| Library / Tipiṭaka / ਤਿਪਿਟਕ • Tipiṭaka / ਪਞ੍ਚਪਕਰਣ-ਅਟ੍ਠਕਥਾ • Pañcapakaraṇa-aṭṭhakathā |
੧੧. ਕਮ੍ਮੂਪਚਯਕਥਾવਣ੍ਣਨਾ
11. Kammūpacayakathāvaṇṇanā
੭੩੭. ਇਦਾਨਿ ਕਮ੍ਮੂਪਚਯਕਥਾ ਨਾਮ ਹੋਤਿ। ਤਤ੍ਥ ਯੇਸਂ ਕਮ੍ਮੂਪਚਯੋ ਨਾਮ ਕਮ੍ਮਤੋ ਅਞ੍ਞੋ ਚਿਤ੍ਤવਿਪ੍ਪਯੁਤ੍ਤੋ ਅਬ੍ਯਾਕਤੋ ਅਨਾਰਮ੍ਮਣੋਤਿ ਲਦ੍ਧਿ, ਸੇਯ੍ਯਥਾਪਿ ਅਨ੍ਧਕਾਨਞ੍ਚੇવ ਸਮ੍ਮਿਤਿਯਾਨਞ੍ਚ; ਤੇ ਸਨ੍ਧਾਯ ਅਞ੍ਞਂ ਕਮ੍ਮਨ੍ਤਿ ਪੁਚ੍ਛਾ ਸਕવਾਦਿਸ੍ਸ, ਪਟਿਞ੍ਞਾ ਇਤਰਸ੍ਸ। ਅਥ ਨਂ ‘‘ਯਦਿ ਕਮ੍ਮਤੋ ਅਞ੍ਞੋ ਕਮ੍ਮੂਪਚਯੋ, ਫਸ੍ਸਾਦਿਤੋਪਿ ਅਞ੍ਞੇਨ ਫਸ੍ਸੂਪਚਯਾਦਿਨਾ ਭવਿਤਬ੍ਬ’’ਨ੍ਤਿ ਚੋਦੇਤੁਂ ਅਞ੍ਞੋ ਫਸ੍ਸੋਤਿਆਦਿਮਾਹ। ਇਤਰੋ ਲਦ੍ਧਿਯਾ ਅਭਾવੇਨ ਪਟਿਕ੍ਖਿਪਤਿ।
737. Idāni kammūpacayakathā nāma hoti. Tattha yesaṃ kammūpacayo nāma kammato añño cittavippayutto abyākato anārammaṇoti laddhi, seyyathāpi andhakānañceva sammitiyānañca; te sandhāya aññaṃ kammanti pucchā sakavādissa, paṭiññā itarassa. Atha naṃ ‘‘yadi kammato añño kammūpacayo, phassāditopi aññena phassūpacayādinā bhavitabba’’nti codetuṃ añño phassotiādimāha. Itaro laddhiyā abhāvena paṭikkhipati.
੭੩੮-੭੩੯. ਕਮ੍ਮੇਨ ਸਹਜਾਤੋਤਿ ਪਞ੍ਹੇਸੁ ਚਿਤ੍ਤવਿਪ੍ਪਯੁਤ੍ਤਂ ਸਨ੍ਧਾਯ ਪਟਿਕ੍ਖਿਪਤਿ, ਚਿਤ੍ਤਸਮ੍ਪਯੁਤ੍ਤਂ ਸਨ੍ਧਾਯ ਪਟਿਜਾਨਾਤਿ। ਕੁਸਲੋਤਿ ਪਞ੍ਹੇਸੁਪਿ ਚਿਤ੍ਤવਿਪ੍ਪਯੁਤ੍ਤਂ ਸਨ੍ਧਾਯ ਪਟਿਜਾਨਾਤਿ। ਪਰਤੋ ਅਕੁਸਲੋਤਿਪਞ੍ਹੇਸੁਪਿ ਏਸੇવ ਨਯੋ।
738-739. Kammenasahajātoti pañhesu cittavippayuttaṃ sandhāya paṭikkhipati, cittasampayuttaṃ sandhāya paṭijānāti. Kusaloti pañhesupi cittavippayuttaṃ sandhāya paṭijānāti. Parato akusalotipañhesupi eseva nayo.
