| Library / Tipiṭaka / ತಿಪಿಟಕ • Tipiṭaka / ಚೂಳನಿದ್ದೇಸ-ಅಟ್ಠಕಥಾ • Cūḷaniddesa-aṭṭhakathā |
೧೦. ಕಪ್ಪಮಾಣವಸುತ್ತನಿದ್ದೇಸವಣ್ಣನಾ
10. Kappamāṇavasuttaniddesavaṇṇanā
೬೧. ದಸಮೇ ಕಪ್ಪಸುತ್ತನಿದ್ದೇಸೇ – ಮಜ್ಝೇ ಸರಸ್ಮಿನ್ತಿ ಪುರಿಮಪಚ್ಛಿಮಕೋಟಿಪಞ್ಞಾಣಾಭಾವತೋ ಮಜ್ಝಭೂತೇ ಸಂಸಾರೇತಿ ವುತ್ತಂ ಹೋತಿ। ತಿಟ್ಠತನ್ತಿ ತಿಟ್ಠಮಾನಾನಂ। ಯಥಾಯಿದಂ ನಾಪರಂ ಸಿಯಾತಿ ಯಥಾ ಇದಂ ದುಕ್ಖಂ ಪುನ ನ ಭವೇಯ್ಯ।
61. Dasame kappasuttaniddese – majjhe sarasminti purimapacchimakoṭipaññāṇābhāvato majjhabhūte saṃsāreti vuttaṃ hoti. Tiṭṭhatanti tiṭṭhamānānaṃ. Yathāyidaṃ nāparaṃ siyāti yathā idaṃ dukkhaṃ puna na bhaveyya.
ಆಗಮನನ್ತಿ ಪುಬ್ಬನ್ತತೋ ಇಧಾಗಮನಂ। ಗಮನನ್ತಿ ಇತೋ ಪರಲೋಕಗಮನಂ। ಗಮನಾಗಮನನ್ತಿ ತದುಭಯವಸೇನ ವುತ್ತಂ। ಕಾಲನ್ತಿ ಮರಣಕಾಲಂ। ಗತೀತಿ ನಿಬ್ಬತ್ತಿ। ಭವಾಭವೋತಿ ಭವತೋ ಭವೋ। ಚುತಿ ಚಾತಿ ಭವತೋ ಚವನಞ್ಚ। ಉಪಪತ್ತಿ ಚಾತಿ ಚುತಸ್ಸ ಉಪಪತ್ತಿ ಚ। ನಿಬ್ಬತ್ತಿ ಚಾತಿ ಪಾತುಭಾವೋ ಚ। ಭೇದೋ ಚಾತಿ ಖನ್ಧಭೇದೋ ಚ। ಜಾತಿ ಚಾತಿ ಜನನಞ್ಚ। ಜರಾ ಚಾತಿ ಹಾನಿ ಚ। ಮರಣಞ್ಚಾತಿ ಜೀವಿತಿನ್ದ್ರಿಯಸ್ಸ ಚಾಗೋ ಚ। ಪುರಿಮಾಪಿ ಕೋಟಿ ನ ಪಞ್ಞಾಯತೀತಿ ಪುಬ್ಬಾಪಿ ಕೋಟಿ ನತ್ಥಿ ನ ಸಂವಿಜ್ಜತಿ। ತಥಾ ಪಚ್ಛಿಮಾಪಿ ಕೋಟಿ।
Āgamananti pubbantato idhāgamanaṃ. Gamananti ito paralokagamanaṃ. Gamanāgamananti tadubhayavasena vuttaṃ. Kālanti maraṇakālaṃ. Gatīti nibbatti. Bhavābhavoti bhavato bhavo. Cuti cāti bhavato cavanañca. Upapatti cāti cutassa upapatti ca. Nibbatti cāti pātubhāvo ca. Bhedo cāti khandhabhedo ca. Jāti cāti jananañca. Jarā cāti hāni ca. Maraṇañcāti jīvitindriyassa cāgo ca. Purimāpi koṭi na paññāyatīti pubbāpi koṭi natthi na saṃvijjati. Tathā pacchimāpi koṭi.
ಏತ್ತಕಾ ಜಾತಿಯೋತಿ ಏತಪರಮಾ ಜಾತಿಯೋ। ವಟ್ಟಂ ವತ್ತೀತಿ ಸಂಸಾರಪವತ್ತಿ। ತತೋ ಪರಂ ನ ವತ್ತತೀತಿ ತತೋ ಉದ್ಧಂ ನಪ್ಪವತ್ತತಿ। ಹೇವಂ ನತ್ಥೀತಿ ಏವಂ ನತ್ಥಿ ನ ಸಂವಿಜ್ಜತಿ। ಹಿ-ಇತಿ ನಿಪಾತೋ। ಅನಮತಗ್ಗೋಯನ್ತಿ ಅಯಂ ಸಂಸಾರೋ ಅವಿದಿತಗ್ಗೋ।
Ettakā jātiyoti etaparamā jātiyo. Vaṭṭaṃ vattīti saṃsārapavatti. Tato paraṃ na vattatīti tato uddhaṃ nappavattati. Hevaṃ natthīti evaṃ natthi na saṃvijjati. Hi-iti nipāto. Anamataggoyanti ayaṃ saṃsāro aviditaggo.
