| Library / Tipiṭaka / तिपिटक • Tipiṭaka / चरियापिटकपाळि • Cariyāpiṭakapāḷi |
७. कपिराजचरिया
7. Kapirājacariyā
६७.
67.
‘‘यदा अहं कपि आसिं, नदीकूले दरीसये।
‘‘Yadā ahaṃ kapi āsiṃ, nadīkūle darīsaye;
पीळितो सुसुमारेन, गमनं न लभामहं॥
Pīḷito susumārena, gamanaṃ na labhāmahaṃ.
६८.
68.
‘‘यम्होकासे अहं ठत्वा, ओरा पारं पतामहं।
‘‘Yamhokāse ahaṃ ṭhatvā, orā pāraṃ patāmahaṃ;
तत्थच्छि सत्तु वधको, कुम्भीलो लुद्ददस्सनो॥
Tatthacchi sattu vadhako, kumbhīlo luddadassano.
६९.
69.
‘‘सो मं असंसि ‘एही’ति, ‘अहंपेमी’ति तं वतिं।
‘‘So maṃ asaṃsi ‘ehī’ti, ‘ahaṃpemī’ti taṃ vatiṃ;
तस्स मत्थकमक्कम्म, परकूले पतिट्ठहिं॥
Tassa matthakamakkamma, parakūle patiṭṭhahiṃ.
७०.
70.
‘‘न तस्स अलिकं भणितं, यथा वाचं अकासहं।
‘‘Na tassa alikaṃ bhaṇitaṃ, yathā vācaṃ akāsahaṃ;
सच्चेन मे समो नत्थि, एसा मे सच्चपारमी’’ति॥
Saccena me samo natthi, esā me saccapāramī’’ti.
कपिराजचरियं सत्तमं।
Kapirājacariyaṃ sattamaṃ.
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / चरियापिटक-अट्ठकथा • Cariyāpiṭaka-aṭṭhakathā / ७. कपिराजचरियावण्णना • 7. Kapirājacariyāvaṇṇanā
