| Library / Tipiṭaka / តិបិដក • Tipiṭaka / បាចិត្យាទិយោជនាបាឡិ • Pācityādiyojanāpāḷi |
៨. កណ្ឌុបដិច្ឆាទិសិក្ខាបទំ
8. Kaṇḍupaṭicchādisikkhāpadaṃ
៥៣៧. អដ្ឋមេ ‘‘កត្ថា’’តិអាទីនិ វុត្តនយានេវ។
537. Aṭṭhame ‘‘katthā’’tiādīni vuttanayāneva.
៥៣៩. ‘‘យស្សា’’តិ បទស្ស វិសយំ ទស្សេតុំ វុត្តំ ‘‘ភិក្ខុនោ’’តិ។ ‘‘នាភិយា ហេដ្ឋា’’តិ ឥមិនា នាភិយា អធោ អធោនាភីតិ វចនត្ថំ ទស្សេតិ, ‘‘ជាណុមណ្ឌលានំ ឧបរី’’តិ ឥមិនា ជាណុមណ្ឌលានំ ឧព្ភ ឧព្ភជាណុមណ្ឌលន្តិ។ ឧព្ភសទ្ទោ ហិ ឧបរិបរិយាយោ សត្តម្យន្តនិបាតោ។ កណ្ឌុខជ្ជុសទ្ទានំ វេវចនត្តា វុត្តំ ‘‘កណ្ឌូតិ ខជ្ជូ’’តិ។ កណ្ឌតិ ភេទនំ ករោតីតិ កណ្ឌុ។ ខជ្ជតិ ព្យធនំ ករោតីតិ ខជ្ជុ។ កេសុចិ បោត្ថកេសុ ‘‘កច្ឆូ’’តិ បាឋោ អត្ថិ, សោ អយុត្តោ។
539. ‘‘Yassā’’ti padassa visayaṃ dassetuṃ vuttaṃ ‘‘bhikkhuno’’ti. ‘‘Nābhiyā heṭṭhā’’ti iminā nābhiyā adho adhonābhīti vacanatthaṃ dasseti, ‘‘jāṇumaṇḍalānaṃ uparī’’ti iminā jāṇumaṇḍalānaṃ ubbha ubbhajāṇumaṇḍalanti. Ubbhasaddo hi uparipariyāyo sattamyantanipāto. Kaṇḍukhajjusaddānaṃ vevacanattā vuttaṃ ‘‘kaṇḍūti khajjū’’ti. Kaṇḍati bhedanaṃ karotīti kaṇḍu. Khajjati byadhanaṃ karotīti khajju. Kesuci potthakesu ‘‘kacchū’’ti pāṭho atthi, so ayutto.
លោហិតំ តុណ្ឌំ ឯតិស្សាតិ លោហិតតុណ្ឌិកា។ បិឡយតិ វិពាធយតីតិ បិឡកា។ អា ភុសោ អសុចិំ សវតិ បគ្ឃរាបេតីតិ អស្សាវោតិ វចនត្ថំ ទស្សេន្តោ អាហ ‘‘អសុចិបគ្ឃរណ’’ន្តិ។ អរិសញ្ច ភគន្ទរា ច មធុមេហោ ច។ អាទិសទ្ទេន ទុន្នាមកាទយោ សង្គណ្ហាតិ។ តត្ថ អរិ វិយ ឦសតិ អភិភវតីតិ អរិសំ។ ភគំ វុច្ចតិ វច្ចមគ្គំ, តំ ទរតិ ផាលេតីតិ ភគន្ទរា, គូថសមីបេ ជាតោ វណវិសេសោ។ មធុ វិយ មុត្តាទិំ មិហតិ សេចតីតិ មធុមេហោ, សោ អាពាធោ មុត្តមេហោ សុក្កមេហោ រត្តមេហោតិ អនេកវិធោ។ ថុល្លសទ្ទោ មហន្តបរិយាយោតិ អាហ ‘‘មហា’’តិ។ អដ្ឋមំ។
Lohitaṃ tuṇḍaṃ etissāti lohitatuṇḍikā. Piḷayati vibādhayatīti piḷakā. Ā bhuso asuciṃ savati paggharāpetīti assāvoti vacanatthaṃ dassento āha ‘‘asucipaggharaṇa’’nti. Arisañca bhagandarā ca madhumeho ca. Ādisaddena dunnāmakādayo saṅgaṇhāti. Tattha ari viya īsati abhibhavatīti arisaṃ. Bhagaṃ vuccati vaccamaggaṃ, taṃ darati phāletīti bhagandarā, gūthasamīpe jāto vaṇaviseso. Madhu viya muttādiṃ mihati secatīti madhumeho, so ābādho muttameho sukkameho rattamehoti anekavidho. Thullasaddo mahantapariyāyoti āha ‘‘mahā’’ti. Aṭṭhamaṃ.
Related texts:
តិបិដក (មូល) • Tipiṭaka (Mūla) / វិនយបិដក • Vinayapiṭaka / មហាវិភង្គ • Mahāvibhaṅga / ៩. រតនវគ្គោ • 9. Ratanavaggo
អដ្ឋកថា • Aṭṭhakathā / វិនយបិដក (អដ្ឋកថា) • Vinayapiṭaka (aṭṭhakathā) / មហាវិភង្គ-អដ្ឋកថា • Mahāvibhaṅga-aṭṭhakathā / ៨. កណ្ឌុបដិច្ឆាទិសិក្ខាបទវណ្ណនា • 8. Kaṇḍupaṭicchādisikkhāpadavaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / សារត្ថទីបនី-ដីកា • Sāratthadīpanī-ṭīkā / ៧. និសីទនសិក្ខាបទវណ្ណនា • 7. Nisīdanasikkhāpadavaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វជិរពុទ្ធិ-ដីកា • Vajirabuddhi-ṭīkā / ៨. កណ្ឌុបដិច្ឆាទិសិក្ខាបទវណ្ណនា • 8. Kaṇḍupaṭicchādisikkhāpadavaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វិមតិវិនោទនី-ដីកា • Vimativinodanī-ṭīkā / ៧. និសីទនសិក្ខាបទវណ្ណនា • 7. Nisīdanasikkhāpadavaṇṇanā