ಅವಿಜ್ಜಾನೀವರಣಾನನ್ತಿ ಅವಿಜ್ಜಾಯ ಆವರಿತಾನಂ। ತಣ್ಹಾಸಂಯೋಜನಾನನ್ತಿ ಕಾಮರಾಗಸಙ್ಖಾತತಣ್ಹಾಬನ್ಧನಬದ್ಧಾನಂ। ಸನ್ಧಾವತನ್ತಿ ಕಾಮಧಾತುಯಾ ಪುನಪ್ಪುನಂ ಧಾವನ್ತಾನಂ। ಸಂಸರತನ್ತಿ ರೂಪಾರೂಪಧಾತುಯಾ ಸಂಸರನ್ತಾನಂ। ದುಕ್ಖಂ ಪಚ್ಚನುಭೂತನ್ತಿ ಕಾಯಿಕಚೇತಸಿಕದುಕ್ಖಂ ಅನುಭೂತಂ ವಿನ್ದಿತಂ। ತಿಬ್ಬನ್ತಿ ಬಹಲಂ। ಬ್ಯಸನನ್ತಿ ಅವಡ್ಢಿ ವಿನಾಸೋ। ಕಟಸೀ ವಡ್ಢಿತಾತಿ ಸುಸಾನವಡ್ಢಿತಂ। ಅಲಮೇವಾತಿ ಯುತ್ತಮೇವ । ಸಬ್ಬಸಙ್ಖಾರೇಸೂತಿ ತೇಭೂಮಕಸಙ್ಖಾರೇಸು। ನಿಬ್ಬಿನ್ದಿತುನ್ತಿ ಉಕ್ಕಣ್ಠಿತುಂ। ವಿರಜ್ಜಿತುನ್ತಿ ವಿರಾಗಂ ಉಪ್ಪಾದೇತುಂ। ವಿಮುಚ್ಚಿತುನ್ತಿ ಮೋಚೇತುಂ। ವಟ್ಟಂ ವತ್ತಿಸ್ಸತೀತಿ ಸಂಸಾರಪವತ್ತಂ ತೇಭೂಮಕವಟ್ಟಂ ಅನಾಗತೇ ಪವತ್ತಿಸ್ಸತಿ। ತತೋ ಪರಂ ನ ವತ್ತಿಸ್ಸತೀತಿ ತತೋ ಉದ್ಧಂ ಅನಾಗತೇ ಸಂಸಾರಪವತ್ತಂ ನಪ್ಪವತ್ತಿಸ್ಸತಿ। ಜಾತಿಭಯೇತಿ ಜಾತಿಂ ಪಟಿಚ್ಚ ಉಪ್ಪಜ್ಜನಕಭಯೇ। ಜರಾಭಯಾದೀಸುಪಿ ಏಸೇವ ನಯೋ।
Avijjānīvaraṇānanti avijjāya āvaritānaṃ. Taṇhāsaṃyojanānanti kāmarāgasaṅkhātataṇhābandhanabaddhānaṃ. Sandhāvatanti kāmadhātuyā punappunaṃ dhāvantānaṃ. Saṃsaratanti rūpārūpadhātuyā saṃsarantānaṃ. Dukkhaṃ paccanubhūtanti kāyikacetasikadukkhaṃ anubhūtaṃ vinditaṃ. Tibbanti bahalaṃ. Byasananti avaḍḍhi vināso. Kaṭasī vaḍḍhitāti susānavaḍḍhitaṃ. Alamevāti yuttameva . Sabbasaṅkhāresūti tebhūmakasaṅkhāresu. Nibbinditunti ukkaṇṭhituṃ. Virajjitunti virāgaṃ uppādetuṃ. Vimuccitunti mocetuṃ. Vaṭṭaṃ vattissatīti saṃsārapavattaṃ tebhūmakavaṭṭaṃ anāgate pavattissati. Tato paraṃ na vattissatīti tato uddhaṃ anāgate saṃsārapavattaṃ nappavattissati. Jātibhayeti jātiṃ paṭicca uppajjanakabhaye. Jarābhayādīsupi eseva nayo.
