| Library / Tipiṭaka / ತಿಪಿಟಕ • Tipiṭaka / ಮಿಲಿನ್ದಪಞ್ಹಪಾಳಿ • Milindapañhapāḷi |
೮. ಕಮ್ಮಫಲಅತ್ಥಿಭಾವಪಞ್ಹೋ
8. Kammaphalaatthibhāvapañho
೮. ರಾಜಾ ಆಹ ‘‘ಭನ್ತೇ ನಾಗಸೇನ, ಇಮಿನಾ ನಾಮರೂಪೇನ ಕಮ್ಮಂ ಕತಂ ಕುಸಲಂ ವಾ ಅಕುಸಲಂ ವಾ, ಕುಹಿಂ ತಾನಿ ಕಮ್ಮಾನಿ ತಿಟ್ಠನ್ತೀ’’ತಿ? ‘‘ಅನುಬನ್ಧೇಯ್ಯುಂ ಖೋ, ಮಹಾರಾಜ, ತಾನಿ ಕಮ್ಮಾನಿ ಛಾಯಾವ ಅನಪಾಯಿನೀ’’ತಿ 1। ‘‘ಸಕ್ಕಾ ಪನ, ಭನ್ತೇ, ತಾನಿ ಕಮ್ಮಾನಿ ದಸ್ಸೇತುಂ ‘ಇಧ ವಾ ಇಧ ವಾ ತಾನಿ ಕಮ್ಮಾನಿ ತಿಟ್ಠನ್ತೀ’’’ತಿ? ‘‘ನ ಸಕ್ಕಾ, ಮಹಾರಾಜ, ತಾನಿ ಕಮ್ಮಾನಿ ದಸ್ಸೇತುಂ ‘ಇಧ ವಾ ಇಧ ವಾ ತಾನಿ ಕಮ್ಮಾನಿ ತಿಟ್ಠನ್ತೀ’’’ತಿ।
8. Rājā āha ‘‘bhante nāgasena, iminā nāmarūpena kammaṃ kataṃ kusalaṃ vā akusalaṃ vā, kuhiṃ tāni kammāni tiṭṭhantī’’ti? ‘‘Anubandheyyuṃ kho, mahārāja, tāni kammāni chāyāva anapāyinī’’ti 2. ‘‘Sakkā pana, bhante, tāni kammāni dassetuṃ ‘idha vā idha vā tāni kammāni tiṭṭhantī’’’ti? ‘‘Na sakkā, mahārāja, tāni kammāni dassetuṃ ‘idha vā idha vā tāni kammāni tiṭṭhantī’’’ti.
‘‘ಓಪಮ್ಮಂ ಕರೋಹೀ’’ತಿ। ‘‘ತಂ ಕಿಂ ಮಞ್ಞಸಿ, ಮಹಾರಾಜ, ಯಾನಿಮಾನಿ ರುಕ್ಖಾನಿ ಅನಿಬ್ಬತ್ತಫಲಾನಿ, ಸಕ್ಕಾ ತೇಸಂ ಫಲಾನಿ ದಸ್ಸೇತುಂ ‘ಇಧ ವಾ ಇಧ ವಾ ತಾನಿ ಫಲಾನಿ ತಿಟ್ಠನ್ತೀ’’’ತಿ। ‘‘ನ ಹಿ, ಭನ್ತೇ’’ತಿ। ‘‘ಏವಮೇವ ಖೋ, ಮಹಾರಾಜ, ಅಬ್ಬೋಚ್ಛಿನ್ನಾಯ ಸನ್ತತಿಯಾ ನ ಸಕ್ಕಾ ತಾನಿ ಕಮ್ಮಾನಿ ದಸ್ಸೇತುಂ ‘ಇಧ ವಾ ಇಧ ವಾ ತಾನಿ ಕಮ್ಮಾನಿ ತಿಟ್ಠನ್ತೀ’ತಿ।
‘‘Opammaṃ karohī’’ti. ‘‘Taṃ kiṃ maññasi, mahārāja, yānimāni rukkhāni anibbattaphalāni, sakkā tesaṃ phalāni dassetuṃ ‘idha vā idha vā tāni phalāni tiṭṭhantī’’’ti. ‘‘Na hi, bhante’’ti. ‘‘Evameva kho, mahārāja, abbocchinnāya santatiyā na sakkā tāni kammāni dassetuṃ ‘idha vā idha vā tāni kammāni tiṭṭhantī’ti.
‘‘ಕಲ್ಲೋಸಿ, ಭನ್ತೇ ನಾಗಸೇನಾ’’ತಿ।
‘‘Kallosi, bhante nāgasenā’’ti.
ಕಮ್ಮಫಲಅತ್ಥಿಭಾವಪಞ್ಹೋ ಅಟ್ಠಮೋ।
Kammaphalaatthibhāvapañho aṭṭhamo.
Footnotes:
