| Library / Tipiṭaka / තිපිටක • Tipiṭaka / කඞ්ඛාවිතරණී-අභිනව-ටීකා • Kaṅkhāvitaraṇī-abhinava-ṭīkā |
4. කාණමාතාසික්ඛාපදවණ්ණනා
4. Kāṇamātāsikkhāpadavaṇṇanā
පහෙණකත්ථායාති පණ්ණාකාරත්ථාය. පාථෙය්යත්ථායාති මග්ගං ගච්ඡන්තානං අන්තරාමග්ගත්ථාය. සත්තූති බද්ධසත්තු, අබද්ධසත්තු ච. ද්වත්තිපත්තපූරෙ පටිග්ගහෙත්වාති මුඛවට්ටියා හෙට්ඨිමලෙඛාය සමං පූරෙ ද්වත්තිපත්තපූරෙ ගහෙත්වාති අත්ථො. ඉමස්ස චත්ථස්ස හෙට්ඨා වුත්තනයෙනෙව පාකටත්තා තත්ථ කත්තබ්බප්පකාරමෙව දස්සෙතුං ‘‘එත්ථා’’තිආදිමාහ. සෙසන්ති තතො එකපත්තතො අඤ්ඤං පත්තං. සචෙ තයො පත්තපූරා ගහිතා ද්වෙ, සචෙ ද්වෙ ගහිතා, එකන්ති වුත්තං හොති.
Paheṇakatthāyāti paṇṇākāratthāya. Pātheyyatthāyāti maggaṃ gacchantānaṃ antarāmaggatthāya. Sattūti baddhasattu, abaddhasattu ca. Dvattipattapūre paṭiggahetvāti mukhavaṭṭiyā heṭṭhimalekhāya samaṃ pūre dvattipattapūre gahetvāti attho. Imassa catthassa heṭṭhā vuttanayeneva pākaṭattā tattha kattabbappakārameva dassetuṃ ‘‘etthā’’tiādimāha. Sesanti tato ekapattato aññaṃ pattaṃ. Sace tayo pattapūrā gahitā dve, sace dve gahitā, ekanti vuttaṃ hoti.
ගමනෙ වා පටිප්පස්සද්ධෙති අන්තරාමග්ගෙ උපද්දවං දිස්වා, අනත්ථිකතාය වා ‘‘මයං ඉදානි න පෙසිස්සාම න ගමිස්සාමා’’ති එවං ගමනෙ උපච්ඡින්නෙ දෙන්තානන්ති අත්ථො.
Gamanevā paṭippassaddheti antarāmagge upaddavaṃ disvā, anatthikatāya vā ‘‘mayaṃ idāni na pesissāma na gamissāmā’’ti evaṃ gamane upacchinne dentānanti attho.
කාණමාතාසික්ඛාපදවණ්ණනා නිට්ඨිතා.
Kāṇamātāsikkhāpadavaṇṇanā niṭṭhitā.
