| Library / Tipiṭaka / திபிடக • Tipiṭaka / பஞ்சபகரண-அட்ட²கதா² • Pañcapakaraṇa-aṭṭhakathā |
11. கம்மூபசயகதா²வண்ணனா
11. Kammūpacayakathāvaṇṇanā
737. இதா³னி கம்மூபசயகதா² நாம ஹோதி. தத்த² யேஸங் கம்மூபசயோ நாம கம்மதோ அஞ்ஞோ சித்தவிப்பயுத்தோ அப்³யாகதோ அனாரம்மணோதி லத்³தி⁴, ஸெய்யதா²பி அந்த⁴கானஞ்சேவ ஸம்மிதியானஞ்ச; தே ஸந்தா⁴ய அஞ்ஞங் கம்மந்தி புச்சா² ஸகவாதி³ஸ்ஸ, படிஞ்ஞா இதரஸ்ஸ. அத² நங் ‘‘யதி³ கம்மதோ அஞ்ஞோ கம்மூபசயோ, ப²ஸ்ஸாதி³தோபி அஞ்ஞேன ப²ஸ்ஸூபசயாதி³னா ப⁴விதப்³ப³’’ந்தி சோதே³துங் அஞ்ஞோ ப²ஸ்ஸோதிஆதி³மாஹ. இதரோ லத்³தி⁴யா அபா⁴வேன படிக்கி²பதி.
737. Idāni kammūpacayakathā nāma hoti. Tattha yesaṃ kammūpacayo nāma kammato añño cittavippayutto abyākato anārammaṇoti laddhi, seyyathāpi andhakānañceva sammitiyānañca; te sandhāya aññaṃ kammanti pucchā sakavādissa, paṭiññā itarassa. Atha naṃ ‘‘yadi kammato añño kammūpacayo, phassāditopi aññena phassūpacayādinā bhavitabba’’nti codetuṃ añño phassotiādimāha. Itaro laddhiyā abhāvena paṭikkhipati.
738-739. கம்மேன ஸஹஜாதோதி பஞ்ஹேஸு சித்தவிப்பயுத்தங் ஸந்தா⁴ய படிக்கி²பதி, சித்தஸம்பயுத்தங் ஸந்தா⁴ய படிஜானாதி. குஸலோதி பஞ்ஹேஸுபி சித்தவிப்பயுத்தங் ஸந்தா⁴ய படிஜானாதி. பரதோ அகுஸலோதிபஞ்ஹேஸுபி ஏஸேவ நயோ.
738-739. Kammenasahajātoti pañhesu cittavippayuttaṃ sandhāya paṭikkhipati, cittasampayuttaṃ sandhāya paṭijānāti. Kusaloti pañhesupi cittavippayuttaṃ sandhāya paṭijānāti. Parato akusalotipañhesupi eseva nayo.
740. ஸாரம்மணோதி புட்டோ² பன ஏகந்தங் அனாரம்மணமேவ இச்ச²தி, தஸ்மா படிக்கி²பதி. சித்தங் பி⁴ஜ்ஜமானந்தி யதா³ சித்தங் பி⁴ஜ்ஜமானங் ஹோதி, ததா³ கம்மங் பி⁴ஜ்ஜதீதி அத்தோ². பு⁴ம்மத்தே² வா பச்சத்தங், சித்தே பி⁴ஜ்ஜமானேதி அத்தோ². அயமேவ வா பாடோ². தத்த² யஸ்மா ஸம்பயுத்தோ பி⁴ஜ்ஜதி, விப்பயுத்தோ ந பி⁴ஜ்ஜதி, தஸ்மா படிஜானாதி சேவ படிக்கி²பதி ச.
740. Sārammaṇoti puṭṭho pana ekantaṃ anārammaṇameva icchati, tasmā paṭikkhipati. Cittaṃ bhijjamānanti yadā cittaṃ bhijjamānaṃ hoti, tadā kammaṃ bhijjatīti attho. Bhummatthe vā paccattaṃ, citte bhijjamāneti attho. Ayameva vā pāṭho. Tattha yasmā sampayutto bhijjati, vippayutto na bhijjati, tasmā paṭijānāti ceva paṭikkhipati ca.
741. கம்மம்ஹி கம்மூபசயோதி கம்மே ஸதி கம்மூபசயோ, கம்மே வா பதிட்டி²தே கம்மூபசயோ, கம்மூபசயதோவ விபாகோ நிப்³ப³த்ததி. தஸ்மிங் பன கம்மே நிருத்³தே⁴ யாவ அங்குருப்பாதா³ பீ³ஜங் விய யாவ விபாகுப்பாதா³ கம்மூபசயோ திட்ட²தீதிஸ்ஸ லத்³தி⁴, தஸ்மா படிஜானாதி. தஞ்ஞேவ கம்மங், ஸோ கம்மூபசயோ, ஸோ கம்மவிபாகோதி யஸ்மா கம்மம்ஹி கம்மூபசயோ, ஸோ ச யாவ விபாகுப்பாதா³ திட்ட²தீதிஸ்ஸ லத்³தி⁴, தஸ்மா நங் தேஸங் திண்ணம்பி ஏகத்தங் புச்ச²தி விபாகோ ஸாரம்மணோதி இத³ங் விபாகோ விய விபாகத⁴ம்மத⁴ம்மோபி ஆரம்மணபடிப³த்³தோ⁴யேவாதி சோத³னத்த²ங் புச்ச²தி. இதரோ பன லத்³தி⁴வஸேனேகங் படிஜானாதி, ஏகங் படிக்கி²பதி. படிலோமேபி ஏஸேவ நயோ. ஸேஸமெத்த² யதா²பாளிமேவ நிய்யாதீதி.
741. Kammamhi kammūpacayoti kamme sati kammūpacayo, kamme vā patiṭṭhite kammūpacayo, kammūpacayatova vipāko nibbattati. Tasmiṃ pana kamme niruddhe yāva aṃkuruppādā bījaṃ viya yāva vipākuppādā kammūpacayo tiṭṭhatītissa laddhi, tasmā paṭijānāti. Taññeva kammaṃ, so kammūpacayo, so kammavipākoti yasmā kammamhi kammūpacayo, so ca yāva vipākuppādā tiṭṭhatītissa laddhi, tasmā naṃ tesaṃ tiṇṇampi ekattaṃ pucchati vipāko sārammaṇoti idaṃ vipāko viya vipākadhammadhammopi ārammaṇapaṭibaddhoyevāti codanatthaṃ pucchati. Itaro pana laddhivasenekaṃ paṭijānāti, ekaṃ paṭikkhipati. Paṭilomepi eseva nayo. Sesamettha yathāpāḷimeva niyyātīti.
கம்மூபசயகதா²வண்ணனா.
Kammūpacayakathāvaṇṇanā.
பன்னரஸமோ வக்³கோ³.
Pannarasamo vaggo.
ததியபண்ணாஸகோ ஸமத்தோ.
Tatiyapaṇṇāsako samatto.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / கதா²வத்து²பாளி • Kathāvatthupāḷi / (155) 11. கம்மூபசயகதா² • (155) 11. Kammūpacayakathā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-மூலடீகா • Pañcapakaraṇa-mūlaṭīkā / 11. கம்மூபசயகதா²வண்ணனா • 11. Kammūpacayakathāvaṇṇanā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-அனுடீகா • Pañcapakaraṇa-anuṭīkā / 11. கம்மூபசயகதா²வண்ணனா • 11. Kammūpacayakathāvaṇṇanā
