| Library / Tipiṭaka / တိပိဋက • Tipiṭaka / အပဒာန-အဋ္ဌကထာ • Apadāna-aṭṭhakathā |
၅. ကဏိကာရဆတ္တိယတ္ထေရအပဒာနဝဏ္ဏနာ
5. Kaṇikārachattiyattheraapadānavaṇṇanā
ဝေသ္သဘူ နာမ သမ္ဗုဒ္ဓောတိအာဒိကံ အာယသ္မတော ကဏိကာရဆတ္တိယတ္ထေရသ္သ အပဒာနံ။ အယမ္ပိ ထေရော ပုရိမဗုဒ္ဓေသု ကတာဓိကာရော တတ္ထ တတ္ထ ဘဝေ ဝိဝဋ္ဋူပနိသ္သယာနိ ပုညာနိ ဥပစိနန္တော ဝေသ္သဘုသ္သ ဘဂဝတော ကာလေ ကုလဂေဟေ နိဗ္ဗတ္တော ဝိညုတံ ပတ္တော သဒ္ဓာသမ္ပန္နော အဟောသိ။ တသ္မိံ သမယေ ဝေသ္သဘူ ဘဂဝာ ဝိဝေကကာမော မဟာဝနံ ပဝိသိတ္ဝာ နိသီဒိ။ အထ သောပိ ဥပာသကော ကေနစိဒေဝ ကရဏီယေန တတ္ထ ဂန္တ္ဝာ ဘဂဝန္တံ အဂ္ဂိက္ခန္ဓံ ဝိယ ဇလမာနံ နိသိန္နံ ဒိသ္ဝာ ပသန္နမာနသော ကဏိကာရပုပ္ဖံ ဩစိနိတ္ဝာ ဆတ္တံ ကတ္ဝာ ဘဂဝတော နိသိန္နဋ္ဌာနေ ဝိတာနံ ကတ္ဝာ ပူဇေသိ, တံ ဘဂဝတော အာနုဘာဝေန သတ္တာဟံ အမိလာတံ ဟုတ္ဝာ တထေဝ အဋ္ဌာသိ။ ဘဂဝာပိ ဖလသမာပတ္တိံ နိရောဓသမာပတ္တိဉ္စ သမာပဇ္ဇိတ္ဝာ ဝိဟာသိ , သော တံ အစ္ဆရိယံ ဒိသ္ဝာ သောမနသ္သဇာတော ဘဂဝန္တံ ဝန္ဒိတ္ဝာ အဉ္ဇလိံ ပဂ္ဂယ္ဟ အဋ္ဌာသိ။ ဘဂဝာ သမာပတ္တိတော ဝုဋ္ဌဟိတ္ဝာ ဝိဟာရမေဝ အဂမာသိ။
Vessabhūnāma sambuddhotiādikaṃ āyasmato kaṇikārachattiyattherassa apadānaṃ. Ayampi thero purimabuddhesu katādhikāro tattha tattha bhave vivaṭṭūpanissayāni puññāni upacinanto vessabhussa bhagavato kāle kulagehe nibbatto viññutaṃ patto saddhāsampanno ahosi. Tasmiṃ samaye vessabhū bhagavā vivekakāmo mahāvanaṃ pavisitvā nisīdi. Atha sopi upāsako kenacideva karaṇīyena tattha gantvā bhagavantaṃ aggikkhandhaṃ viya jalamānaṃ nisinnaṃ disvā pasannamānaso kaṇikārapupphaṃ ocinitvā chattaṃ katvā bhagavato nisinnaṭṭhāne vitānaṃ katvā pūjesi, taṃ bhagavato ānubhāvena sattāhaṃ amilātaṃ hutvā tatheva aṭṭhāsi. Bhagavāpi phalasamāpattiṃ nirodhasamāpattiñca samāpajjitvā vihāsi , so taṃ acchariyaṃ disvā somanassajāto bhagavantaṃ vanditvā añjaliṃ paggayha aṭṭhāsi. Bhagavā samāpattito vuṭṭhahitvā vihārameva agamāsi.
