| Library / Tipiṭaka / તિપિટક • Tipiṭaka / વજિરબુદ્ધિ-ટીકા • Vajirabuddhi-ṭīkā |
પઞ્ચવગ્ગો
Pañcavaggo
કમ્મવગ્ગવણ્ણના
Kammavaggavaṇṇanā
૪૮૩. ‘‘ઉમ્મત્તકસમ્મુતિં ઉમ્મત્તકે યાચિત્વા ગતે અસમ્મુખાપિ દાતું વટ્ટતી’’તિ વુત્તં. તત્થ નિસિન્નેપિ ન કુપ્પતિ નિયમાભાવા. અસમ્મુખા કતે દોસાભાવં દસ્સેતું ‘‘અસમ્મુખાકતં સુકતં હોતી’’તિ વુત્તં. દૂતેન ઉપસમ્પદા પનેત્થ સમ્મુખા કાતું ન સક્કા. કમ્મવાચાનાનત્તસભાવા પત્તનિક્કુજ્જનાદયો હત્થપાસતો અપનેત્વા કાતબ્બા, તેન વુત્તં ‘‘અસમ્મુખા કતં સુકતં હોતી’’તિ. ‘‘પુચ્છિત્વા ચોદેત્વા સારેત્વા કાતબ્બં અપુચ્છિત્વા અચોદેત્વા અસારેત્વા કરોતી’’તિ અયં વચનત્થો. ઠપેત્વા કત્તિકમાસન્તિ સો પવારણામાસો, દ્વે ચ પુણ્ણમાસિયોતિ પઠમદુતિયવસ્સૂપગતાનં પવારણા પુણ્ણમાસા દ્વે.
483. ‘‘Ummattakasammutiṃ ummattake yācitvā gate asammukhāpi dātuṃ vaṭṭatī’’ti vuttaṃ. Tattha nisinnepi na kuppati niyamābhāvā. Asammukhā kate dosābhāvaṃ dassetuṃ ‘‘asammukhākataṃ sukataṃ hotī’’ti vuttaṃ. Dūtena upasampadā panettha sammukhā kātuṃ na sakkā. Kammavācānānattasabhāvā pattanikkujjanādayo hatthapāsato apanetvā kātabbā, tena vuttaṃ ‘‘asammukhā kataṃ sukataṃ hotī’’ti. ‘‘Pucchitvā codetvā sāretvā kātabbaṃ apucchitvā acodetvā asāretvā karotī’’ti ayaṃ vacanattho. Ṭhapetvā kattikamāsanti so pavāraṇāmāso, dve ca puṇṇamāsiyoti paṭhamadutiyavassūpagatānaṃ pavāraṇā puṇṇamāsā dve.
૪૮૫. પદં વા છડ્ડેતીતિ અત્થો. ક-વગ્ગાદીસુ પઞ્ચસુ. ગરુકન્તિ દીઘં, સંયોગપરઞ્ચ. ‘‘બુદ્ધરક્ખિતત્થેરસ્સ યસ્સ નક્ખમતી’’તિ એત્થ ત-કારક-કારા સંયોગપરા. દીઘે વત્તબ્બે રસ્સન્તિ ‘‘સો તુણ્હી અસ્સા’’તિ વત્તબ્બે સો તુણ્હિ અસ્સાતિ વચનં.
485. Padaṃ vā chaḍḍetīti attho. Ka-vaggādīsu pañcasu. Garukanti dīghaṃ, saṃyogaparañca. ‘‘Buddharakkhitattherassa yassa nakkhamatī’’ti ettha ta-kāraka-kārā saṃyogaparā. Dīghe vattabbe rassanti ‘‘so tuṇhī assā’’ti vattabbe so tuṇhi assāti vacanaṃ.
૪૮૬. સેસટ્ઠકથાસુ વુત્તવચનં કુરુન્દિયં પાકટં કત્વા ‘‘નિસીદિતું ન સક્કોન્તી’’તિ વુત્તં.
486. Sesaṭṭhakathāsu vuttavacanaṃ kurundiyaṃ pākaṭaṃ katvā ‘‘nisīdituṃ na sakkontī’’ti vuttaṃ.
૪૮૭-૮. પરિસુદ્ધસીલા ચત્તારો ભિક્ખૂતિ પારાજિકં અનાપન્ના. ન તેસં છન્દો વા પારિસુદ્ધિ વા એતીતિ તીસુ, દ્વીસુ વા નિસિન્નેસુ એકસ્સ, દ્વિન્નં વા છન્દપારિસુદ્ધિ આહટાપિ અનાહટાવ.
487-8.Parisuddhasīlā cattāro bhikkhūti pārājikaṃ anāpannā. Na tesaṃ chando vā pārisuddhi vā etīti tīsu, dvīsu vā nisinnesu ekassa, dvinnaṃ vā chandapārisuddhi āhaṭāpi anāhaṭāva.
Related texts:
તિપિટક (મૂલ) • Tipiṭaka (Mūla) / વિનયપિટક • Vinayapiṭaka / પરિવારપાળિ • Parivārapāḷi / ૧. કમ્મવગ્ગો • 1. Kammavaggo
અટ્ઠકથા • Aṭṭhakathā / વિનયપિટક (અટ્ઠકથા) • Vinayapiṭaka (aṭṭhakathā) / પરિવાર-અટ્ઠકથા • Parivāra-aṭṭhakathā / કમ્મવગ્ગવણ્ણના • Kammavaggavaṇṇanā
ટીકા • Tīkā / વિનયપિટક (ટીકા) • Vinayapiṭaka (ṭīkā) / સારત્થદીપની-ટીકા • Sāratthadīpanī-ṭīkā / કમ્મવગ્ગવણ્ણના • Kammavaggavaṇṇanā
ટીકા • Tīkā / વિનયપિટક (ટીકા) • Vinayapiṭaka (ṭīkā) / વિમતિવિનોદની-ટીકા • Vimativinodanī-ṭīkā / કમ્મવગ્ગવણ્ણના • Kammavaggavaṇṇanā
ટીકા • Tīkā / વિનયપિટક (ટીકા) • Vinayapiṭaka (ṭīkā) / પાચિત્યાદિયોજનાપાળિ • Pācityādiyojanāpāḷi / કમ્મવગ્ગવણ્ણના • Kammavaggavaṇṇanā
