| Library / Tipiṭaka / တိပိဋက • Tipiṭaka / မဟာဝဂ္ဂပာဠိ • Mahāvaggapāḷi |
၄၆. ကဏ္ဋကသာမဏေရဝတ္ထု
46. Kaṇṭakasāmaṇeravatthu
တေန ခော ပန သမယေန အာယသ္မတော ဥပနန္ဒသ္သ သက္ယပုတ္တသ္သ ကဏ္ဋကော နာမ သာမဏေရော ကဏ္ဋကိံ နာမ ဘိက္ခုနိံ ဒူသေသိ။ ဘိက္ခူ ဥဇ္ဈာယန္တိ ခိယ္ယန္တိ ဝိပာစေန္တိ – ‘‘ကထဉ္ဟိ နာမ သာမဏေရော ဧဝရူပံ အနာစာရံ အာစရိသ္သတီ’’တိ။ ဘဂဝတော ဧတမတ္ထံ အာရောစေသုံ။ အနုဇာနာမိ, ဘိက္ခဝေ, ဒသဟင္ဂေဟိ သမန္နာဂတံ သာမဏေရံ နာသေတုံ။ ပာဏာတိပာတီ ဟောတိ, အဒိန္နာဒာယီ ဟောတိ, အဗ္ရဟ္မစာရီ ဟောတိ, မုသာဝာဒီ ဟောတိ, မဇ္ဇပာယီ ဟောတိ, ဗုဒ္ဓသ္သ အဝဏ္ဏံ ဘာသတိ, ဓမ္မသ္သ အဝဏ္ဏံ ဘာသတိ, သင္ဃသ္သ အဝဏ္ဏံ ဘာသတိ, မိစ္ဆာဒိဋ္ဌိကော ဟောတိ, ဘိက္ခုနိဒူသကော ဟောတိ – အနုဇာနာမိ, ဘိက္ခဝေ, ဣမေဟိ ဒသဟင္ဂေဟိ သမန္နာဂတံ သာမဏေရံ နာသေတုန္တိ။
Tena kho pana samayena āyasmato upanandassa sakyaputtassa kaṇṭako nāma sāmaṇero kaṇṭakiṃ nāma bhikkhuniṃ dūsesi. Bhikkhū ujjhāyanti khiyyanti vipācenti – ‘‘kathañhi nāma sāmaṇero evarūpaṃ anācāraṃ ācarissatī’’ti. Bhagavato etamatthaṃ ārocesuṃ. Anujānāmi, bhikkhave, dasahaṅgehi samannāgataṃ sāmaṇeraṃ nāsetuṃ. Pāṇātipātī hoti, adinnādāyī hoti, abrahmacārī hoti, musāvādī hoti, majjapāyī hoti, buddhassa avaṇṇaṃ bhāsati, dhammassa avaṇṇaṃ bhāsati, saṅghassa avaṇṇaṃ bhāsati, micchādiṭṭhiko hoti, bhikkhunidūsako hoti – anujānāmi, bhikkhave, imehi dasahaṅgehi samannāgataṃ sāmaṇeraṃ nāsetunti.