೬೨-೩. ಅಥಸ್ಸ ಭಗವಾ ತಮತ್ಥಂ ಬ್ಯಾಕರೋನ್ತೋ ಉಪರೂಪರಿಗಾಥಾಯೋ ಅಭಾಸಿ। ದುತಿಯಗಾಥಾ ವುತ್ತತ್ಥಾಯೇವ। ತತಿಯಗಾಥಾಯ ಅಕಿಞ್ಚನನ್ತಿ ಕಿಞ್ಚನಪಟಿಪಕ್ಖಂ। ಅನಾದಾನನ್ತಿ ಆದಾನಪಟಿಪಕ್ಖಂ, ಕಿಞ್ಚನಾದಾನವೂಪಸಮನ್ತಿ ವುತ್ತಂ ಹೋತಿ। ಅನಾಪರನ್ತಿ ಅಪರಪಟಿಭಾಗದೀಪವಿರಹಿತಂ, ಸೇಟ್ಠನ್ತಿ ವುತ್ತಂ ಹೋತಿ।
62-3. Athassa bhagavā tamatthaṃ byākaronto uparūparigāthāyo abhāsi. Dutiyagāthā vuttatthāyeva. Tatiyagāthāya akiñcananti kiñcanapaṭipakkhaṃ. Anādānanti ādānapaṭipakkhaṃ, kiñcanādānavūpasamanti vuttaṃ hoti. Anāparanti aparapaṭibhāgadīpavirahitaṃ, seṭṭhanti vuttaṃ hoti.
೬೪. ಚತುತ್ಥಗಾಥಾಯ ನ ತೇ ಮಾರಸ್ಸ ಪದ್ಧಗೂತಿ ತೇ ಮಾರಸ್ಸ ಪದ್ಧಚರಾ ಪರಿಚಾರಿಕಾ ಸಿಸ್ಸಾ ನ ಹೋನ್ತಿ।
64. Catutthagāthāya na te mārassa paddhagūti te mārassa paddhacarā paricārikā sissā na honti.
ಮಹಾಜನಂ ಪಾಸೇ ನಿಯೋಜೇತ್ವಾ ಮಾರೇತೀತಿ ಮಾರೋ। ಅಕುಸಲಕಮ್ಮೇ ನಿಯುತ್ತತ್ತಾ ಕಣ್ಹೋ। ಛಸು ದೇವಲೋಕೇಸು ಅಧಿಪತಿತ್ತಾ ಅಧಿಪತಿ। ಅಕುಸಲಾನಂ ಧಮ್ಮಾನಂ ಅನ್ತಂ ಗತತ್ತಾ ಅನ್ತಗೂ। ಪಾಪಜನಂ ನ ಮುಞ್ಚತೀತಿ ನಮುಚಿ। ಸತಿವಿಪ್ಪವಾಸಪ್ಪಮತ್ತಪುಗ್ಗಲಾನಂ ಞಾತಕೋತಿ ಪಮತ್ತಬನ್ಧು। ಸೇಸಂ ಸಬ್ಬತ್ಥ ಪಾಕಟಮೇವ।
Mahājanaṃ pāse niyojetvā māretīti māro. Akusalakamme niyuttattā kaṇho. Chasu devalokesu adhipatittā adhipati. Akusalānaṃ dhammānaṃ antaṃ gatattā antagū. Pāpajanaṃ na muñcatīti namuci. Sativippavāsappamattapuggalānaṃ ñātakoti pamattabandhu. Sesaṃ sabbattha pākaṭameva.
ಏವಂ ಭಗವಾ ಇದಮ್ಪಿ ಸುತ್ತಂ ಅರಹತ್ತನಿಕೂಟೇನೇವ ದೇಸೇಸಿ, ದೇಸನಾಪರಿಯೋಸಾನೇ ಚ ಪುಬ್ಬಸದಿಸೋವ ಧಮ್ಮಾಭಿಸಮಯೋ ಅಹೋಸೀತಿ।
Evaṃ bhagavā idampi suttaṃ arahattanikūṭeneva desesi, desanāpariyosāne ca pubbasadisova dhammābhisamayo ahosīti.
ಸದ್ಧಮ್ಮಪ್ಪಜ್ಜೋತಿಕಾಯ ಚೂಳನಿದ್ದೇಸ-ಅಟ್ಠಕಥಾಯ
Saddhammappajjotikāya cūḷaniddesa-aṭṭhakathāya
ಕಪ್ಪಮಾಣವಸುತ್ತನಿದ್ದೇಸವಣ್ಣನಾ ನಿಟ್ಠಿತಾ।
Kappamāṇavasuttaniddesavaṇṇanā niṭṭhitā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಖುದ್ದಕನಿಕಾಯ • Khuddakanikāya / ಚೂಳನಿದ್ದೇಸಪಾಳಿ • Cūḷaniddesapāḷi
೧೦. ಕಪ್ಪಮಾಣವಪುಚ್ಛಾ • 10. Kappamāṇavapucchā
೧೦. ಕಪ್ಪಮಾಣವಪುಚ್ಛಾನಿದ್ದೇಸೋ • 10. Kappamāṇavapucchāniddeso
