কপ্পসুত্তৰণ্ণনা নিট্ঠিতা।
Suttanipāta-aṭṭhakathāya kappasuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / সুত্তনিপাতপাল়ি • Suttanipātapāḷi / ১০. কপ্পমাণৰপুচ্ছা • 10. Kappamāṇavapucchā