੭੪੦. ਸਾਰਮ੍ਮਣੋਤਿ ਪੁਟ੍ਠੋ ਪਨ ਏਕਨ੍ਤਂ ਅਨਾਰਮ੍ਮਣਮੇવ ਇਚ੍ਛਤਿ, ਤਸ੍ਮਾ ਪਟਿਕ੍ਖਿਪਤਿ। ਚਿਤ੍ਤਂ ਭਿਜ੍ਜਮਾਨਨ੍ਤਿ ਯਦਾ ਚਿਤ੍ਤਂ ਭਿਜ੍ਜਮਾਨਂ ਹੋਤਿ, ਤਦਾ ਕਮ੍ਮਂ ਭਿਜ੍ਜਤੀਤਿ ਅਤ੍ਥੋ। ਭੁਮ੍ਮਤ੍ਥੇ વਾ ਪਚ੍ਚਤ੍ਤਂ, ਚਿਤ੍ਤੇ ਭਿਜ੍ਜਮਾਨੇਤਿ ਅਤ੍ਥੋ। ਅਯਮੇવ વਾ ਪਾਠੋ। ਤਤ੍ਥ ਯਸ੍ਮਾ ਸਮ੍ਪਯੁਤ੍ਤੋ ਭਿਜ੍ਜਤਿ, વਿਪ੍ਪਯੁਤ੍ਤੋ ਨ ਭਿਜ੍ਜਤਿ, ਤਸ੍ਮਾ ਪਟਿਜਾਨਾਤਿ ਚੇવ ਪਟਿਕ੍ਖਿਪਤਿ ਚ।
740. Sārammaṇoti puṭṭho pana ekantaṃ anārammaṇameva icchati, tasmā paṭikkhipati. Cittaṃ bhijjamānanti yadā cittaṃ bhijjamānaṃ hoti, tadā kammaṃ bhijjatīti attho. Bhummatthe vā paccattaṃ, citte bhijjamāneti attho. Ayameva vā pāṭho. Tattha yasmā sampayutto bhijjati, vippayutto na bhijjati, tasmā paṭijānāti ceva paṭikkhipati ca.
੭੪੧. ਕਮ੍ਮਮ੍ਹਿ ਕਮ੍ਮੂਪਚਯੋਤਿ ਕਮ੍ਮੇ ਸਤਿ ਕਮ੍ਮੂਪਚਯੋ, ਕਮ੍ਮੇ વਾ ਪਤਿਟ੍ਠਿਤੇ ਕਮ੍ਮੂਪਚਯੋ, ਕਮ੍ਮੂਪਚਯਤੋવ વਿਪਾਕੋ ਨਿਬ੍ਬਤ੍ਤਤਿ। ਤਸ੍ਮਿਂ ਪਨ ਕਮ੍ਮੇ ਨਿਰੁਦ੍ਧੇ ਯਾવ ਅਂਕੁਰੁਪ੍ਪਾਦਾ ਬੀਜਂ વਿਯ ਯਾવ વਿਪਾਕੁਪ੍ਪਾਦਾ ਕਮ੍ਮੂਪਚਯੋ ਤਿਟ੍ਠਤੀਤਿਸ੍ਸ ਲਦ੍ਧਿ, ਤਸ੍ਮਾ ਪਟਿਜਾਨਾਤਿ। ਤਞ੍ਞੇવ ਕਮ੍ਮਂ, ਸੋ ਕਮ੍ਮੂਪਚਯੋ, ਸੋ ਕਮ੍ਮવਿਪਾਕੋਤਿ ਯਸ੍ਮਾ ਕਮ੍ਮਮ੍ਹਿ ਕਮ੍ਮੂਪਚਯੋ, ਸੋ ਚ ਯਾવ વਿਪਾਕੁਪ੍ਪਾਦਾ ਤਿਟ੍ਠਤੀਤਿਸ੍ਸ ਲਦ੍ਧਿ, ਤਸ੍ਮਾ ਨਂ ਤੇਸਂ ਤਿਣ੍ਣਮ੍ਪਿ ਏਕਤ੍ਤਂ ਪੁਚ੍ਛਤਿ વਿਪਾਕੋ ਸਾਰਮ੍ਮਣੋਤਿ ਇਦਂ વਿਪਾਕੋ વਿਯ વਿਪਾਕਧਮ੍ਮਧਮ੍ਮੋਪਿ ਆਰਮ੍ਮਣਪਟਿਬਦ੍ਧੋਯੇવਾਤਿ ਚੋਦਨਤ੍ਥਂ ਪੁਚ੍ਛਤਿ। ਇਤਰੋ ਪਨ ਲਦ੍ਧਿવਸੇਨੇਕਂ ਪਟਿਜਾਨਾਤਿ, ਏਕਂ ਪਟਿਕ੍ਖਿਪਤਿ। ਪਟਿਲੋਮੇਪਿ ਏਸੇવ ਨਯੋ। ਸੇਸਮੇਤ੍ਥ ਯਥਾਪਾਲ਼ਿਮੇવ ਨਿਯ੍ਯਾਤੀਤਿ।
