| Library / Tipiṭaka / តិបិដក • Tipiṭaka / ទ្វេមាតិកាបាឡិ • Dvemātikāpāḷi |
។ នមោ តស្ស ភគវតោ អរហតោ សម្មាសម្ពុទ្ធស្ស។
Namo tassa bhagavato arahato sammāsambuddhassa
កង្ខាវិតរណី-អដ្ឋកថា
Kaṅkhāvitaraṇī-aṭṭhakathā
គន្ថារម្ភកថា
Ganthārambhakathā
ពុទ្ធំ ធម្មញ្ច សង្ឃញ្ច, វិប្បសន្នេន ចេតសា;
Buddhaṃ dhammañca saṅghañca, vippasannena cetasā;
វន្ទិត្វា វន្ទនាមាន, បូជាសក្ការភាជនំ។
Vanditvā vandanāmāna, pūjāsakkārabhājanaṃ.
ថេរវំសប្បទីបានំ, ថិរានំ វិនយក្កមេ;
Theravaṃsappadīpānaṃ, thirānaṃ vinayakkame;
បុព្ពាចរិយសីហានំ, នមោ កត្វា កតញ្ជលី។
Pubbācariyasīhānaṃ, namo katvā katañjalī.
បាមោក្ខំ អនវជ្ជានំ, ធម្មានំ យំ មហេសិនា;
Pāmokkhaṃ anavajjānaṃ, dhammānaṃ yaṃ mahesinā;
មុខំ មោក្ខប្បវេសាយ, បាតិមោក្ខំ បកាសិតំ។
Mukhaṃ mokkhappavesāya, pātimokkhaṃ pakāsitaṃ.
សូរតេន និវាតេន, សុចិសល្លេខវុត្តិនា;
Sūratena nivātena, sucisallekhavuttinā;
វិនយាចារយុត្តេន, សោណត្ថេរេន យាចិតោ។
Vinayācārayuttena, soṇattherena yācito.
តត្ថ សញ្ជាតកង្ខានំ, ភិក្ខូនំ តស្ស វណ្ណនំ;
Tattha sañjātakaṅkhānaṃ, bhikkhūnaṃ tassa vaṇṇanaṃ;
កង្ខាវិតរណត្ថាយ, បរិបុណ្ណវិនិច្ឆយំ។
Kaṅkhāvitaraṇatthāya, paripuṇṇavinicchayaṃ.
មហាវិហារវាសីនំ, វាចនាមគ្គនិស្សិតំ;
Mahāvihāravāsīnaṃ, vācanāmagganissitaṃ;
វត្តយិស្សាមិ នាមេន, កង្ខាវិតរណិំ សុភន្តិ។
Vattayissāmi nāmena, kaṅkhāvitaraṇiṃ subhanti.
