| Library / Tipiṭaka / တိပိဋက • Tipiṭaka / ကင္ခာဝိတရဏီ-ပုရာဏ-ဋီကာ • Kaṅkhāvitaraṇī-purāṇa-ṭīkā |
၉. ကမ္မပ္ပဋိဗာဟနသိက္ခာပဒဝဏ္ဏနာ
9. Kammappaṭibāhanasikkhāpadavaṇṇanā
အပ္ပမတ္တကဝိသ္သဇ္ဇနကေန ပန စီဝရံ ကရောန္တသ္သ သေနာသနက္ခန္ဓကဝဏ္ဏနာယံ (စူဠဝ. ၃၂၈) ဝုတ္တပ္ပဘေဒာနိ သူစိအာဒီနိ အနပလောကေတ္ဝာပိ ဒာတဗ္ဗာနိ။ တတော အတိရေကံ ဒေန္တေန အပလောကနကမ္မံ ကာတဗ္ဗံ။ ဧဝံ ကတံ ပန အပလောကနံ ကမ္မလက္ခဏမေဝာတိ အဓိပ္ပာယော။ ဧဝံ သဗ္ဗတ္ထ ကမ္မလက္ခဏံ ဝေဒိတဗ္ဗံ။ ဂာမသီမာဝိဟာရေသု ဩသာရဏာဒီနိ သင္ဃကမ္မာနိယေဝ န ဝဋ္ဋန္တိ။ ဝိသ္သဇ္ဇိယဝေဘင္ဂိယာနိ ပန ဝဋ္ဋန္တိ။ ‘‘သင္ဃသ္သ သန္တက’’န္တိ သာမညတော အဝတ္ဝာ ‘‘ဣမသ္မိံ ဝိဟာရေ သင္ဃသ္သ သန္တက’’န္တိ အပလောကေတဗ္ဗန္တိ စ, ‘‘သမုဋ္ဌာနာဒီနိ အဒိန္နာဒာနသဒိသာနိ, ဣဒံ ပန ဒုက္ခဝေဒန’’န္တိ ပာဌောတိ စ လိခိတံ။
Appamattakavissajjanakena pana cīvaraṃ karontassa senāsanakkhandhakavaṇṇanāyaṃ (cūḷava. 328) vuttappabhedāni sūciādīni anapaloketvāpi dātabbāni. Tato atirekaṃ dentena apalokanakammaṃ kātabbaṃ. Evaṃ kataṃ pana apalokanaṃ kammalakkhaṇamevāti adhippāyo. Evaṃ sabbattha kammalakkhaṇaṃ veditabbaṃ. Gāmasīmāvihāresu osāraṇādīni saṅghakammāniyeva na vaṭṭanti. Vissajjiyavebhaṅgiyāni pana vaṭṭanti. ‘‘Saṅghassa santaka’’nti sāmaññato avatvā ‘‘imasmiṃ vihāre saṅghassa santaka’’nti apaloketabbanti ca, ‘‘samuṭṭhānādīni adinnādānasadisāni, idaṃ pana dukkhavedana’’nti pāṭhoti ca likhitaṃ.
ကမ္မပ္ပဋိဗာဟနသိက္ခာပဒဝဏ္ဏနာ နိဋ္ဌိတာ။
Kammappaṭibāhanasikkhāpadavaṇṇanā niṭṭhitā.
