| Library / Tipiṭaka / ਤਿਪਿਟਕ • Tipiṭaka / ਸਂਯੁਤ੍ਤਨਿਕਾਯ • Saṃyuttanikāya |
੧੫. ਨવਪੁਰਾਣવਗ੍ਗੋ
15. Navapurāṇavaggo
੧. ਕਮ੍ਮਨਿਰੋਧਸੁਤ੍ਤਂ
1. Kammanirodhasuttaṃ
੧੪੬. ‘‘ਨવਪੁਰਾਣਾਨਿ , ਭਿਕ੍ਖવੇ, ਕਮ੍ਮਾਨਿ ਦੇਸੇਸ੍ਸਾਮਿ ਕਮ੍ਮਨਿਰੋਧਂ ਕਮ੍ਮਨਿਰੋਧਗਾਮਿਨਿਞ੍ਚ ਪਟਿਪਦਂ। ਤਂ ਸੁਣਾਥ, ਸਾਧੁਕਂ ਮਨਸਿ ਕਰੋਥ; ਭਾਸਿਸ੍ਸਾਮੀਤਿ। ਕਤਮਞ੍ਚ, ਭਿਕ੍ਖવੇ, ਪੁਰਾਣਕਮ੍ਮਂ? ਚਕ੍ਖੁ, ਭਿਕ੍ਖવੇ, ਪੁਰਾਣਕਮ੍ਮਂ ਅਭਿਸਙ੍ਖਤਂ ਅਭਿਸਞ੍ਚੇਤਯਿਤਂ વੇਦਨਿਯਂ ਦਟ੍ਠਬ੍ਬਂ…ਪੇ॰… ਜਿવ੍ਹਾ ਪੁਰਾਣਕਮ੍ਮਾ ਅਭਿਸਙ੍ਖਤਾ ਅਭਿਸਞ੍ਚੇਤਯਿਤਾ વੇਦਨਿਯਾ ਦਟ੍ਠਬ੍ਬਾ…ਪੇ॰… ਮਨੋ ਪੁਰਾਣਕਮ੍ਮੋ ਅਭਿਸਙ੍ਖਤੋ ਅਭਿਸਞ੍ਚੇਤਯਿਤੋ વੇਦਨਿਯੋ ਦਟ੍ਠਬ੍ਬੋ। ਇਦਂ વੁਚ੍ਚਤਿ, ਭਿਕ੍ਖવੇ, ਪੁਰਾਣਕਮ੍ਮਂ। ਕਤਮਞ੍ਚ, ਭਿਕ੍ਖવੇ, ਨવਕਮ੍ਮਂ? ਯਂ ਖੋ, ਭਿਕ੍ਖવੇ, ਏਤਰਹਿ ਕਮ੍ਮਂ ਕਰੋਤਿ ਕਾਯੇਨ વਾਚਾਯ ਮਨਸਾ, ਇਦਂ વੁਚ੍ਚਤਿ, ਭਿਕ੍ਖવੇ, ਨવਕਮ੍ਮਂ। ਕਤਮੋ ਚ, ਭਿਕ੍ਖવੇ, ਕਮ੍ਮਨਿਰੋਧੋ? ਯੋ ਖੋ, ਭਿਕ੍ਖવੇ, ਕਾਯਕਮ੍ਮવਚੀਕਮ੍ਮਮਨੋਕਮ੍ਮਸ੍ਸ ਨਿਰੋਧਾ વਿਮੁਤ੍ਤਿਂ ਫੁਸਤਿ, ਅਯਂ વੁਚ੍ਚਤਿ, ਭਿਕ੍ਖવੇ, ਕਮ੍ਮਨਿਰੋਧੋ। ਕਤਮਾ ਚ, ਭਿਕ੍ਖવੇ, ਕਮ੍ਮਨਿਰੋਧਗਾਮਿਨੀ ਪਟਿਪਦਾ? ਅਯਮੇવ ਅਰਿਯੋ ਅਟ੍ਠਙ੍ਗਿਕੋ ਮਗ੍ਗੋ, ਸੇਯ੍ਯਥਿਦਂ – ਸਮ੍ਮਾਦਿਟ੍ਠਿ, ਸਮ੍ਮਾਸਙ੍ਕਪ੍ਪੋ, ਸਮ੍ਮਾવਾਚਾ, ਸਮ੍ਮਾਕਮ੍ਮਨ੍ਤੋ, ਸਮ੍ਮਾਆਜੀવੋ, ਸਮ੍ਮਾવਾਯਾਮੋ, ਸਮ੍ਮਾਸਤਿ, ਸਮ੍ਮਾਸਮਾਧਿ – ਅਯਂ વੁਚ੍ਚਤਿ, ਭਿਕ੍ਖવੇ, ਕਮ੍ਮਨਿਰੋਧਗਾਮਿਨੀ ਪਟਿਪਦਾ। ਇਤਿ ਖੋ, ਭਿਕ੍ਖવੇ, ਦੇਸਿਤਂ ਮਯਾ ਪੁਰਾਣਕਮ੍ਮਂ, ਦੇਸਿਤਂ ਨવਕਮ੍ਮਂ, ਦੇਸਿਤੋ ਕਮ੍ਮਨਿਰੋਧੋ, ਦੇਸਿਤਾ ਕਮ੍ਮਨਿਰੋਧਗਾਮਿਨੀ ਪਟਿਪਦਾ। ਯਂ ਖੋ, ਭਿਕ੍ਖવੇ, ਸਤ੍ਥਾਰਾ ਕਰਣੀਯਂ ਸਾવਕਾਨਂ ਹਿਤੇਸਿਨਾ ਅਨੁਕਮ੍ਪਕੇਨ ਅਨੁਕਮ੍ਪਂ ਉਪਾਦਾਯ, ਕਤਂ વੋ ਤਂ ਮਯਾ। ਏਤਾਨਿ, ਭਿਕ੍ਖવੇ, ਰੁਕ੍ਖਮੂਲਾਨਿ, ਏਤਾਨਿ ਸੁਞ੍ਞਾਗਾਰਾਨਿ। ਝਾਯਥ, ਭਿਕ੍ਖવੇ, ਮਾ ਪਮਾਦਤ੍ਥ; ਮਾ ਪਚ੍ਛਾવਿਪ੍ਪਟਿਸਾਰਿਨੋ ਅਹੁવਤ੍ਥ। ਅਯਂ વੋ ਅਮ੍ਹਾਕਂ ਅਨੁਸਾਸਨੀ’’ਤਿ। ਪਠਮਂ।