741. Kammamhi kammūpacayoti kamme sati kammūpacayo, kamme vā patiṭṭhite kammūpacayo, kammūpacayatova vipāko nibbattati. Tasmiṃ pana kamme niruddhe yāva aṃkuruppādā bījaṃ viya yāva vipākuppādā kammūpacayo tiṭṭhatītissa laddhi, tasmā paṭijānāti. Taññeva kammaṃ, so kammūpacayo, so kammavipākoti yasmā kammamhi kammūpacayo, so ca yāva vipākuppādā tiṭṭhatītissa laddhi, tasmā naṃ tesaṃ tiṇṇampi ekattaṃ pucchati vipāko sārammaṇoti idaṃ vipāko viya vipākadhammadhammopi ārammaṇapaṭibaddhoyevāti codanatthaṃ pucchati. Itaro pana laddhivasenekaṃ paṭijānāti, ekaṃ paṭikkhipati. Paṭilomepi eseva nayo. Sesamettha yathāpāḷimeva niyyātīti.
ਕਮ੍ਮੂਪਚਯਕਥਾવਣ੍ਣਨਾ।
Kammūpacayakathāvaṇṇanā.
ਪਨ੍ਨਰਸਮੋ વਗ੍ਗੋ।
Pannarasamo vaggo.
ਤਤਿਯਪਣ੍ਣਾਸਕੋ ਸਮਤ੍ਤੋ।
Tatiyapaṇṇāsako samatto.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਅਭਿਧਮ੍ਮਪਿਟਕ • Abhidhammapiṭaka / ਕਥਾવਤ੍ਥੁਪਾਲ਼ਿ • Kathāvatthupāḷi / (੧੫੫) ੧੧. ਕਮ੍ਮੂਪਚਯਕਥਾ • (155) 11. Kammūpacayakathā
ਟੀਕਾ • Tīkā / ਅਭਿਧਮ੍ਮਪਿਟਕ (ਟੀਕਾ) • Abhidhammapiṭaka (ṭīkā) / ਪਞ੍ਚਪਕਰਣ-ਮੂਲਟੀਕਾ • Pañcapakaraṇa-mūlaṭīkā / ੧੧. ਕਮ੍ਮੂਪਚਯਕਥਾવਣ੍ਣਨਾ • 11. Kammūpacayakathāvaṇṇanā
ਟੀਕਾ • Tīkā / ਅਭਿਧਮ੍ਮਪਿਟਕ (ਟੀਕਾ) • Abhidhammapiṭaka (ṭīkā) / ਪਞ੍ਚਪਕਰਣ-ਅਨੁਟੀਕਾ • Pañcapakaraṇa-anuṭīkā / ੧੧. ਕਮ੍ਮੂਪਚਯਕਥਾવਣ੍ਣਨਾ • 11. Kammūpacayakathāvaṇṇanā