၂၃. သော တေန ပုညေန ဒေဝမနုသ္သေသု သမ္ပတ္တိယော အနုဘဝိတ္ဝာ ဣမသ္မိံ ဗုဒ္ဓုပ္ပာဒေ သာဝတ္ထိယံ ကုလဂေဟေ နိဗ္ဗတ္တော ဝုဒ္ဓိမန္ဝာယ သဒ္ဓာသမ္ပန္နော သတ္ထု ဓမ္မဒေသနံ သုတ္ဝာ ဃရာဝာသေ အနလ္လီနော ပဗ္ဗဇိတ္ဝာ ဝတ္တပဋိပတ္တိယာ ဇိနသာသနံ သောဘေန္တော နစိရသ္သေဝ အရဟာ ဟုတ္ဝာ အတ္တနော ပုဗ္ဗကမ္မံ သရိတ္ဝာ သောမနသ္သဇာတော ပုဗ္ဗစရိတာပဒာနံ ပကာသေန္တော ဝေသ္သဘူ နာမ သမ္ဗုဒ္ဓောတိအာဒိမာဟ။ တတ္ထ ဝေသ္သဘူတိ ဝေသ္သေ ဝေသ္သဇနေ ဘုနာတိ အဘိဘဝတီတိ ဝေသ္သဘူ။ အထ ဝာ ဝေသ္သေ ပဉ္စဝိဓမာရေ အဘိဘုနာတိ အဇ္ဈောတ္ထရတီတိ ဝေသ္သဘူ။ သာမံယေဝ ဗုဇ္ဈိတာ သစ္စာနီတိ သမ္ဗုဒ္ဓော, နာမေန ဝေသ္သဘူ နာမ သမ္ဗုဒ္ဓောတိ အတ္ထော။ ဒိဝာဝိဟာရာယ မုနီတိ ဒိဗ္ဗတိ ပကာသေတိ တံ တံ ဝတ္ထုံ ပာကဋံ ကရောတီတိ ဒိဝာ။ သူရိယုဂ္ဂမနတော ပဋ္ဌာယ ယာဝ အတ္ထင္ဂမော, တာဝ ပရိစ္ဆိန္နကာလော, ဝိဟရဏံ စတူဟိ ဣရိယာပထေဟိ ပဝတ္တနံ ဝိဟာရော, ဒိဝာယ ဝိဟာရော ဒိဝာဝိဟာရော, တသ္သ ဒိဝာဝိဟာရာယ လောကဇေဋ္ဌော နရာသဘော ဗုဒ္ဓမုနိ မဟာဝနံ ဩဂာဟိတ္ဝာ ပဝိသိတ္ဝာတိ အတ္ထော။ သေသံ ဥတ္တာနတ္ထမေဝာတိ။
23. So tena puññena devamanussesu sampattiyo anubhavitvā imasmiṃ buddhuppāde sāvatthiyaṃ kulagehe nibbatto vuddhimanvāya saddhāsampanno satthu dhammadesanaṃ sutvā gharāvāse anallīno pabbajitvā vattapaṭipattiyā jinasāsanaṃ sobhento nacirasseva arahā hutvā attano pubbakammaṃ saritvā somanassajāto pubbacaritāpadānaṃ pakāsento vessabhū nāma sambuddhotiādimāha. Tattha vessabhūti vesse vessajane bhunāti abhibhavatīti vessabhū. Atha vā vesse pañcavidhamāre abhibhunāti ajjhottharatīti vessabhū. Sāmaṃyeva bujjhitā saccānīti sambuddho, nāmena vessabhū nāma sambuddhoti attho. Divāvihārāya munīti dibbati pakāseti taṃ taṃ vatthuṃ pākaṭaṃ karotīti divā. Sūriyuggamanato paṭṭhāya yāva atthaṅgamo, tāva paricchinnakālo, viharaṇaṃ catūhi iriyāpathehi pavattanaṃ vihāro, divāya vihāro divāvihāro, tassa divāvihārāya lokajeṭṭho narāsabho buddhamuni mahāvanaṃ ogāhitvā pavisitvāti attho. Sesaṃ uttānatthamevāti.
ကဏိကာရဆတ္တိယတ္ထေရအပဒာနဝဏ္ဏနာ သမတ္တာ။
Kaṇikārachattiyattheraapadānavaṇṇanā samattā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / ခုဒ္ဒကနိကာယ • Khuddakanikāya / အပဒာနပာဠိ • Apadānapāḷi / ၅. ကဏိကာရဆတ္တိယတ္ထေရအပဒာနံ • 5. Kaṇikārachattiyattheraapadānaṃ