146. ‘‘Navapurāṇāni , bhikkhave, kammāni desessāmi kammanirodhaṃ kammanirodhagāminiñca paṭipadaṃ. Taṃ suṇātha, sādhukaṃ manasi karotha; bhāsissāmīti. Katamañca, bhikkhave, purāṇakammaṃ? Cakkhu, bhikkhave, purāṇakammaṃ abhisaṅkhataṃ abhisañcetayitaṃ vedaniyaṃ daṭṭhabbaṃ…pe… jivhā purāṇakammā abhisaṅkhatā abhisañcetayitā vedaniyā daṭṭhabbā…pe… mano purāṇakammo abhisaṅkhato abhisañcetayito vedaniyo daṭṭhabbo. Idaṃ vuccati, bhikkhave, purāṇakammaṃ. Katamañca, bhikkhave, navakammaṃ? Yaṃ kho, bhikkhave, etarahi kammaṃ karoti kāyena vācāya manasā, idaṃ vuccati, bhikkhave, navakammaṃ. Katamo ca, bhikkhave, kammanirodho? Yo kho, bhikkhave, kāyakammavacīkammamanokammassa nirodhā vimuttiṃ phusati, ayaṃ vuccati, bhikkhave, kammanirodho. Katamā ca, bhikkhave, kammanirodhagāminī paṭipadā? Ayameva ariyo aṭṭhaṅgiko maggo, seyyathidaṃ – sammādiṭṭhi, sammāsaṅkappo, sammāvācā, sammākammanto, sammāājīvo, sammāvāyāmo, sammāsati, sammāsamādhi – ayaṃ vuccati, bhikkhave, kammanirodhagāminī paṭipadā. Iti kho, bhikkhave, desitaṃ mayā purāṇakammaṃ, desitaṃ navakammaṃ, desito kammanirodho, desitā kammanirodhagāminī paṭipadā. Yaṃ kho, bhikkhave, satthārā karaṇīyaṃ sāvakānaṃ hitesinā anukampakena anukampaṃ upādāya, kataṃ vo taṃ mayā. Etāni, bhikkhave, rukkhamūlāni, etāni suññāgārāni. Jhāyatha, bhikkhave, mā pamādattha; mā pacchāvippaṭisārino ahuvattha. Ayaṃ vo amhākaṃ anusāsanī’’ti. Paṭhamaṃ.
Related texts:
ਅਟ੍ਠਕਥਾ • Aṭṭhakathā / ਸੁਤ੍ਤਪਿਟਕ (ਅਟ੍ਠਕਥਾ) • Suttapiṭaka (aṭṭhakathā) / ਸਂਯੁਤ੍ਤਨਿਕਾਯ (ਅਟ੍ਠਕਥਾ) • Saṃyuttanikāya (aṭṭhakathā) / ੧. ਕਮ੍ਮਨਿਰੋਧਸੁਤ੍ਤવਣ੍ਣਨਾ • 1. Kammanirodhasuttavaṇṇanā
ਟੀਕਾ • Tīkā / ਸੁਤ੍ਤਪਿਟਕ (ਟੀਕਾ) • Suttapiṭaka (ṭīkā) / ਸਂਯੁਤ੍ਤਨਿਕਾਯ (ਟੀਕਾ) • Saṃyuttanikāya (ṭīkā) / ੧. ਕਮ੍ਮਨਿਰੋਧਸੁਤ੍ਤવਣ੍ਣਨਾ • 1. Kammanirodhasuttavaṇṇanā
